ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນເຊົ້າຂອງວັນທີ 22 ສິງຫາ 2022 ທ່ານ ສະເຫຼີມສັກ ແກ້ວຈັນທະລາ ຄະນະປະຈໍາ ເລຂາທິການສະພາປະຊາຊົນແຂວງຄໍາມ່ວນ  ໂດຍປະຕິບັດຕາມມາດຕາ 60 ຂອງກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍສະພາປະຊາຊົນຂັ້ນແຂວງ ສະບັບປັບປຸງປີ 2020 ແລະ ມະຕິ ຂອງຄະນະປະຈໍາສະພາປະຊາຊົນແຂວງຄຳມ່ວນ ສະບັບເລກທີ 164/ຄປຈ.ສພຂ, ລົງວັນທີ 10 ສິງຫາ 2022 ວ່າດ້ວຍການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຄຳມ່ວນ ຊຸດທີ II. ເພື່ອປະຕິບັດຕາມເນື້ອໃນຈິດໃຈດັ່ງກ່າວບັນດາຄະນະກໍາມະການ, ຄະນະເລຂາທິການສະພາປະຊາຊົນແຂວງ, ກົງຈັກທີ່ຄະນະປະຈໍາສະພາປະຊາຊົນແຂວງສ້າງຕັ້ງ ໄດ້ປະສານສົມທົບກັບອົງການປົກຄອງແຂວງ, ທະນາຄານແຫ່ງ ສປປລາວ ປະຈໍາພາກກາງ ແຂວງສະຫວັນນະເຂດ, ອົງການໄອຍະການປະຊາຊົນ ແລະ ກອງບັນຊາການປ້ອງກັນຄວາມສະຫງົບແຂວງ  ໃນການກະກຽມເນື້ອໃນຮອບດ້ານ ຂອງແຕ່ລະພາກສ່ວນທີ່ຈະລາຍງານ ແລະ ຊີ້ແຈງຕໍ່ກອງປະຊຸມໃນຄັ້ງນີ້. ມາເຖິງປັດຈຸບັນເຫັນວ່າການຫ້າງຫາກະກຽມບັນດາປັດໃຈຕ່າງໆໃນທຸກດ້ານ ໄດ້ມີຄວາມພ້ອມທັງໝົດແລ້ວ.

ຂ້າພະເຈົ້າ, ໃນນາມເລຂາທິການສະພາປະຊາຊົນແຂວງຄຳມ່ວນ, ຫົວໜ້າກອງເລຂາກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຄຳມ່ວນ ຊຸດທີ II, ຂໍຕາງໜ້າຄະນະປະຈຳສະພາປະຊາຊົນຂັ້ນແຂວງ ມີຄວາມປິຕິຍິນດີ ແລະ ຂໍຖືເປັນກຽດ ແຈ້ງມາ​ຍັງບັນດາທ່ານພະນັກງານ, ທະຫານ, ຕຳຫຼວດ, ນັກຮຽນຮູ້-ນັກສຶກສາ-ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ ນ້ອງປະຊາຊົນລາວບັນດາເຜົ່າໃນທົ່ວແຂວງຄຳມ່ວນ ແລະ ພີ່ນ້ອງຊາວລາວທີ່ອາໄສຢູ່ຕ່າງປະເທດ ໄດ້ຮັບຊາບກ່ຽວກັບການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຄຳມ່ວນ ຊຸດທີ II ດັ່ງນີ້:

– ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງຄໍາມ່ວນ ຊຸດທີ II ຈະໄດ້ໄຂຂຶ້ນໃນຕອນເຊົ້າຂອງວັນ ອັງຄານ,​ ວັນທີ 23 ສິງຫາ 2022 ແລະ ຈະດໍາເນີນໄປເຖິງວັນພຸດ, ວັນທີ 24 ສິງຫາ 2022 ທີ່ສະໂມສອນຂອງແຂວງ (ຫຼັກ 4),​  ເຊິ່ງຈະໃຊ້ເວລາດໍາເນີນກອງປະຊຸມທັງໝົດ 2 ວັນເຕັມ.

– ກອງປະຊຸມສະໄໝສາມັນເທື່ອທີ 3 ຈະໄດ້ພິຈາລະນາ ແລະ ຮັບຮອງເອົາບັນຫາສຳຄັນພື້ນຖານ ຂອງແຂວງ ດັ່ງນີ້:

  1. ວຽກງານຂອງອົງການປົກຄອງແຂວງ ແລະ ທະນາຄານແຫ່ງ ສປປລາວ ປະຈຳພາກກາງ
  • ພິຈາລະນາ ແລະ ຮັບຮອງເອົາບົດລາຍງານ ຂອງທ່ານເຈົ້າແຂວງຄຳມ່ວນ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳ 6 ເດືອນຕົ້ນປີ ແລະ ທິດທາງແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳ 6ເດືອນທ້າຍປີ 2022 ຂອງແຂວງ.
  • ບົດລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳ 6ເດືອນຕົ້ນປີ ແລະ ທິດທາງແຜນການ 6ເດືອນທ້າຍປີ 2022 ຂອງພະແນກແຜນການ ແລະ ການລົງທຶນແຂວງ.
  • ບົດລາຍງານ ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳ 6ເດືອນຕົ້ນປີ ແລະ ທິດທາງແຜນການ 6ເດືອນທ້າຍປີ 2022 ຂອງພະແນກການເງິນແຂວງ.
  • ບົດຊີ້ແຈງຕິດພັນກັບ ການລາຍງານ ຂອງອົງການປົກຄອງແຂວງມີ: ພະແນກແຜນການ ແລະ ການລົງທຶນແຂວງ, ພະແນກການເງິນແຂວງ. ນອກຈາກຊີ້ແຈງບັນຫາລວມໃຫ້ລົງເລິກຕື່ມການຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ.
  • ບົດຊີ້ແຈງຕິດພັນກັບ ບົດລາຍງານ ຂອງອົງການປົກຄອງແຂວງມີ: ພະແນກກະສິກຳປ່າ ແລະປ່າໄມ້ແຂວງ, ພະແນກອຸດສະຫະກຳການຄ້າແຂວງ, ພະແນກຊັບພະຍາກອນທຳມະ ຊາດ ແລະ ສິ່ງແວດລ້ອມ, ພະແນກໂຍທາທິການ ແລະ ຂົນສົ່ງ, ພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງ, ພະແນກສຶກສາທິການ ແລະ ກິລາແຂວງ, ພະແນກສາທາລະນະສຸກແຂວງ ແລະ ບົດຊີ້ແຈງ ຂອງກອງບັນຊາການ ປກສ ແຂວງ ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ.
  • ບົດຊີ້ແຈງ ຂອງອົງການໄອຍະການປະຊາຊົນແຂວງ ກ່ຽວກັບການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເຂົ້າສູ່ວຽກງານຕົວຈິງ ແລະ ການຕິດຕາມກວດກາການນຳໃຊ້ 7 ມາດຕະການສະກັດກັ້ນຂອງອົງການສືບສວນ-ສອບສວນ.
  • ບົດຊີ້ແຈງ ຂອງທະນາຄານແຫ່ງ ສປປລາວ ປະຈຳພາກກາງ ກ່ຽວກັບການຄຸ້ມຄອງອັດຕາແລກປ່ຽນທີ່ມີການເໜັງຕີງແບບກ້າວກະໂດດ ເຮັດໃຫ້ເງິນກີບອອນຄ່າຢ່າງຕໍ່ເນື່ອງ, ອັດຕາເງິນເຟີ້ສູງຂື້ນ.
  1. ວຽກງານສະພາປະຊາຊົນແຂວງຄຳມ່ວນ:
  • ພິຈາລະນາ ແລະ ຮັບຮອງເອົາບົດລາຍງານການເຄື່ອນໄຫວວຽກງານ ໃນໄລຍະແຕ່ກອງປະຊຸມສະໄໝສາມັນ ເທື່ອທີ 2 ຫາ ກອງປະຊຸມສະໄໝສາມັນ ເທື່ອທີ 3 ແລະ ແຜນການເຄື່ອນໄຫວວຽກງານ ຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຄຳມ່ວນ ຊຸດທີ II
  • ພິຈາລະນາ ແລະ ຮັບຮອງເອົາ ບົດລາຍງານ ຂອງຄະນະປະຈຳສະພາປະຊາຊົນແຂວງຄໍາມ່ວນ ກ່ຽວກັບຜົນການຕິດຕາມກວດກາການຈັດຕັ້ງຜັນຂະຫຍາຍວາລະແຫ່ງຊາດ ຢູ່ພາຍໃນແຂວງ ໃນໄລຍະຜ່ານມາ ແລະ ແຜນການຕິດຕາມກວດກາ ຂອງສະພາປະຊາຊົນຂັ້ນແຂວງ ກ່ຽວກັບການປະຕິບັດວາລະແຫ່ງຊາດ ໃນຕໍ່ໜ້າ;
  1. ບົດປະກອບຄຳເຫັນ ຂອງຄະນະປະຈຳສະພາປະຊາຊົນແຂວງ ມີ 1 ບົດ
  • ບົດປະກອບຄຳເຫັນ ຂອງຄະນະປະຈຳສະພາປະຊາຊົນແຂວງ ຕໍ່ບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈໍາ 6 ເດືອນຕົ້ນປີ ແລະ ທິດທາງແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ຂອງແຂວງປະຈຳ 6 ເດືອນທ້າຍປີ 2022.
  1. ມະຕິກອງປະຊຸມສະພາປະຊາຊົນແຂວງຄຳມ່ວນ ລວມມີ 4 ສະບັບ
  • ມະຕິ ກອງປະຊຸມສະພາປະຊາຊົນແຂວງຄໍາມ່ວນຊຸດທີ II ວ່າດ້ວຍການຮັບຮອງເອົາບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປະຈຳ 6 ເດືອນຕົ້ນປີ ແລະ ທິດທາງແຜນພັດທະນາເສດຖະກິດ-ສັງຄົມ ຂອງແຂວງ 6 ເດືອນທ້າຍປີ 2022.
  • ມະຕິ ກອງປະຊຸມສະພາປະຊາຊົນແຂວງຄໍາມ່ວນຊຸດທີ II ວ່າດ້ວຍການຮັບຮອງເອົາບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາ 6ເດືອນຕົ້ນປີ ແລະ ທິດທາງແຜນງົບປະມານແຫ່ງລັດ ປະຈຳ 6ເດືອນທ້າຍປີ 2022 ຂອງແຂວງ.
  • ມະຕິ ກອງປະຊຸມສະພາປະຊາຊົນແຂວງຄໍາມ່ວນຊຸດທີ II ວ່າດ້ວຍການຮັບຮອງເອົາບົດລາຍງານການເຄື່ອນໄຫວວຽກງານ ໃນໄລຍະແຕ່ກອງປະຊຸມສະໄໝສາມັນ ເທື່ອທີ 2 ຫາ ກອງປະຊຸມສະໄໝ ສາມັນ ເທື່ອທີ 3 ແລະ ແຜນການເຄື່ອນໄຫວວຽກງານ ຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຄຳມ່ວນ ຊຸດທີ II
  • ມະຕິ ກອງປະຊຸມສະພາປະຊາຊົນແຂວງຄໍາມ່ວນຊຸດທີ II ວ່າດ້ວຍການຮັບຮອງເອົາບົດລາຍງານ ຂອງຄະນະປະຈຳສະພາປະຊາຊົນຂັ້ນແຂວງ ກ່ຽວກັບຜົນການຕິດຕາມກວດກາການຈັດຕັ້ງຜັນຂະຫຍາຍວາລະແຫ່ງຊາດ ຢູ່ພາຍໃນແຂວງ ໃນໄລຍະຜ່ານມາ ແລະ ແຜນການຕິດຕາມກວດກາ ຂອງສະພາປະຊາຊົນຂັ້ນແຂວງ ກ່ຽວກັບການປະຕິບັດວາລະແຫ່ງຊາດ ໃນຕໍ່ໜ້າ;

