ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

ຕອນບ່າຍ ວັນທີ 25 ສິງຫາ 2022 ທີ່ຫ້ອງປະຊຸມສະພາປະຊາຊົນແຂວງ ທ່ານ ນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງ, ຫົວໜ້າກອງເລຂາກອງປະຊຸມ ຖະແຫຼງຜົນສໍາເລັດການດໍາເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊົນແຂວງ ຊຸດທີ II ທ່ານ ໄດ້ກ່າວວ່າ:

ບັນດາທ່ານທີນັບຖື ແລະ ຮັກແພງ!

ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ດໍາເນີນມາເປັນເວລາ 3 ວັນພາຍໃຕ້ການນຳພາ ຂອງທ່ານ ທອງສີ ເສົາສຸລິພົມ ຮອງເລຂາພັກແຂວງ, ປະທານສະພາປະຊາຊົນແຂວງ ແລະ ການສຸມສະຕິປັນຍາ ບົນຫຼັກການເສີມຂະຫຍາຍສິດປະຊາທິປະໄຕ ຂອງບັນດາທ່ານສະມາຊິກສະພາປະຊາຊົນແຂວງ ແລະ ການປະກອບສ່ວນຂອງອົງການປົກຄອງແຂວງ, ອົງການຕຸລາການ ແລະ ພາກສ່ວນທີ່ກ່ຽວຂ້ອງ ຕາມພາລະບົດບາດຂອງຕົນ ເຂົ້າໃນການກະກຽມ ແລະ ການດຳເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ເຮັດໃຫ້ການພິຈາລະນາ ແລະ ຮັບຮອງເອົາບັນຫາສໍາຄັນ ຂອງແຂວງ ຕາມສິດ ແລະ ໜ້າທີ່ຂອງສະພາປະຊາຊົນແຂວງ ທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ ໄດ້ຮັບຜົນສຳເລັດຕາມຄາດໝາຍທີ່ວາງໄວ້.

ຂ້າພະເຈົ້າຕາງໜ້າຄະນະປະຈໍາສະພາປະຊາຊົນແຂວງ ມີຄວາມຍິນດີ ແລະ ຖືເປັນກຽດ  ແຈ້ງມາຍັງບັນດາທ່ານ ພະນັກງານ-ລັດຖະກອນ, ທະຫານ, ຕໍາຫຼວດ, ນັກຮຽນ, ນັກສຶກສາ-ປັນຍາຊົນ, ນັກທຸລະກິດ, ຊາວຜູ້ອອກແຮງງານ ແລະ ພໍ່ແມ່ພີ່ນ້ອງປະຊາຊົນບັນດາເຜົ່າ ໃນທົ່ວແຂວງຜົ້ງສາລີຮັບຊາບ ກ່ຽວກັບຜົນສໍາເລັດ ກອງປະຊຸມສະ   ໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ມີດັ່ງນີ້:

ກອງປະຊຸມສະໄໝສາມັນ ເທື່ອທີ 3  ຂອງສະພາປະຊາຊົນແຂວງ ຊຸດທີ II ໄດ້ໄຂຂຶ້ນໃນ ຕອນເຊົ້າ ຂອງວັນທີ 23 ສິງຫາ 2022 ແລະ ສໍາເລັດໃນ ຕອນບ່າຍ ຂອງວັນທີ 25 ສິງຫາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ, ໃນກອງປະຊຸມຄັ້ງນີ້ນອກຈາກການເຂົ້າຮ່ວມຂອງສະມາຊິກສະພາປະຊາຊົນແຂວງແລ້ວ ຍັງມີການນຳ ຂອງແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ 02 ແຂວງຜົ້ງສາລີ ປະຈໍາຢູ່ສະພາແຫ່ງຊາດ, ສະມາຊິກອົງການປົກຄອງແຂວງ, ແນວລາວສ້າງຊາດແຂວງ, ສະຫະພັນນັກຮົບເກົ່າແຂວງ, ອົງການຈັດຕັ້ງມະຫາຊົນຂັ້ນແຂວງ, ອົງການຕຸລາການ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.

ບັນດາທ່ານທີ່ນັບຖື ແລະ ຮັກແພງ!

ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ໄດ້ພິຈາລະນາ ແລະ ຮັບຮອງເອົາບັນຫາສໍາຄັນພື້ນຖານຂອງທ້ອງຖິ່ນດັ່ງນີ້:

  • ມະ​ຕິກອງ​ປະ​ຊຸມ​ສະ​ພາ​ປະ​ຊາ​ຊົນ​ແຂວງ ວ່າ​ດ້ວຍ​ການ​ຮັບ​ຮອງ​ເອົາ ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022;
  • ມະ​ຕິກອງ​ປະ​ຊຸມ​ສະ​ພາ​ປະ​ຊາ​ຊົນ​ແຂວງ ວ່າ​ດ້ວຍ​ການ​ຮັບ​ຮອງ​ເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ ເເລະ ແຜນການ 6 ເດືອນທ້າຍປີ 2022;
  • ມະ​ຕິກອງ​ປະ​ຊຸມ​ສະ​ພາ​ປະ​ຊາ​ຊົນ​ແຂວງ ວ່າ​ດ້ວຍ​ການ​ຮັບ​ຮອງ​ເອົາບົດລາຍງານຂອງອົງການປົກຄອງແຂວງ ກ່ຽວກັບການປັບປຸງຄຸນນະພາບລະບົບການຮຽນ-ການສອນ ໃນທຸກຊັ້ນທຸກສາຍໃນໄລຍະໃໝ່;
  • ມະ​ຕິກອງ​ປະ​ຊຸມ​ສະ​ພາ​ປະ​ຊາ​ຊົນ​ແຂວງ ວ່າ​ດ້ວຍ​ການ​ຮັບ​ຮອງ​ເອົາບົດລາຍງານຂອງຄະນະປະຈໍາສະພາສະພາປະຊາຊົນແຂວງ ກ່ຽວກັບການເຄື່ອນໄຫວວຽກງານ ໃນໄລະຍະແຕ່ກອງປະຊຸມສະໄໝສາມັນ ເທື່ອທີ 2 ຫາ ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II;
  • ມະ​ຕິ​ກອງ​ປະ​ຊຸມສະ​ພາ​ປະ​ຊາ​ຊົນ​ແຂວງ ວ່າ​ດ້ວຍ​ການຮັບ​ຮອງ​ເອົາ ຂໍ້ຕົກລົງເຈົ້າແຂວງ ວ່າດ້ວຍການການເພີ່ມທະວິໃນການສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ຢູ່ແຂວງຜົ້ງສາລີ;
  • ມະ​ຕິ​ກອງ​ປະ​ຊຸມສະ​ພາ​ປະ​ຊາ​ຊົນ​ແຂວງ ວ່າ​ດ້ວຍ​ການຮັບ​ຮອງ​ເອົາ ຂໍ້ຕົກລົງເຈົ້າແຂວງ ວ່າດ້ວຍການສ້າງກອງທຶນພັດທະນາກິລາກາຍຍະກຳຂອງແຂວງ;
  • ມະ​ຕິ​ກອງ​ປະ​ຊຸມສະ​ພາ​ປະ​ຊາ​ຊົນ​ແຂວງ ວ່າ​ດ້ວຍ​ການຮັບ​ຮອງ​ເອົາ ຂໍ້ຕົກລົງເຈົ້າແຂວງ ວ່າດ້ວຍການກໍານົດ ລາຄາຫົວໜ່ວຍຜົນກະທົບໂດຍກົງຈາກໂຄງການພັດທະນາພື້ນຖານໂຄງລ່າງຢູ່ແຂວງຜົ້ງສາລີ;
  • ມະ​ຕິ​ກອງ​ປະ​ຊຸມສະ​ພາ​ປະ​ຊາ​ຊົນ​ແຂວງ ວ່າ​ດ້ວຍ​ການຮັບ​ຮອງ​ເອົາ ຂໍ້ຕົກລົງເຈົ້າແຂວງ ວ່າດ້ວຍການຈັດງານບຸນປະເພນີ ຢູ່ແຂວງຜົ້ງສາລີ;
  • ມະຕິກອງປະຊຸມສະພາປະຊາຊົນແຂວງ ວ່າດ້ວຍການ​ຮັບ​ຮອງ​ເອົາ​ການສະເໜີຍົກຍ້າຍ ຫົວໜ້າພະແນກກະສິກຳ ແລະ ປ່າໄມ້ແຂວງຜົ້ງ​ສາ​ລີ;
  • ມະຕິກອງປະຊຸມສະພາປະຊາຊົນແຂວງ ວ່າດ້ວຍການ​ຮັບ​ຮອງ​ເອົາ​ການສະເໜີແຕ່ງຕັ້ງ ຫົວໜ້າພະແນກກະສິກຳ ແລະ ປ່າໄມ້ແຂວງຜົ້ງ​ສາ​ລີ.

ໃນການດຳເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ນີ້ ສະພາປະຊາຊົນແຂວງ ໄດ້ສະເໜີໃຫ້ 15 ພາກສ່ວນ ຂຶ້ນຊີ້ແຈງຕໍ່ຄໍາຊັກຖາມກ່ຽວກັບບັນຫາທີ່ພົ້ນເດັ່ນຂອງສັງຄົມ ຊຶ່ງສະພາປະຊາຊົນແຂວງ ແລະ ສະມາຊິກສະພາປະຊາຊົນແຂວງ ໄດ້ຍົກຂຶ້ນຢູ່ໃນກອງປະຊຸມ ປະກອບມີ:

  1. ພະແນກການເງິນແຂວງ
  • ຊີ້ແຈງກ່ຽວກັບການເກັບລາຍຮັບ ແລະ ຄຸ້ມຄອງລາຍຈ່າຍງົບປະມານແຫ່ງລັດຂັ້ນແຂວງ;
  • ຊີ້ແຈງການຄຸ້ມຄອງຊັບສິນຂອງລັດ ໃຫ້ລວມສູນຕາມກົດໝາຍກຳນົດ ເປັນຕົ້ນ: ໂຄງການທີ່ບໍ່ມີສັນຍາສຳປະທານ, ໂຄງການສິ້ນສຸດອາຍຸສັນຍາ (ຂັ້ນສູນກາງ, ຂັ້ນແຂວງ ແລະ ຂັ້ນເມືອງອະນຸຍາດ).
  1. ພະແນກແຜນການ ແລະ ການລົງການທຶນແຂວງ
  • ຊີ້ແຈງກ່ຽວກັບ ແຜນການຊຸກຍູ້ ແລະ ຊຳລະໃຫ້ຜູ້ປະກອບການ ໂຄງການທີ່ກໍ່ສ້າງບໍ່ສຳເລັດຕາມສັນຍາ ແລະ ໂຄງການກໍ່ສ້າງສຳເລັດແລ້ວ (ໂຄງການໜີ້ສິນຍາວນານ).
  • ຊີ້ແຈງກ່ຽວກັບຈັດຕັ້ງປະຕິບັດກົດໝາຍ ແລະ ນິຕິກຳໃຕ້ກົດໝາຍທີ່ພົວພັນກັບວຽກງານເຊົ່າ, ສຳປະທານທີ່ດິນເພື່ອດຳເນີນກິດຈະການຕ່າງໆ.
  • ຊີ້ແຈງກ່ຽວກັບການຄຸ້ມຄອງ ແລະ ນໍາໃຊ້ ການມອບພັນທະດ້ານການເງິນຕາມສັນຍາ (ທຶນພັດທະນາທ້ອງຖິ່ນ, ທຶນພັດທະນາສັງຄົມ, ທຶນພັດທະນາຊຸມຊົນ);
  • ຊີ້ແຈງກ່ຽວກັບການຄຸ້ມຄອງ ແລະ ນໍາໃຊ້ ຕໍ່ກັບໂຄງການທີ່ມີສັນຍາໂຄງການ, ສັນຍາເຊົ່າ ແລະ ສຳປະທານທີ່ດິນ ແຕ່ບໍ່ມີການພັດທະນາ (ຈັບຈ່ອງໄວ້), ໂຄງການທີ່ໄດ້ພັດທະນາແຕ່ບໍ່ສອດຄ່ອງຕາມເປົ້າໝາຍ ຂອງເນື້ອໃນສັນຍາ.
