ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າຂອງວັນສຸກ, ວັນທີ 12 ສິງຫາ 2022, ຢູ່ທີ່ຫ້ອງສະຕູດີໂອສະຖານີວິທະຍຸ-ໂທລະພາບແຂວງ ທ່ານນາງ ວັນສີ ພວງມະໄລ ກໍາມະການປະຈໍາສະພາປະຊາຊົນແຂວງ, ເລຂາທິການສະພາປະຊາຊົນແຂວງ, ຕາງໜ້າຄະນະປະຈຳສະພາປະຊາຊົນແຂວງ ໄດ້ຖະແຫຼງຕໍ່ສື່ມ່ວນຊົນຂອງແຂວງກ່ຽວກັບຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ວ່າ: ຂ້າພະເຈົ້າມີຄວາມຍິນດີ ແລະ ຂໍຖືເປັນກຽດຢ່າງສູງ ແຈ້ງມາຍັງບັນດາທ່ານການນໍາພັກ-ລັດ, ພະນັກງານ-ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່-ແມ່ພີ່ນ້ອງປະຊາຊົນບັນດາເຜົ່າໃນທົ່ວແຂວງອຸດົມໄຊຮັບຊາບ ກ່ຽວກັບຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II.
ກອງປະຊຸມໄດ້ໄຂຂຶ້ນຢ່າງເປັນທາງການໃນລະຫວ່າງວັນທີ 09-10 ສິງຫາ 2022 ໃຊ້ເວລາ 2 ວັນ, ຢູ່ທີ່ສະໂມສອນແຂວງ. ໂດຍການເປັນປະທານຂອງທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ. ມີຄະນະສະມະຊິກສະພາແຫ່ງຊາດປະຈຳເຂດເລືອກຕັ້ງທີ່ 04 ແຂວງອຸດົມໄຊ, ຄະນະປະຈຳສະພາປະຊາຊົນແຂວງ, ການນຳແຂວງ, ແຂກເຊີນ ແລະ ສະມະຊິກສະພາປະຊາຊົນແຂວງປະຈໍເຂດເລືອກຕັ້ງ 7 ເມືອງ ເຂົ້າຮ່ວມ ທັງໝົດ 138 ທ່ານ, ຍິງ 28 ທ່ານ. ໃນນີ້ສະມະຊິກສະພາປະຊາຊົນແຂວງ 29 ທ່ານ, ຍິງ 10 ທ່ານ.
ກອງປະຊຸມດຳເນີນດ້ວຍບັນຍາກາດແຫ່ງການເສີມຂະຫຍາຍສິດປະຊາທິປະໄຕ ຂອງບັນດາທ່ານສະມາຊິກສະພາປະຊາຊົນແຂວງ ໃນການພິຈາລະນາ ແລະ ຮັບຮອງເອົາບັນດາເນື້ອໃນສໍາຄັນພື້ນຖານຂອງແຂວງ ທີ່ນໍາມາພິຈາລະນາໃນກອງປະຊຸມຄັ້ງນີ້ ໂດຍໄດ້ອອກເປັນມະຕິດັ່ງນີ້:
1. ມະຕິ ກອງປະຊຸມສະພາປະຊາຊົນແຂວງ ວ່າດ້ວຍ ການຮັບຮອງເອົາບົດລາຍງານການຈັດຕັ້ງປະຕິບັດແຜນພັດທະນາເສດຖະກິດສັງຄົມ, ແຜນງົບປະມານແຫ່ງລັດປະຈຳ 06 ເດືອນຕົ້ນປີ ແລະ ທິດທາງແຜນການປະຈໍາ 06 ເດືອນທ້າຍປີ 2022 ຕິດພັນກັບການຈັດຕັ້ງປະຕິບັດວາລະແຫ່ງຊາດວ່າດ້ວຍ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ;
2. ມະຕິ ວ່າດ້ວຍ ການຮັບຮອງເອົາບົດລາຍງານ ຂອງຄະນະປະຈຳສະພາປະຊາຊົນແຂວງ ກ່ຽວກັບການເຄື່ອນໄຫວວຽກງານ ຂອງສະພາປະຊາຊົນແຂວງ ນັບແຕ່ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງ ຊຸດທີ II ຫາກອງປະຊຸມສະໄມສາມັນເທື່ອທີ 3 ແລະ ແຕ່ນີ້ຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ;
3. ມະຕິ ວ່າດ້ວຍ ການພິຈາລະນາ, ຮັບຮອງເອົາຮ່າງຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການຄຸ້ມຄອງຈັດງານປະເພນີຕ່າງໆຢູ່ແຂວງອຸດົມໄຊ(ສະບັບສ້າງໃໝ່);
4. ມະຕິ ວ່າດ້ວຍ ການພິຈາລະນາ, ຮັບຮອງເອົາຂໍ້ຕົກລົງຂອງທ່ານເຈົ້າແຂວງວ່າດ້ວຍ ການປະເມີນລາຄາທີ່ດິນໃນທົ່ວແຂວງອຸດົມໄຊ(ປັບປຸງຄືນ ສະບັບເລກທີ 506/ຈຂ.ອຊ, ລົງວັນທີ 19 ພຶດສະພາ 2020).