ອີກເທື່ອໜຶ່ງ, ໃນນາມຕາງໜ້າໃຫ້ຄະນະປະຈຳສະພາປະຊາຊົນແຂວງຄຳມ່ວນ,  ຂ້າພະເຈົ້າ ຂໍເຊີນຊວນບັນດາທ່ານ ພະນັກງານ, ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງ, ປະຊາຊົນບັນດາເຜົ່າທຸກຊັ້ນຄົນໃນທົ່ວແຂວງ ຈົ່ງຕິດຕາມກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ຄັ້ງນີ້, ໃນໄລຍະກະກຽມ ແລະ ດຳເນີນກອງປະຊຸມ, ຄະນະເລຂາທິການສະພາປະຊາຊົນແຂວງ ໄດ້ຈັດຕັ້ງຄະນະຮັບຜິດຊອບໂທລະສັບສາຍ​ດ່ວນ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກປະຊາຊົນ ທີ່ຈະສົ່ງໄປຍັງກອງປະຊຸມ: ບັນດາທ່ານສາມາດສົ່ງຄຳຄິດຄຳເຫັນ ແລະ ຄຳສະເໜີໄປຍັງສາຍດ່ວນຂອງກອງປະຊຸມ:ໝາຍເລກໂທລະສັບ 051 156  ໂດຍບໍ່ເສຍຄ່າ.

ສຸດທ້າຍນີ້ ຂ້າພະເຈົ້າຂໍອວຍໄຊໃຫ້ພອນແດ່ບັນດາທ່ານທີ່ຕິດຕາມຮັບຊົມ ແລະ ຮັບຟັງ ຈົ່ງມີພະລານະໄມສົມບູນ, ສຸຂະພາບແຂງແຮງ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ປະສົບຜົນສຳເລັດໃນໜ້າທີ່ວຽກງານອັນມີກຽດຂອງຕົນ ພ້ອມກັນປະກອບສ່ວນປົກປັກຮັກສາ ແລະ ສ້າງສາພັດທະນາແຂວງຄໍາມ່ວນ ຂອງພວກເຮົາໃຫ້ມີຄວາມຈະເລີນຮຸ່ງເຮືອງຂຶ້ນໄປເລີ້ອຍໆ.

 

(ຂໍຂອບໃຈ)

                                                                                     ໂດຍ: ເອື້ອ ມະໂນສິງ