ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນ​ວັນ​ທີ 28 ກໍລະກົດ 2022 ຢູ່​ທີ່​ພະ​ແນ​ກ​​​ຖະ​ແຫຼງຂ່າວ, ວັດທະນະ​ທໍາ ​ແລະ ທ່ອງ​ທ່ຽວ​ແຂວງ ທ່ານ ນາງ ສາຍພູເງິນ ອຸດົມສຸກ ຄະນະປະຈໍາ-​ເລຂາທິການ​ສະພາປະຊາຊົນແຂວງ  ​ໄດ້​ຖະ​ແຫຼງຂ່າວ​ກ່ຽວກັບການກະກຽມຄວາມພ້ອມດ້ານຕ່າງໆ ຂອງກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II.

ໂດຍປະຕິບັດພາລະບົດບາດ, ສິດ ແລະ ໜ້າທີ່ ຂອງຄະນະປະຈໍາສະພາປະຊາຊົນແຂວງ ຕາມທີ່ໄດ້ກໍານົດໄວ້ໃນມາດຕາ60ຂອງກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍສະພາແຫ່ງຊາດ ແລະ ກົດໝາຍວ່າດ້ວຍສະພາປະຊາຊົນແຂວງ ສະບັບເລກທີ 82/ສພຊ, ລົງວັນທີ 30 ມິຖຸນາ 2020 ແລະ ປະຕິບັດຕາມມະຕິຂອງຄະນະປະຈໍາສະພາປະຊາຊົນແຂວງ ສະບັບເລກທີ 92/ຄປຈ, ລົງວັນທີ 26 ກໍລະກົດ 2022 ວ່າດ້ວຍການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຊຸດທີ II.

ດັ່ງນັ້ນ, ຂ້າພະເຈົ້າເລຂາທິການສະພາປະຊາຊົນແຂວງ, ຕາງໜ້າໃຫ້ຄະນະປະຈໍາສະພາປະຊາຊົນແຂວງ ມີຄວາມຍິນດີ ແລະ ຂໍຖືເປັນກຽດຢ່າງສູງແຈ້ງມາຍັງບັນດາທ່ານການນໍາຂັ້ນຕ່າງໆຂອງແຂວງ, ພະນັກງານ-ລັດຖະກອນ, ທະຫານ, ຕໍາຫຼວດ,ນັກຮຽນ, ນັກສຶກສາ, ປັນຍາຊົນ, ກໍາມະກອນຊາວຜູ້ອອກແຮງງານ, ພໍ່ແມ່ພີ່ນ້ອງປະຊາຊົນບັນດາເຜົ່າໃນທົ່ວແຂວງຊຽງຂວາງ ໄດ້ຮັບຊາບກ່ຽວກັບການດໍາເນີນກອງປະຊຸມສະໄໝສາມັນເທື່ອທີ3 ຂອງສະພາປະຊາຊົນແຂວງ ຊຸດທີ II ດັ່ງນີ້:

ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຊຸດທີ II ຈະໄດ້ໄຂຂຶ້ນໃນຕອນເຊົ້າຂອງວັນ ອັງຄານວັນທີ 2-4ສິງຫາ ປີ2022 ຊຶ່ງຈະໄດ້ດໍາເນີນກອງປະຊຸມເປັນເວລາ 3 ວັນ, ຢູ່ທີ່ ຫ້ອງປະຊຸມໃຫຍ່ ຫ້ອງວ່າການແຂວງ; ກອງປະຊຸມຄັ້ງນີ້ຈະໄດ້ພິຈາລະນາ ແລະ ຮັບຮອງບັນຫາສໍາຄັນພື້ນຖານຂອງແຂວງ ເຊິ່ງສັງລວມ ມີວຽກຕົ້ນຕໍຄືດັ່ງນີ້;