  1. ພະແນກພະລັງງານ ແລະ ບໍ່ແຮ່ແຂວງ
  • ຊີ້ແຈງກ່ຽວກັບການ​ຈັດ​ສັນ​ອາ​ຊີບ​ຄົງ​ທີ່ ແລະ ຟື້ນ​ຟູ​ຊີ​ວິດ​ການ​ເປັນ​ຢູ່​ຂອງ​ພໍ່​ແມ່​ປະ​ຊາ​ຊົນ ພາຍຫຼັງ​ຖືກ​ຜົນ​ກະ​ທົບ​ຈາກໂຄງການກໍ່ສ້າງ​​ເຂື່ອນໄຟຟ້ານ້ຳອູ 5 ແລະ ນ້ຳອູ 6 ໃນໄລ​ຍະ​ທີ 1.
  1. ການຊົດເຊີຍຜົນກະທົບ ແລະ ການຈັດສັນອາຊີບຂອງສັງຄົມ (RMU)
  • ຊີ້ແຈງກ່ຽວກັບຄວາມຄືບໜ້າການຟື້ນຟູຊີວິດການເປັນຢູ່, ຊົດເຊີຍຜົນກະທົບ ແລະ ຈັດສັນອາຊີບຄົງທີ່ໃຫ້ກັບປະຊາຊົນຊົນທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານ້ຳອູ 4 ແລະ ນ້ຳອູ 7;
  • ຊີ້ແຈງກ່ຽວກັບການ​ຈັດ​ຕັ້ງ​ປະ​ຕິ​ບັດ​ງົບ​ປະ​ມານ​ຕາມ​ສັນ​ຍາ CA.
  1. ພະແນກອຸດສາຫະກຳ ແລະ ການຄ້າແຂວງ
  • ຊີ້ແຈງ ກ່ຽວກັບການຄຸ້ມຄອງລາຄາສິນຄ້າທີ່ຈຳເປັນໃຫ້ແກ່ການດຳລົງຊີວິດປະຈຳວັນ, ການດັດສົມລະຫວ່າງຄວາມຕ້ອງການ ແລະ ການສະໜອງ ແລະ ການສ້າງຄວາມສົມດຸນສິນຄ້ານໍາເຂົ້າ-ສົ່ງອອກ ເພື່ອບໍ່ໃຫ້ສິນຄ້າຂາດຕະຫຼາດ ແລະ ຂາດດຸນການຄ້າ;
  • ຊີ້ແຈງກ່ຽວກັບການກວດກາລາຄາສິນຄ້າຕາມທ້ອງຕະຫຼາດ ແລະ ຫ້າງຮ້ານທົ່ວໄປ ແລະ ປະຕິບັດມາດຕະການຕໍ່ຜູ້ທີ່ສວຍໂອກາດຂຶ້ນລາຄາສິນຄ້າ;
  • ຊີ້ແຈງກ່ຽວກັບ ລັດໄດ້ກຳນົດລາຄາຊື້-ຂາຍ ຢາງພາລາ ລະຫວ່າງຊາວສວນຢາງພາລາ ກັບບໍລິສັດ ໂດຍສະເພາະ​ຮູບ​ແບບ 2+3 ແລະ ປະ​ຊາ​ຊົນ​ລົງ​ມື​ປູກ​ເອງ​.

