ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ວັນທີ 14 ກໍລະກົດ 2022 ນີ້ຢູ່ທີ່ສະຕູດີໂອຂອງສະຖານີວິທະຍຸ-ໂທລະພາບແຂວງ,  ທ່ານ ນ. ຄໍາພອນ ພິມມະຈັນ ຮອງປະທານສະພາປະຊາຊົນແຂວງ, ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 04 ແຂວງອຸດົມໄຊ, ຕາງໜ້າຄະນະສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 04 ແຂວງອຸດົມໄຊ, ໄດ້ຖະແຫຼງຕໍ່ສື່ມ່ວນຊົນຂອງແຂວງ ເພື່ອໃຫ້ບັນດາທ່ານການນໍາພັກ-ລັດ, ພະນັກງານ-ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງປະຊາຊົນລາວບັນດາ ເຜົ່າໃນທົ່ວແຂວງອຸດົມໄຊ ຮັບຊາບກ່ຽວກັບຜົນສຳເລັດຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ວ່າ:

ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ໄຂຂຶ້ນໃນວັນທີ 13 ມິຖຸນາ ຫາ ທີ 8 ກໍລະກົດ 2022 ເປັນເວລາ 20 ວັນ ທີ່ຫໍສະພາແຫ່ງຊາດ ໂດຍການເປັນປະທານ ຂອງທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ມີຄະນະປະຈໍາສະພາແຫ່ງຊາດ, ສະມາຊິກສະພາແຫ່ງຊາດ ຊຸດທີ IX ປະຈໍາ 18 ເຂດເລືອກຕັ້ງ  ເຂົ້າຮ່ວມທັງໝົດ 162 ທ່ານ, ຍິງ 35 ທ່ານ, ຄະນະສະມາຊິກສະພາແຫ່ງຊາດ ເຂດເລືອກຕັ້ງທີ 04 ແຂວງອຸດົມໄຊ ເຂົ້າຮ່ວມທັງໝົດ 7 ທ່ານ, ຍິງ 1 ທ່ານ, ກອງປະຊຸມຖືເປັນກຽດຢ່າງສູງຕ້ອນຮັບ ພະນະທ່ານ ປອ ທອງລຸນ ສີສຸລິດ ເລຂາທິການໃຫຍ່, ປະທານປະເທດແຫ່ງ ສປປ ລາວ, ທ່ານ ປອ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວ, ພ້ອມດ້ວຍການນໍາພັກ-ລັດ, ອາດີດສະມາຊິກສະພາແຫ່ງຊາດ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ພິຈາລະນາຮັບຮອງບັນຫາສໍາຄັນພື້ນຖານຂອງປະເທດຊາດ ດັ່ງນີ້:

  1. ວຽກງານບຸກຄະລາກອນ

1) ມະຕິກອງປະຊຸມສະພາແຫ່ງຊາດ ສະບັບເລກທີ 44/ສພຊ, ລົງວັນທີ 20 ມິຖຸນາ 2022 ວ່າດ້ວຍການຮັບຮອງ ເອົາການເເຕ່ງຕັ້ງຮອງນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ;

2) ມະຕິກອງປະຊຸມສະພາແຫ່ງຊາດ ສະບັບເລກທີ 45/ສພຊ, ລົງວັນທີ 20 ມິຖຸນາ 2022 ວ່າດ້ວຍການ ຮັບຮອງເອົາການຍົກຍ້າຍ ແລະ ເເຕ່ງຕັ້ງສະມາຊິກລັດຖະບານ;

3) ມະຕິກອງປະຊຸມສະພາແຫ່ງຊາດ ສະບັບເລກທີ 43/ສພຊ, ລົງວັນທີ 20 ມິຖຸນາ 2022 ວ່າດ້ວຍການ ເລືອກຕັ້ງປະທານອົງການກວດສອບແຫ່ງລັດ.

