ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນ​ວັນ​ທີ 5 ສິງ​ຫ​າ 2022 ຢູ່​ທີ​ພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ​ແຂວງ ທ່ານ ນາງ ສາຍ​ພູເງິນ ອຸດົມສຸກ ຄະນະປະຈໍາ-​ເລ​ຂາ​ທິ​ການສະພາປະຊາຊົນແຂວງ ​ໄດ້ຖະ​ແຫຼງ​ຂ່າວ​ຜົນ​ສຳ​ເລັດ​ກອງ​ປະ​ຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II  ເພື່ອແຈ້ງມາຍັງບັນດາທ່ານພະນັກງານລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ກໍາມະກອນຊາວຜູ້ອອກແຮງງານ, ພໍ່ແມ່ພີ່ນ້ອງປະຊາຊົນບັນດາເຜົ່າໃນທົ່ວແຂວງຊຽງຂວາງ ໄດ້ຮັບຊາບ ກ່ຽວ​ກັບຜົນ​ສໍາ​ເລັດ​ຂອງ​ການດໍາ​ເນີນ​ກອງ​ປະຊຸມ​ສະ​ໄໝ​ສາມັນ ​ເທື່ອ​ທີ 3  ຂອງ​ສະພາ​​ປະຊາຊົນ​ແຂວງ ຊຸດ​ທີ II  ມີດັ່ງນີ້:

ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ໄດ້ໄຂຂຶ້ນໃນວັນທີ 2 ສິງຫາ 2022 ແລະ ສໍາເລັດໃນວັນທີ 4 ສິງຫາ 2022, ຊຶ່ງໄດ້ດໍາເນີນເປັນເວລາ 3 ວັນ, ຢູ່ທີ່ຫ້ອງປະຊຸມຫ້ອງວ່າການແຂວງ, ໂດຍພາຍໃຕ້ການຊີ້ນໍາ-ນໍາພາຂອງຄະນະປະທານສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ, ຄະນະປະຈໍາພັກແຂວງ ແລະ  ການສຸມເຫື່ອແຮງ, ສະຕິປັນຍາ ດ້ວຍຄວາມຮັບຜິດຊອບສູງ ຂອງບັນດາທ່ານສະມາຊິກສະພາປະຊາຊົນແຂວງ ຊຸດທີ 2 , ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 9 ແລະ ການປະສານສົມທົບຂອງອົງການປົກຄອງແຂວງ, ອົງການຈັດຕັ້ງພັກ-ລັດ, ແລະ ທຸກພາກສ່ວນກ່ຽວຂ້ອງ ຕາມພາລະບົດບາດຂອງຕົນເຂົ້າໃນການກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຊຸດທີ 2 ເຮັດໃຫ້ການພິຈາລະນາ ແລະ ຮັບຮອງເອົາບັນຫາສຳຄັນພື້ນຖານຂອງແຂວງ ໄດ້ຮັບຜົນສຳເລັດຕາມລະດັບຄາດໝາຍທີ່ວາງໄວ້

ໃນກອງປະຊຸມຄັ້ງນີ້ ນອກຈາກການເຂົ້າຮ່ວມຂອງສະມາຊິກສະພາປະຊາຊົນແຂວງ, ສະມາຊິກສະພາແຫ່ງຊາດປະ​ຈໍາ​ເຂດ​ເລືອກ​ຕັ້ງ ແລ້ວ ຍັງມີທ່ານເຈົ້າແຂວງ, ບັນດາທ່ານຄະນະ​ປະ​ຈໍາ​ພັກ​ແຂວງ, ກໍາມ​ະກາ​ນພັກ​ແຂວງ, ທ່ານ​ເຈົ້າ​​ເມືອງ, ຫົວໜ້າ-ຮອງ​ຫົວໜ້າພະ​ແນ​ກການ,ອົງການລັດທຽບເທົ່າຂັ້ນ​ແຂວງ, ພາກທຸລະກິດ, ອະດີດພະນັກງານອາວຸໂສບໍານານ ແລະ ພາກສ່ວນກ່ຽວຂ້ອງ ເຂົ້າຮ່ວມ ຈໍານວນ  170 ທ່ານ , ຍິງ 38 ທ່ານ;ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຊຸດທີ II  ໄດ້ພິຈາລະນາຮັບຮອງບັນຫາສໍາຄັນ ພື້ນຖານຂອງແຂວງ ຊຶ່ງລວມມີ 4 ມະຕິຄືດັ່ງນີ້:

  • ມະຕິກອງປະຊຸມສະພາປະຊາຊົນແຂວງວ່າດ້ວຍການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນການລົງທຶນຂອງລັດ ໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022;
  • ມະຕິກອງປະຊຸມສະພາປະຊາຊົນແຂວງວ່າດ້ວຍການຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022;
  • ມະຕິກອງປະຊຸມສະພາປະຊາຊົນແຂວງວ່າດ້ວຍການຮັບຮອງເອົາບົດລາຍງານການຈັດຕັ້ງປະຕິບັດແຜນການທ່ອງທ່ຽວຕິດພັນກັບການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19;
  • ມະຕິກອງປະຊຸມສະພາປະຊາຊົນແຂວງວ່າດ້ວຍການຮັບຮອງເອົາບົດລາຍງານຂອງຄະນະປະຈໍາສະພາປະຊາຊົນແຂວງ ກ່ຽວກັບການເຄື່ອນໄຫວວຽກງານ ໃນໄລຍະແຕ່ກອງປະຊຸມສະໄໝສາມັນເທື່ອທີ2 ຫາກອງປະຊຸມສະໄໝສາມັນເທື່ອທີ 3 ແລະ ແຜນການຮອດກອງປະຊຸມສະໄໝສາມັນເທື່ອ 4.