 

  1. ພະແນກກະສິກຳ ແລະ ປ່າໄມ້ແຂວງ
  • ຊີ້ແຈງກ່ຽວກັບ​ການ​ກວດກາ,​ ຈັດ​ສັນ ແລະ ການ​ຄຸ້ມ​ຄອງການ​ນຳ​ໃຊ້ປ່າ 3 ປະ​ເພດ​ ເພື່ອໃຫ້ສອດຄ່ອງກັບກົດໝາຍວ່າດ້ວຍປ່າໄມ້;
  • ຊີ້ແຈງກ່ຽວກັບການ​ນຳ​ໃຊ້​ເງິນ​ກູ້​ຢືມ​ຂອງ​ລັດທີ່​ນຳ​ເຂົ້າ​ໃນ​ກິດ​ຈະ​ກຳ​ ຂອງ​ສູນ ແລະ ສະຖານີກະສິກຳ ແລະ ການຝຶກອົບຮົມ, ນໍາໃຊ້ເຕັກນິກການປູກ, ການລ້ຽງ ບັນດາບ້ານເຂດເປົ້າໝາຍຂອງສູນ, ສະຖານີກະສີກໍາ;
  • ຊີ້ແຈງກ່ຽວກັບການສ້າງຕັ້ງ​ກຸ່ມການ​ຜະ​ລິດ ແລະ ສະໜອງ​ຂໍ້​ມູນ​ທາງ​ດ້ານ​ເຕັກ​ນິກ, ດ້ານ​ວິ​ຊາ​ການ​ໃຫ້ຊາວ​ກະ​ສີ​ກອນ.
  1. ພະແນກໂຍທາທິການ ແລະ ຂົນສົ່ງແຂວງ
  • ຊີ້ແຈງກ່ຽວກັບ ຄວາມຫຍຸ້ງຍາກດ້ານງົບປະມານ ແລະ ການ​ຈັດ​ຕັ້ງ​ການ​ຖາກ​ຖາງ​ເສັ້ນ​ທາງຫຼວງ​ແຫ່ງ​ຊາດ ແລະ ເສັ້​ນທາງຫຼວງ​ຂອງ​ແຂວງ ​ຕິດ​ພັນ​ກັບ​ການ​ຊຳລະ​ສະ​ສາງໜີ້ສິນຄຸມເຄືອ ຕໍ່ຜູ້ປະກອບການທຸລະກິດ.
  • ຊີ້ແຈງກ່ຽວກັບ ການ​ຊຸກຍູ້, ຄຸ້ມຄອງໃຫ້ບໍລິສັດ​ກໍ່ສ້າງ, ສາ​ເຫດ​ທີ່​ພາ​ໃຫ້​ໂຄງ​ການ​ດັ່ງກ່າວ​ບໍ່​​ໄດ້ຈັດ​ຕັ້ງ​ປະ​ຕິ​ບັດ​ຕາມ​ສັນ​ຍາ​ ຂອງ ໂຄງການ​ກໍ່​ສ້າງເສັ້ນ​​ທາງ​ປູ​ຢາງ 2 ຊັ້ນ ເລກ​ທີ 1202 ແຕ່​ເມືອງ​ບຸນ​ໃຕ້ແຂວງ​ຜົ້ງ​ສາ​ລີ ຫາ ເມືອງ​ນາ​ໝໍ້ແຂວງ​ອຸ​ດົມ​ໄຊ.
  1. ໂຄງການພັດທະນາເທດສະບານແຂວງ
  • ​ຊີ້ແຈງກ່ຽວກັບການຄຸ້ມຄອງ ແລະ ​ພັດ​ທະ​ນາກິດຈະກຳຂອງລັດຢູ່ເຂດ​ສະ​ຫງວນທີ່ດິນ 13 ຕອນດິນ ຕໍ່ກັບການວັດແທກຄືນ, ປັກຫຼັກໝາຍສະຫງວນທີ່ດິນຂອງລັດ, ການຂາຍສິດນໍາໃຊ້ທີ່ດິນໃຫ້ແກ່ບຸກຄົນ.
  • ຊີ້ແຈງກ່ຽວກັບການແກ້ໄຂຕໍ່ຄອບຄົວຜູ້ທີ່ລ່ວງລ້ຳເຂດສະຫງວນທີ່ດິນຂອງລັດ 13 ຕອນດິນ ທີ່ໄດ້ຈັບຈ່ອງປະດິນເປົ່າຫວ່າງ, ປູກສ້າງເຮືອນ ແລະ ກິດຈະກຳອື່ນໆ ຈຳນວນ 102 ຄອບຄົວ; ການຫັນກຳມະສິດທີ່ດິນຂອງລັດ ເປັນກຳມະສິດຂອງລັດວິສາຫະກິດ ແລະ ຂອງຫົວໜວຍທຸລະກິດ.
  1. ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ
    • ຊີ້ແຈ້ງການກ່ຽກັບ ຂໍ້ສະດວກ, ຂໍ້ຫຍຸ້ງຍາກ ຕໍ່ອອກສຳມະໂນທີ່ດິນ ແລະ ການອອກໃບຕາດິນແບບຖາວອນ (ຂອບທອງ) ເປັນລະບົບ ແລະ ການເຄື່ອນໄຫວປະຕິບັດສະເພາະຕອນທີ່ດິນບຸກຄົນສະເໜີເອງ;
    • ຊີ້ແຈງກ່ຽວກັບ ການຫັນທີ່ດິນເປັນທຶນ, ຕິດພັນກັບການຫັນປ່ຽນທີ່ດິນປ່າໄມ້ເປັນດິນຜະລິດ, ເປັນດິນປູກສ້າງ ແລະ ເປັນດິນອຸດສະຫະກຳ.
  2. ພະແນກຖະແຫຼງຂ່າວ, ວັດທະນະທຳແລະ ທ່ອງທ່ຽວແຂວງ
  • ຊີ້ແຈງກ່ຽວກັບ ສາເຫດທີ່ພາໃຫ້ບໍ່ບັນລຸ ແລະ ວິທີການແກ້ໄຂ 5 ຄາດໝາຍ ໃນການຈັດຕັ້ງປະຕິບັດ ຄາດໝາຍ SDGS (ການພັດທະນາແບບຍືນຍົງ) ຂອງພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ;
  • ຊີ້ແຈງກ່ຽວກັບສະພາບການບຸລະນະແຫຼ່ງທ່ອງທ່ຽວ, ການດຶງດູດນັກທ່ອງທ່ຽວເຂົ້າມາທ່ຽວແຂວງຜົ້ງສາລີ ແລະ ການສ້າງບ້ານວັດທະນະທໍາ.
  1. ພະແນກແຮງງານແລະ ສະຫວັດດີການສັງຄົມແຂວງ
  • ຊີ້ແຈງກ່ຽວກັບ ສາເຫດທີ່ພາໃຫ້ບໍ່ບັນລຸ ແລະ ວິທີການແກ້ໄຂ 5 ຄາດໝາຍ ໃນການຈັດຕັ້ງປະຕິບັດຄາດໝາຍ SDGS (ການພັດທະນາແບບຍຶນຍົງ) ຂອງຂະແໜງແຮງງານ ແລະ ສະຫວັດດີການ-ສັງຄົມ.
  • ຊີ້ແຈງກ່ຽວກັບສະພາບການຈັດຕັ້ງປະຕິບັດວຽກງານຂອງຈຸດບໍລິການ ຈັດຫາງານ;
  1. ພະແນກສາທາລະນະສຸກ ແຂວງ
  • ຊີ້ແຈງກ່ຽວກັບ ສາເຫດທີ່ພາໃຫ້ບໍ່ບັນລຸ ແລະ ວິທີການແກ້ໄຂ 10 ຄາດໝາຍ ໃນການຈັດຕັ້ງປະຕິບັດ ຄາດໝາຍ SDGS (ການພັດທະນາແບບຍືນຍົງ) ຂອງຂະແໜງສາທາລະນະສຸກ.
  • ຊີ້ແຈງກ່ຽວກັບຂໍສະດວກ, ຂໍຫຍຸງຍາກ ແລະ ວິທີການແກ້ໄຂ ຕໍ່ກັບການປັບປຸງຄຸນນະພາບຂອງການບໍລິການ, ການປິ່ນປົວ ຕາມນະໂຍບາຍ 5 ດີ, 1 ພໍໃຈ ແລະ ການສະໜອງອຸປະກອນການແພດທີ່ພຽງພໍໃຫ້ແກ່ໂຮງໝໍນ້ອຍ ຮອດໂຮງໝໍແຂວງ.
  1. ກອງບັນຊາການ ປກສ ແຂວງ;
    • ຊີ້ແຈງກ່ຽວກັບ ປະກົດການຫຍໍ້ທໍ້ຂອງສັງຄົມໃນທົ່ວແຂວງຜົ້ງສາລີ ແລະ ວິທີແກ້ໄຂ ບັນຫາຄົນເຂົ້າເມືອງ ຜິດກົດໝາຍ.
  2. ກອງບັນຊາການທະຫານ ແຂວງ
    • ຊີ້ແຈງກ່ຽວກັບ ການຈັດຕັ້ງປະຕິບັດ ແລະ ວິທີການແກ້ໄຂ ການປັບປຸງກົງຈັກການຈັດຕັ້ງ ແລະ ການເຄື່ອນໄຫວປະຕິບັດໜ້າທີ່ຂອງກຳລັງກອງຫຼອນຢູ່ຂັ້ນຮາກຖານ.
  3. ພະແນກ ຍຸຕິທໍາ ແຂວງ