  1. ວຽກງານຂົງເຂດລັດຖະບານ

1) ມະຕິກອງປະຊຸມສະພາແຫ່ງຊາດ ສະບັບເລກທີ 55/ສພຊ, ລົງວັນທີ 08 ກໍລະກົດ 2022 ວ່າດ້ວຍການຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນ ຕົ້ນປີ 2022 ເເລະ ເເຜນການ 6 ເດືອນທ້າຍປີ 2022;

2) ມະຕິກອງປະຊຸມສະພາແຫ່ງຊາດ ສະບັບເລກທີ 56/ສພຊ, ລົງວັນທີ 08 ກໍລະກົດ 2022 ວ່າດ້ວຍ ການຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ແລະ ແຜນ ເງິນຕາ 6 ເດືອນຕົ້ນປີ 2022 ເເລະ ເເຜນການ 6 ເດືອນທ້າຍປີ 2022;

3) ມະຕິກອງປະຊຸມສະພາແຫ່ງຊາດ ສະບັບເລກທີ 57/ສພຊ, ລົງວັນທີ 08 ກໍລະກົດ 2022 ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການປະເມີນຜົນການຈັດຕັ້ງປະຕິບັດ ກົດໝາຍ 4 ສະບັບຄື: ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍການສົ່ງເສີມການລົງທຶນ, ກົດ ໝາຍວ່າດ້ວຍຊັບສິນຂອງລັດ ແລະ ກົດໝາຍວ່າດ້ວຍແຮ່ທາດ;

4) ມະຕິກອງປະຊຸມສະພາແຫ່ງຊາດ ສະບັບເລກທີ 58/ສພຊ, ລົງວັນທີ 08 ກໍລະກົດ 2022 ວ່າດ້ວຍການຮັບຮອງເອົາບົດລາຍງານຂອງລັດຖະບານກ່ຽວກັບທິດທາງການປະຕິຮູບລັດວິສາຫະກິດ ລວມທັງການປັບ ປຸງໂຄງສ້າງຂອງທະນາຄານທຸລະກິດລັດ;

5) ມະຕິກອງປະຊຸມສະພາແຫ່ງຊາດ ສະບັບເລກທີ 59/ສພຊ, ລົງວັນທີ 08 ກໍລະກົດ 2022 ວ່າດ້ວຍການຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນການທ່ອງທ່ຽວສີຂຽວ, ການເປີດປະເທດ ຕິດພັນກັບການປ້ອງກັນ ແລະ ຮັບມືກັບການແຜ່ລະບາດຂອງພະຍາດໂຄວິດ-19;

6) ມະຕິກອງປະຊຸມສະພາແຫ່ງຊາດ ສະບັບເລກທີ 60/ສພຊ, ລົງວັນທີ 08 ກໍລະກົດ 2022 ວ່າດ້ວຍການຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດບັນດາຄາດໝາຍໃນຂົງເຂດສຶກສາທິການ ແລະ ກິລາ ເປັນຕົ້ນ: ການປັບປຸງຄຸນນະພາບລະບົບການຮຽນ-ການສອນທຸກຊັ້ນທຸກສາຍ ໃນໄລຍະໃໝ່ ແລະ ການຄຸ້ມຄອງວຽກງານກິລາ-ກາຍະກໍາ.

  1. ວຽກງານຂົງເຂດສະພາແຫ່ງຊາດ,

1) ມະຕິກອງປະຊຸມສະພາແຫ່ງຊາດ ສະບັບເລກທີ 61/ສພຊ, ລົງວັນທີ 08 ກໍລະກົດ 2022 ວ່າດ້ວຍ ການຮັບຮອງເອົາບົດລາຍງານຂອງຄະນະປະຈໍາສະພາແຫ່ງຊາດ ກ່ຽວກັບການເຄື່ອນໄຫວວຽກງານໃນໄລຍະແຕ່ ກອງປະຊຸມສະໄໝສາມັນເທື່ອທີ 2 ຫາ ກອງປະຊຸມສະໄໝສາມັນເທື່ອທີ 3 ແລະ ແຜນການຮອດກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX;

2) ມະຕິກອງປະຊຸມສະພາແຫ່ງຊາດ ສະບັບເລກທີ 02/ສພຊ, ລົງວັນທີ 08 ກໍລະກົດ 2022 ວ່າດ້ວຍການຮັບຮອງເອົາບົດລາຍງານຜົນການຕິດຕາມກວດກາ ການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂ ຄວາມຫຍຸ້ງ ຍາກທາງເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ໃນໄລຍະຜ່ານມາ ແລະ ແຜນການ ຕິດຕາມກວດກາຮອດປີ 2023 ຂອງສະພາແຫ່ງຊາດ.

3) ກອງປະຊຸມໄດ້ຮັບຟັງການລາຍງານຂອງຄະນະປະຈໍາສະພາແຫ່ງຊາດ ກ່ຽວກັບການຍົກຍ້າຍ, ແຕ່ງຕັ້ງ ຮອງປະທານກໍາມາທິການ ຈໍານວນໜຶ່ງ ສະພາແຫ່ງຊາດ ແລະ ການເລືອກຕັ້ງແທນສະມາຊິກສະພາແຫ່ງຊາດທີ່ວາງລົງ ເຂດເລືອກຕັ້ງທີ 17 ແຂວງອັດຕະປື.