  1. ວຽກງານຂອງອົງການປົກຄອງແຂວງ.
  • ຮັບຟັງການລາຍ​ງານ​ໂດຍ​ສັງ​ເຂ​ບຂອງ​ທ່ານ​ເຈົ້າ​ແຂວງກ່ຽວ​ກັບ​ສະພາບ​ພົ້ນ​ເດັ່ນ​ໃນ​ການຈັດ​ຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມຂອງແຂວງ ໄລຍະ 6 ເດືອນ ຕົ້ນປີ ແລະ ທິດທາງແຜນການ 6 ເດືອນທ້າຍປີ2022;
  • ຮັບຟັງການລາຍງານຂອງພະແນກແຜນການແລະການລົງທຶນແຂວງ ກ່ຽວກັບການຈັດຕັ້ງປະຕິບັດແຜນການລົງທຶນຂອງລັດ6 ເດືອນຕົ້ນປີແລະທິດທາງແຜນການ6 ເດືອນທ້າຍປີ2022;
  • ຮັບຟັງການລາຍງານຂອງພະແນກການເງິນແຂວງກ່ຽວກັບ ການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ6 ເດືອນຕົ້ນປີແລະທິດທາງແຜນການ6 ເດືອນທ້າຍປີ2022;
  • ຮັບຟັງການລາຍງານຂອງພະແນກສຶກສາທິການ ແລະ ກິລາແຂວງ ແລະ ພະແນກສາທາລະນະສຸກແຂວງ ກ່ຽວກັບການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ( SDGs);
  • ຮັບຟັງການລາຍງານຂອງພະແນກຖະແຫຼງຂ່າວ, ວັດທະນະທໍາ ແລະ ການທ່ອງທ່ຽວແຂວງກ່ຽວກັບການຈັດຕັ້ງປະຕິບັດແຜນການທ່ອງທ່ຽວ ແລະ ການເປີດປະເທດຕິດພັນກັບການປ້ອງກັນ ແລະຮັບມືການແຜ່ລະບາດຂອງພະຍາດໂຄວິດ19;
  • ຮັບຟັງການ​ລາຍ​ງານຂອງພາກສ່ວນກ່ຽວຂ້ອງກ່ຽວກັບຄວາມ​ຄືບ​ໜ້າ​ໃນ​ການຈັດ​ຕັ້ງ​ປະຕິບັດວາລະ​ແຫ່ງ​ຊາດວ່າ​ດ້ວຍການ​ແກ້​ໄຂ​ຄວາມ​ຫຍຸ້ງຍາກ​ທາງ​ດ້ານ​ເສດຖະກິດ-ການ​ເງິນ ແລະ ການແກ້ໄຂບັນຫາຢາເສບຕິດ;
  • ຮັບຟັງການລາຍງານຂອງພະແນກພາຍໃນແຂວງ ກ່ຽວກັບວຽກ​ງານ​ການ​ປັບປຸງ​ກົງຈັກ​ການຈັດ​ຕັ້ງ​ຂອງ​ອົງການ​ປົກຄອງ​ແຂວງ;
  • ຮັບຟັງການ​ລາຍ​ງານການ​ກະກຽມຄວາມພ້ອມເປັນເຈົ້າພາບງານມະຫາກຳກິລາແຫ່ງຊາດຄັ້ງທີXIຂອງແຂວງ;
  1. ວຽກງານສ້າງນິຕິກໍາໃຕ້ກົດໝາຍ

ຮັບຟັງການສະເໜີ ແລະ ພິຈາລະນາຮັບຮອງເອົານິຕິກໍາໃຕ້ກົດໝາຍ 1 ສະບັບຄື: ຂໍ້ຕົກລົງວ່າດ້ວຍການສົ່ງເສີມ,ຄຸ້ມຄອງການລົງທຶນ ພາຍໃນ ແລະ ຕ່າງປະເທດ.

  1. ວຽກງານຂອງສະພາປະຊາຊົນແຂວງ
  • ຮັບຟັງການລາຍງານ ແລະ ພິຈາລະນາຮັບຮອງເອົາບົດລາຍງານຂອງຄະນະປະຈໍາສະພາປະຊາຊົນແຂວງ ກ່ຽວກັບການເຄື່ອນໄຫວວຽກງານໃນແຕ່ໄລຍະກອງປະຊຸມສະໄໝສາມັນເທື່ອທີ2 ຫາ ກອງປະຊຸມສະໄໝສາມັນເທື່ອທີ3 ແລະ ທິດທາງແຜນການກອງປະຊຸມສະໄໝສາມັນເທື່ອທີ4 ຂອງສະພາປະຊາຊົນແຂວງ.