ນອກ​ນີ້, ຍັງ​ໄດ້ພິຈາລະນາ ແລະ ​ຮັບຮອງ​ເອົາການສະເໜີ(ຮ່າງ)​ຂໍ້​ຕົກລົງຂອງທ່ານເຈົ້າແຂວງ ວ່າດ້ວຍການສົ່ງເສີມ, ຄຸ້ມຄອງການລົງທຶນພາຍໃນ ແລະ ຕ່າງປະເທດ;

ພ້ອມດຽວກັນນີ້, ກອງປະຊຸມ ຍັງໄດ້ຮັບຟັງການອະທິບາຍຊີ້ແຈງ ຈາກທ່ານເຈົ້າແຂວງ, ທ່ານຮອງເຈົ້າແຂວງ, ທ່ານຫົວໜ້າ, ຮອງຫົວໜ້າພະແນກການ ແລະ ພາກສ່ວນກ່ຽວຂ້ອງ ຕໍ່ຄຳຊັກຖາມ ຂອງບັນດາທ່ານ ສະມາຊິກສະພາແຫ່ງຊາດປະຈຳເຂດເລືອກຕັ້ງ  ແລະ ສະມາຊິກສະພາປະຊາຊົນແຂວງໄດ້ຍົກຂຶ້ນໃນກອງປະຊຸມ.

ນອກນີ້, ໃນໄລຍະດຳເນີນກອງປະຊຸມ ໄດ້ມີປະຊາຊົນບັນດາເຜົ່າ ສົ່ງຄຳຄິດຄຳເຫັນ​​ມາເຖິງກອງ​ປະຊຸມ​ກ່ຽວກັບວຽກງານຕ່າງໆຂອງແຂວງການພັດທະນາເສດຖະກິດ-ສັງຄົມ ທີ່ມີຜົນກະທົບຕໍ່ສັງຄົມ ແລະ ສິ່ງແວດລ້ອມພາຍໃນແຂວງ; ຕໍ່ກັບຄໍາຄິດດັ່ງກ່າວນັ້ນ; ກອງເລຂາຂອງກອງປະຊຸມໄດ້ສັງລວມ ແລະ ມອບໃຫ້ຄະນະ​ກໍາມະການຂອງສະພາປະຊາຊົນແຂວງ ເພື່ອປະສານສົມທົບພາກສ່ວນກ່ຽວຂ້ອງ ຄົ້ນຄວ້າແກ້ໄຂຄໍາສະເໜີດັ່ງກ່າວໃຫ້ຖືກຕ້ອງສອດຄ່ອງ ຕາມລະບຽບກົດໝາຍ ແລະ ສົ່ງຜົນການແກ້ໄຂໃຫ້ທັນເວລາ.

ຕາງໜ້າຄະນະປະຈຳສະພາປະຊາຊົນແຂວງ, ຂ້າພະເຈົ້າ ຂໍຂອບໃຈມາຍັງບັນດາທ່ານເຈົ້າແຂວງ, ຮອງເຈົ້າແຂວງ ຫົວໜ້າ-ຮອງຫົວໜ້າພະແນກການ, ອົງການລັດທຽບເທົ່າຂັ້ນແຂວງ, ອົງການຈັດຕັ້ງມະຫາຊົນ, ພະນັກງານອາວຸໂສບໍານານ ແລະ ພາກສ່ວນກ່ຽວຂ້ອງ ທີ່ໄດ້ເຂົ້າຮ່ວມກອງປະຊຸມຈົນສໍາເລັດ;

ຂໍຂອບໃຈມາຍັງບັນດາທ່ານການນໍາພັກ-ລັດທຸກຂັ້ນ, ພະນັກງານ-ລັດຖະກອນ,ພະນັກງານ-ອາວຸໂສບໍານານ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນຊາວຜູ້ອອກແຮງງານ, ພໍ່ແມ່ພີ່ນ້ອງປະຊາຊົນບັນດາເຜົ່າ ​ໃນທົ່ວ​ແຂວງ​ຊຽງຂວາງ ທີ່ໄດ້ຕິດຕາມ ແລະ ສະໜັບສະໜູນການດຳເນີນກອງປະຊຸມ  ສະໄໝສາມັນເທື່ອທີ 3 ຂອງ​ສະພາ​ປະຊາຊົນ ຊຸດທີ II  ຄັ້ງນີ້ໃຫ້ມີຜົນສໍາເລັດຕາມລະດັບຄາດໝາຍ.

​ສະ​ພາ​ປະ​ຊາ​ຊົນ​ແຂວງ​ຊຽງ​ຂວາງ

ຂ່າວ​ໂດຍ: ນາງ ສຸກ​ສະ​ຫວັນ ອິນ​ທະ​ແສງ