  1. ວຽກງານສ້າງ ແລະ ປັບປຸງກົດໝາຍ 9 ສະບັບ

1) ມະຕິກອງປະຊຸມສະພາແຫ່ງຊາດ ສະບັບເລກທີ 46/ສພຊ, ລົງວັນທີ 07 ກໍລະກົດ 2022 ວ່າດ້ວຍ ການຮັບຮອງເອົາກົດໝາຍວ່າດ້ວຍການຄຸ້ມຄອງອາວຸດ ແລະ ວັດຖຸລະເບີດ (ສ້າງໃໝ່);

2) ມະຕິກອງປະຊຸມສະພາແຫ່ງຊາດ ສະບັບເລກທີ 47/ສພຊ, ລົງວັນທີ 07 ກໍລະກົດ 2022 ວ່າດ້ວຍ   ການຮັບຮອງເອົາກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ປັບປຸງ);

3) ມະຕິກອງປະຊຸມສະພາແຫ່ງຊາດ ສະບັບເລກທີ 48/ສພຊ, ລົງວັນທີ 07 ກໍລະກົດ 2022 ວ່າດ້ວຍ ການຮັບຮອງເອົາກົດໝາຍວ່າດ້ວຍສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ປັບປຸງ);

4) ມະຕິກອງປະຊຸມສະພາແຫ່ງຊາດ ສະບັບເລກທີ 49/ສພຊ, ລົງວັນທີ 07 ກໍລະກົດ 2022 ວ່າດ້ວຍ ການຮັບຮອງເອົາກົດໝາຍວ່າດ້ວຍການແກ້ໄຂຄໍາຮ້ອງທຸກ (ປັບປຸງ);

5) ມະຕິກອງປະຊຸມສະພາແຫ່ງຊາດ ສະບັບເລກທີ 50/ສພຊ, ລົງວັນທີ 07 ກໍລະກົດ 2022 ວ່າດ້ວຍ ການຮັບຮອງເອົາກົດໝາຍວ່າດ້ວຍຊັບສິນຂອງລັດ (ປັບປຸງ);

6) ມະຕິກອງປະຊຸມສະພາແຫ່ງຊາດ ສະບັບເລກທີ 51/ສພຊ, ລົງວັນທີ 07 ກໍລະກົດ 2022 ວ່າດ້ວຍ ການຮັບຮອງເອົາກົດໝາຍວ່າດ້ວຍວິຈິດສິນ (ສ້າງໃໝ່);

7) ມະຕິກອງປະຊຸມສະພາແຫ່ງຊາດ ສະບັບເລກທີ 52/ສພຊ, ລົງວັນທີ 07 ກໍລະກົດ 2022 ວ່າດ້ວຍການຮັບຮອງເອົາກົດໝາຍວ່າດ້ວຍກົດໝາຍວ່າດ້ວຍຄວາມປອດໄພຂອງເຂື່ອນ (ສ້າງໃໝ່);

8) ມະຕິກອງປະຊຸມສະພາແຫ່ງຊາດ ສະບັບເລກທີ 53/ສພຊ, ລົງວັນທີ 07 ກໍລະກົດ 2022 ວ່າດ້ວຍການ ຮັບຮອງເອົາກົດໝາຍວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍນ້ໍາ ແລະ ຊັບພະຍາກອນນ້ໍາ (ປັບປຸງ);

9) ມະຕິກອງປະຊຸມສະພາແຫ່ງຊາດ ສະບັບເລກທີ 54/ສພຊ, ລົງວັນທີ 07 ກໍລະກົດ 2022 ວ່າດ້ວຍ ການຮັບຮອງເອົາກົດໝາຍວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍສານປະຊາ ຊົນ (ປັບປຸງ).

ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 04  ແຂວງອຸດົມໄຊ ໄດ້ລົງທະບຽນປະກອບຄໍາເຫັນ 2 ຄັ້ງ ແລະ ໄດ້ປະກອບຄໍາເຫັນ ລວມທັງໝົດ 24 ຄັ້ງ ໃນຈໍານວນ 7 ທ່ານ, ການດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ນີ້ ສະພາແຫ່ງຊາດໄດ້ສະເໜີໃຫ້ 20 ພາກສ່ວນ ຂຶ້ນຊີ້ແຈງຕໍ່ຄໍາຊັກຖາມກ່ຽວກັບບັນຫາທີ່ພົ້ນເດັ່ນຂອງສັງຄົມ ເຊິ່ງສະພາແຫ່ງຊາດ ແລະ ສະມາຊິກສະພາແຫ່ງຊາດ ໄດ້ຍົກຂຶ້ນຢູ່ໃນກອງປະຊຸມ.

ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສຳຄັນດັ່ງກ່າວມາຂ້າງເທິງນັ້ນ, ຕະຫຼອດໃນໄລຍະດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ມີປະຊາຊົນບັນດາເຜົ່າສົ່ງຄຳຄິດຄຳເຫັນຜ່ານໂທລະສັບສາຍດ່ວນ (156) ຫຼາຍກວ່າ 588 ສາຍ ເຊິ່ງພົວພັນເຖິງການຄຸ້ມຄອງບໍລິຫານລັດ, ການພັດທະນາເສດຖະກິດ-ສັງຄົມ, ການພັດທະນາທີ່ມີຜົນກະທົບຕໍ່ສັງຄົມ ແລະ ສິ່ງແວດລ້ອມ ຕໍ່ກັບຄໍາຄິດເຫັນຂອງປະຊາຊົນທີ່ສົ່ງມາທາງໂທລະສັບສາຍດ່ວນດັ່ງກ່າວ ກອງເລຂາກອງປະຊຸມ ຈະໄດ້ສັງລວມ ແລະ ມອບໃຫ້ກຳມາທິການທີ່ກ່ຽວຂ້ອງ ເພື່ອປະສານສົມທົບພາກສ່ວນກ່ຽວຂ້ອງ ຄົ້ນຄວ້າແກ້ໄຂໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ.

ໃນໂອກາດສະເຫຼີມສະຫຼອງ ສອງວັນປະຫວັດສາດຄື: ວັນສ້າງຕັ້ງແຂວງອຸດົມໄຊຄົບຮອບ  60 ປີ , ວັນສ້າງຕັ້ງກຳລັງປ້ອງກັນຄວາມສະຫງົບແຂວງອຸດົມໄຊຄົບຮອບ 60 ປີ  ແລະ ວັນສ້າງຕັ້ງສະຫະພັນແມ່ຍິງລາວຄົບຮອບ 67 ປີ ທີ່ໃກ້ຈະມາເຖິງນີ້  ອີກເທື່ອໜຶ່ງໃນນາມຕາງໜ້າໃຫ້ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 04, ຕາງໜ້າ ຄະນະປະຈໍາ ສະພາປະຊາຊົນແຂວງອຸດົມໄຊ, ຂ້າພະເຈົ້າ ຂໍສະແດງຄວາມຮູ້ບຸນຄຸນຢ່າງລົ້ນເຫຼືອຕໍ່ການນໍາພາ-ຊີ້ນໍາ ຂອງຄະນະບໍລິຫານງານພັກແຂວງຕະຫຼອດ 60 ​ປີ ຜ່ານມາ ແລະ ຂໍອວຍພອນໄຊອັນປະເສີດ ມາຍັງບັນດາທ່ານການນໍາພັກ-ລັດ ຈົ່ງມີພາລານາໄມສົມບູນ, ມີຜົນສໍາເລັດໃນໜ້າທີ່ການງານ ສືບຕໍ່ນໍາພາ-ຊີ້ນໍາ ແລະ ພັດທະນາແຂວງອຸດົມໄຊໃຫ້ເຕີບໃຫຍ່ແຂັ້ມແຂງ, ຂໍສະແດງຄວາມຂອບໃຈມາຍັງບັນດາທ່ານພະນັກງານ ລັດຖະກອນ, ທະຫານ-ຕໍາຫຼວດ, ນັກຮຽນ, ນັກສຶກສາປັນຍາຊົນ, ກຳມະກອນ, ຊາວຜູ້ອອກແຮງງານ ແລະ ພໍ່ແມ່ປະຊາຊົນລາວບັນດາເຜົ່າໃນທົ່ວແຂວງອຸດົມໄຊ ທີ່ໄດ້ຕິດຕາມການດໍາເນີນກອງປະຊຸມສະໄໝສາມັນເທື່ອທີ່ 3 ຂອງ ສະພາແຫ່ງຊາດ ຊຸດທີ IX ແຕ່ຕົ້ນຕະຫຼອດປາຍ(ຂໍຂອບໃຈ)!

ພາບ/ຂ່າວ: ແສງພອນ ອິນນະລົງ.