  ນອກນີ້, ພວກເຮົາຍັງຈະໄດ້ຮັບຟັງການປະກອບຄໍາເຫັນຂອງຄະນະປະຈໍາສະພາປະຊາຊົນແຂວງຕໍ່ບັນດາບົດລາຍງານຂອງອົງການປົກຄອງແຂວງ ແລະ ກອງປະຊຸມຍັງຈະໄດ້ຮັບຟັງອົງການ​ປົກຄອງ​ແຂວງ, ພະ​ແນ​ກການກ່ຽວຂ້ອງ​ ຊີ້ແຈງ​ຕາມ​ຄໍາ​​ເຈາະຈີ້ມຂອງຄະນະປະຈໍາສະພາປະຊາຊົນແຂວງ, ການປະກອບຄໍາເຫັນ, ຄໍາຊັກຖາມຂອງສະມາຊິກສະພາແຫ່ງຊາດປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ.

  1. ບັນດາມະຕິກອງປະຊຸມ

ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຊຸດທີIIຈະໄດ້ຮັບຮອງ 4 ມະຕິມີຄືດັ່ງນີ້:

  1. ພິຈາລະນາ ​ແລະຮັບຮອງ​ເອົາບົດສະຫຼຸບລາຍງານການຈັດ​ຕັ້ງປະຕິບັດ​ແຜນ​ພັດທະນາ​ເສດຖະກິດ-ສັງຄົມ, ແຜນການ​ລົງ​ທຶນ 6 ​ເດືອນ​ຕົ້ນປີ​ ​ແລະທິດ​ທາງ​ແຜນການ 6 ​ເດືອນ​ທ້າຍ​ປີ 2022;
  2. ພິຈາລະນາ ​ແລະຮັບຮອງ​ເອົາບົດສະຫຼຸບລາຍງານການຈັດ​ຕັ້ງປະຕິບັດ​ແຜນ​ງົບປະມານ​ແຫ່ງ​ລັດ​ຂອງ​ແຂວງ 6 ​ເດືອນ​ຕົ້ນ​ປີ ​ແລະທິດ​ທາງ​ແຜນການ 6 ​ເດືອນ​ທ້າຍ​ປີ 2022;
  3. ພິຈາລະນາ ​ແລະຮັບຮອງ​ເອົາການຈັດ​ຕັ້ງ​ປະຕິບັດແຜນການທ່ອງທ່ຽວ ແລະ ການເປີດປະເທດຕິດພັນກັບການປ້ອງກັນ ແລະຮັບມືການແຜ່ລະບາດຂອງພະຍາດໂຄວິດ19;
  4. ພິຈາລະນາແລະຮັບຮອງເອົາບົດລາຍງານກ່ຽວກັບການເຄື່ອນໄຫວວຽກງານຂອງຄະນະປະຈໍາສະພາປະຊາຊົນແຂວງໄລຍະແຕ່ກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄໝສາມັນເທື່ອທີ 3 ແລະ ແຜນການຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຊຸດທີ II;

ອີກເທື່ອໜຶ່ງ, ຕາງໜ້າໃຫ້ຄະນະປະຈຳສະພາປະຊາຊົນແຂວງຂ້າພະເຈົ້າຂໍຖືເປັນກຽດຮຽນເຊີນມາຍັງບັນດາທ່ານ ຈົ່ງຕິດຕາມ ແລະ ສະໜັບສະໜູນການດໍາເນີນກອງປະຊຸມສະໄໝສາມັນເທື່ອທີ3ຂອງສະພາປະຊາຊົນແຂວງຊຸດທີ II ຄັ້ງນີ້ໃຫ້ມີຜົນສໍາເລັດຕາມຄາດໝາຍວາງໄວ້; ໃນໄລຍະກະກຽມແລະດຳເນີນກອງປະຊຸມ, ຄະນະເລຂາທິການສະພາປະຊາຊົນແຂວງໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍ​ດ່ວນເພື່ອເປີດກວ້າງການປະກອບຄໍາຄິດຄໍາເຫັນ, ຄຳສະເໜີໂດຍກົງຈາກປະຊາຊົນທີ່ຈະສົ່ງໄປຍັງກອງປະຊຸມ ຜ່ານໂທລະສັບສາຍດ່ວນ 061 156 ທີ່ຮັບໃຊ້ກອງປະຊຸມສະ  ໄໝສາມັນເທື່ອທີ 3 ຂອງສະພາປະຊາຊົນແຂວງຊຸດທີ II.

ສະພາປະຊາຊົນແຂວງຊຽງຂວາງ

ຂ່າວ​​ໂດຍ: ນາງ ສຸກ​ສະຫວັນ ອິນທະ​ແສງ