ການພິຈາລະນາຮັບຮອງເອົາບັນດາຂໍ້ຕົກລົງດັ່ງກ່າວ ເປັນການສືບຕໍ່ຈັດຕັ້ງປະຕິບັດແຜນການສ້າງ ແລະ ປັບປຸງນິຕິກໍາ 5 ປີຂອງສະພາປະຊາຊົນແຂວງ ຊຸດທີ II; ຊຶ່ງເປັນການສືບຕໍ່ຫັນປ່ຽນຢ່າງແຂງແຮງ ແລະ ຮອບດ້ານ ໃນການສ້າງລັດທີ່ປົກຄອງດ້ວຍກົດໝາຍ ແລະ ນິຕິກໍາ ໃຫ້ເປັນຮູບປະທໍາ, ເຂົ້າສູ່ວຽກງານຕົວຈິງເທື່ອລະກ້າວ, ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍນັບມື້ເປັນລະບົບຄົບຊຸດ ແລະ ມີປະສິດທິຜົນຢ່າງແທ້ຈິງ;
ພ້ອມກັນນັ້ນໄດ້ສະເໜີໃຫ້ພາກສ່ວນກ່ຽວຂ້ອງຂື້ນຊີ້ແຈງ ຕໍ່ກັບຄໍາຊັກຖາມຂອງສະມາຊິກສະພາປະຊາຊົນແຂວງ ກ່ຽວກັບບັນຫາທີ່ພົ້ນເດັ່ນຢູ່ພາຍໃນແຂວງ. ກອງປະຊຸມຍັງໄດ້ຮັບຟັງການປະກອບຄຳເຫັນຂອງທ່ານເຈົ້າແຂວງ ຊຶ່ງໄດ້ສັງລວມຄືນບັນດາຄຳຊັກຖາມຂອງສະມາຊິກສະພາປະຊາຊົນແຂວງ ແລະ ການຕອບຄຳຊັກຖາມຂອງບັນດາອົງການທີ່ກ່ຽວຂ້ອງເພື່ອເປັນທິດໃນການຈັດຕັ້ງປະຕິບັດວຽກງານຂອງອົງການປົກຄອງແຂວງໃນຕໍ່ໜ້າ;
ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສຳຄັນດັ່ງກ່າວມາຂ້າງເທິງນັ້ນ, ຕະຫຼອດໃນໄລຍະດຳເນີນກອງປະຊຸມ ໄດ້ຮັບຄໍາຄິດເຫັນ ແລະ ຄໍາສະເໜີຂອງປະຊາຊົນບັນດາເຜົ່າ ຜ່ານໂທລະສັບສາຍດ່ວນ (081 156) ທັງໝົດ 11 ບັນຫາ, ໃນນີ້ຂົງເຂດເສດຖະກິດ 9 ບັນຫາ, ຂົງເຂດວັດທະນະທຳ-ສັງຄົມ ແລະ ບັນດາເຜົ່າ 1 ບັນຫາ ແລະ ຂົງເຂດ ຍຸຕິທຳ, ປກຊ-ປກສ 1 ບັນຫາ. ຕໍ່ກັບຄໍາຄິດເຫັນດັ່ງກ່າວຄະນະປະຈຳສະພາປະຊາຊົນແຂວງ ຈະໄດ້ຈັດກອງປະຊຸມຄົ້ນຄວ້າປຶກສາຫາລືຢ່າງຮີບດ່ວນເພື່ອສັງລວມ ແລະ ມອບໃຫ້ຄະນະກໍາມະການ ສະເໜີຕໍ່ພາກສ່ວນກ່ຽວຂ້ອງຄົ້ນຄ້ວາພິຈາລະນາ ແລະ ແຈ້ງຕອບໃຫ້ພາກສ່ວນກ່ຽວຂ້ອງ ໃຫ້ຖືກຕ້ອງຕາມກົດໝາຍ ແລະ ລະບຽບການ.
ອີກເທື່ອໜຶ່ງ ຕາງໜ້າໃຫ້ຄະນະປະຈຳສະພາປະຊາຊົນແຂວງ, ຂໍຂອບໃຈມາຍັງບັນດາທ່ານການນໍາແຂວງ, ພະນັກງານລັດຖະກອນ, ທະຫານ-ຕໍາຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ ແລະ ພໍ່ແມ່ປະຊາຊົນບັນດາເຜົ່າໃນທົ່ວແຂວງອຸດົມໄຊ ທີ່ຕິດຕາມການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງອຸດົມໄຊ ຊຸດທີ II ຄັ້ງນີ້, ຂໍສະແດງຄວາມຂອບໃຈ ແລະ ຊົມເຊີຍຢ່າງຈິງໃຈມາຍັງສື່ມ່ວນຊົນຂອງແຂວງ ທີ່ໄດ້ຕິດຕາມຢ່າງໃກ້ຊິດເພື່ອເກັບກໍາຂ່າວ ແລະ ເຜີຍແຜ່ຢ່າງທັນການກ່ຽວກັບການດໍາເນີນກອງປະຊຸມໃນຄັ້ງນີ້ໃຫ້ແກ່ສັງຄົມໄດ້ຮັບຊາບຢ່າງທົ່ວເຖິງ ແລະ ຂໍຂອບໃຈມາຍັງກຳລັງ ປກຊ-ປກສ, ແພດໝໍ, ບຸກຄົນ, ນິຕິບຸກຄົນ ແລະ ການຈັດຕັ້ງທຸກຂັ້ນ ທີ່ໄດ້ໃຫ້ການກອບສ່ວນ ແລະ ສະນັບສະໜູນກອງປະຊຸມສຳເລັດລົງຢ່າງຈົບງາມ.
ພາບ/ຂ່າວ: ແສງພອນ ອິນນະລົງ.