ຊີ້ແຈງກ່ຽວກັບ ການຈັດຕັ້ງປະຕິບັດ, ຂໍ້ສະດວກ, ຂໍ້ຫຍຸ້ງຍາກ ແລະ ມີວິທີການແກ້ໄຂ ຕໍ່ກັບຜົນການຈັດຕັ້ງປະຕິບັດຄໍາຕັດສິນຂອງສານ ທີ່ໃຊ້ໄດ້ຢ່າງເດັດຂາດ ກ່ຽວກັບການຄຸ້ມຄອງ, ການນໍາໃຊ້ຊັບສິນ (ນັບທັງພາຫະນະ) ທີ່ສານຕັດສິນຮີບເປັນຂອງລັດ.

ບັນດາທ່ານທີ່ນັບຖື ແລະ ຮັກແພງ!

ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສໍາຄັນທີ່ກ່າວມາຂ້າງເທິງນັ້ນ, ໃນຊ່ວງໄລຍະດໍາເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ມີປະຊາຊົນສົ່ງຄໍາຄິດຄໍາສະເໜີຜ່ານໂທລະສັບສາຍດ່ວນ ທັງໝົດ 8 ສາຍ, ມາຍັງກອງປະຊຸມ. ຊຶ່ງເນື້ອໃນຄໍາສະເໜີດັ່ງກ່າວ ພົວພັນເຖິງການຄຸ້ມຄອງບໍລິຫານລັດຂອງແຂວງ, ເສດຖະກິດ-ສັງຄົມຂອງແຂວງ, ການພັດທະນາທີ່ມີຜົນກະທົບຕໍ່ສັງຄົມ ແລະ ສິ່ງແວດລ້ອມ ຕໍ່ກັບຄໍາຄິດຄໍາເຫັນຂອງປະຊາຊົນທີ່ສົ່ງມາທາງ ໂທລະສັບສາຍດ່ວນ ດັ່ງກ່າວ ກອງເລຂາກອງປະຊຸມໄດ້ສັງລວມ, ລາຍງານໃຫ້ຄະນະປະຊາຊົນສະພາປະຊາຊົນແຂວງ ແລະ ມອບໃຫ້ບັນດາຄະນະກໍາມະການຂອງສະພາປະຊາຊົນແຂວງ ປະສານສົມທົບກັບພາກສ່ວນທີ່ກ່ຽວຂ້ອງ ຄົ້ນຄວ້າແກ້ໄຂໃຫ້ຖືກຕ້ອງ, ສອດຄ່ອງຕາມກົດໝາຍ ແລະ ລະບຽບການ.

ອີກເທື່ອໜຶ່ງຕາງໜ້າຄະນະປະຈໍາສະພາປະຊາຊົນແຂວງ ຂ້າພະເຈົ້າ ຂໍຂອບໃຈມາຍັງ ບັນດາທ່ານ ການນໍາພັກ-ລັດທຸກຂັ້ນ, ພະນັກງານ-ລັດຖະກອນ, ທະຫານ, ຕໍາຫຼວດ, ນັກຮຽນ, ນັກສຶກສາ-ປັນຍາຊົນ, ນັກທຸລະກິດ, ຊາວຜູ້ອອກແຮງານ ແລະ ພໍ່ແມ່ພີ່ນ້ອງປະຊາຊົນບັນດາເຜົ່າ ໃນທົ່ວແຂວງ ທີ່ໄດ້ຕິດຕາມກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ໃນຄັ້ງນີ້.

ຂໍຂອບໃຈ ແລະ ຊົມເຊີຍຢ່າງຈິງໃຈມາຍັງນັກຂ່າວຂອງພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ນັກຂ່າວ ກອງບັນຊາການປ້ອງກັນຄວາມສະຫງົບແຂວງ ທີ່ໄດ້ຕິດຕາມຢ່າງໃກ້ຊິດ ເພື່ອເກັບກໍາຂໍ້ມູນ-ຂ່າວສານ ແລະ ເຜີຍແຜ່ຢ່າງທັນການກ່ຽວກັບການດໍາເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ໃຫ້ແກ່ສັງຄົມຮັບຊາບຢ່າງທົ່ວເຖີງ.

ຂໍຂອບໃຈ

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