ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

        ຕອນເຊົ້າວັນທີ 16 ມີນາ 2022 ຜ່ານມານີ້, ທີ່ຫ້ອງຮັບແຂກຫ້ອງວ່າການປົກຄອງ ແຂວງ ເຊກອງ ທ່ານ ເຫຼັກໄຫຼ ສີວິໄລ ເລຂາພັກແຂວງ, ເຈົ້າແຂວງ ເຊກອງ ໄດ້ໃຫ້ກຽດຕ້ອນຮັບ ທ່ານ ນາງ ປິ່ງຄໍາ ລາຊະສິມມາ ກໍາມະການສູນກາງພັກ, ຄະນະປະຈໍາສະພາແຫ່ງຊາດ, ເລຂາທິການສະພາແຫ່ງຊາດ ພ້ອມດ້ວຍຄະນະ ເຂົ້າພົບປະຢ້ຽມຢາມ ແລະ ແຈ້ງຈຸດປະສົງ ເນື່ອງໃນໂອກາດທີ່ທ່ານ ລົງເຄື່ອນໄຫວຊຸກຍູ້ ແລະ ເກັບກໍາຂໍ້ມູນກ່ຽວກັບການຈັດຕັ້ງປະຕິບັດວຽກງານຂອງຄະນະເລຂາທິການສະພາປະຊາຊົນແຂວງ ເຊກອງ ໃນວັນທີ 16 ມີນາ 2022 ຜ່ານມານີ້.              ໂອກາດນີ້ ທ່ານ ເຫລັກໄຫລ ສີວິໄລ ກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງໄດ້ກ່າວຕ້ອນຮັບ ແລະ ຕີລາຄາສູງຕໍ່ການເຄື່ອນໄຫວຢ້ຽມຢາມ ແລະ ເຮັດວຽກຂອງທ່ານເລຂາທິການສະພາແຫ່ງຊາດ ເຊິ່ງໄລຍະຜ່ານມາຄະນະພັກ-ອົງການປົກຄອງແຂວງ ເຊກອງ ກໍໄດ້ເອົາໃຈໃສ່ໃກ້ຊິດຕິດແທດ ແລະ ປະສານງານກັນຢ່າງກົມກຽວ ໂດຍສະເພາະຂອດການຄົ້ນຄວ້າບັນຫາສຳຄັນຕ່າງໆຂອງແຂວງ ເຊິ່ງສະແດງໃຫ້ເຫັນໃນກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງ ເຊກອງ ຊຸດທີ 2 ເຊິ່ງໄດ້ຮັບຮອງການສ້າງນິຕິກຳໄດ້ 2 ສະບັບ. ນອກນີ້, ຍັງຈະໄດ້ຊຸກຍູ້ການສ້າງນິຕິກຳຕ່າງໆໃນຊຸດນີ້ໃຫ້ໄດ້ອີກ 10 ສະບັບ, ພ້ອມນັ້ນ ທ່ານຍັງໄດ້ຮຽກຮ້ອງໃຫ້ຄະນະເລຂາທິການສະພາແຫ່ງຊາດສືບຕໍ່ຊຸກຍູ້ບຸກຄະລາກອນຢູ່ຂັ້ທ້ອງຖິ່ນໃຫ້ມີບົດບາດເປັນຕົວແທນແກ່ປະຊາຊົນຢ່າງເຕັມສ່ວນ ແລະ ຈັດຕັ້ງປະຕິບັດບັນດານິຕິກຳຕ່າງໆຂອງສະພາ 2 ຂັ້ນ ໃຫ້ໄດ້ຮັບປະສິດທິຜົນສູງ.               ຂະນະທີ່ທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ ເຊກອງ ກໍໄດ້ໃຫ້ກຽດຕ້ອນຮັບທີ່ສະພາປະຊາຊົນແຂວງ ພ້ອມທັງ, ລາຍງານສະພາບການຈັດຕັ້ງປະຕິບັດວຽກງານໃນໄລຍະຜ່ານມາ ຂອງສະພາປະຊາຊົນແຂວງ ໂດຍສະເພາະການປະຕິບັດພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງ, ບັນດາກົງຈັກການຈັດຕັ້ງ, ການປະສານສົມທົບກັບອົງການປົກຄອງແຂວງ ແລະ ພາກສ່ວນຕ່າງໆທີ່ກ່ຽວຂ້ອງ ເຊິ່ງເຫັນໄດ້ມີທັງຂໍ້ສະດວກ, ຂໍ້ຫຍຸ້ງຍາກ ແລະ ຂໍ້ຄົງຄ້າງຈໍານວນໜຶ່ງ ທີ່ຈະໄດ້ພ້ອມກັນສຸມໃສ່ສືບຕໍ່ຈັດຕັ້ງປະຕິບັດໃຫ້ປະສົບຜົນສໍາເລັດເປັນກ້າວໆ.

#ໂດຍ: ນາລີວັນ ນັກຂ່າວເຂດທີ 16.