(ສພຊ) ເພື່ອຖອດຖອນບົດຮຽນກ່ຽວກັບການລະດົມທຶນ ແລະ ການຊ່ວຍເຫຼືອສັງຄົມ, ໃນວັນທີ 8 ພະຈິກ 2022 ທີ່ຫໍສະພາແຫ່ງຊາດ ນະຄອນຫຼວງວຽງຈັນ ໄດ້ຈັດກອງປະຊຸມຖອດຖອນບົດຮຽນການຊ່ວຍເຫຼືອສັງຄົມ ກັບບັນດາຄອບຄົວການນຳແຂວງຫຼວງນ້ຳທາ ໂດຍການເປັນປະທານຂອງທ່ານ ດຣ. ນາງ ວິພາວັນ ພົມວິຫານ ປະທານກອງທຶນຊ່ວຍເຫຼືອສັງຄົມ ຂອງສະພາແຫ່ງຊາດ; ມີບັນດາທ່ານຄະນະກອງທຶນ ແລະ ບັນດາຄອບຄົວການນຳ ຂອງແຂວງຫຼວງນ້ຳທາ ນຳໂດຍທ່ານ ນາງ ຄໍາຮວຍ ສີປະເສີດ ຄອບຄົວທ່ານເລຂາພັກແຂວງ-ເຈົ້າແຂວງໆຫຼວງນ້ຳທາ ພ້ອມດ້ວຍຄະນະເຂົ້າຮ່ວມ.

ໃນໄລຍະຜ່ານມາ ເຫັນວ່າຍັງມີເດັກກຳພ້າ, ຜູ້ທຸກຍາກອານະຖາ, ຜູ້ດ້ອຍໂອກາດທີ່ຢູ່ເຂດຫ່າງໄກສອກຫຼີກ ແລະ ການບັນເທົາທຸກ ໃຫ້ແກ່ຜູ້ໄດ້ຮັບຜົນກະທົບຈາກໄພທຳມະຊາດ ຍັງມີຄວາມຕ້ອງການການຊ່ວຍເຫຼືອຢູ່, ສະນັ້ນ ເພື່ອເຮັດໃຫ້ການຊ່ວຍເຫຼືອສັງຄົມຢູ່ແຂວງຫຼວງນ້ຳທາ ມີປະສິດທິຜົນ ກອງປະຊຸມ ຈຶ່ງໄດ້ແລກປ່ຽນ ແລະ ຖອດຖອນບົດຮຽນກ່ຽວກັບການລະດົມທຶນ ແລະ ການຊ່ວຍເຫຼືອສັງຄົມ ແລະ ວຽກງານອື່ນອີກຈຳນວນໜຶ່ງ ຈາກກອງທຶນຊ່ວຍເຫຼືອສັງຄົມ ຂອງສະພາແຫ່ງຊາດ.

(ພາບ ແລະ ຂ່າວ: ນາງ ກຸກກິກ ບຸດດາໄຊ)