(ສພຊ) – ກອງປະຊຸມຄັ້ງທີ 1 ຂອງຄະນະປະຈຳການ ຄະນະກຳມະການລະດັບຊາດປັບປຸງລັດຖະທຳມະນູນ ແຫ່ງ ສປປລາວ ສະບັບປີ 2015 (ຄລຊ) ໄດ້ດໍາເນີນໃນຕອນເຊົ້າວັນທີ 7 ສິງຫານີ້ ພາຍໃຕ້ການເປັນປະທານຂອງທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ, ປະທານຄະນະກຳມະ ການລະດັບຊາດປັບປຸງລັດຖະທຳມະນູນ; ເຂົ້າຮ່ວມມີບັນດາທ່ານຮອງປະທານ ແລະ ກຳມະການ ຄລຊ, ຄະນະອະນຸກຳ ມະການຕ່າງໆ ແລະ ກອງເລຂາ.

ຈຸດປະສົງແມ່ນເພື່ອສະຫຼຸບຕີລາຄາຜົນການປະເມີນການຈັດຕັ້ງປະຕິບັດລັດຖະທຳມະນູນ ສະບັບປີ 2015 ຢູ່ 5 ຈຸດອ້ອມຂ້າງສູນກາງ ແລະ 18 ແຂວງ-ນະຄອນຫຼວງວຽງຈັນ ຕິດພັນກັບກອງປະຊຸມສະໄໝສາມັນຂອງສະພາປະຊາຊົນຂັ້ນແຂວງ ເຊິ່ງເລີ່ມຈັດຕັ້ງປະເມີນແຕ່ວັນທີ 20 ມິຖຸນາ ຫາ ວັນທີ 30 ກໍລະກົດ 2024 ເປັນຕົ້ນມາ, ຮັບຟັງການລາຍງານການເຄື່ອນໄຫວຂອງອະນຸກໍາມະການຕ່າງໆ ແລະ ກອງເລຂາ; ນອກຈາກນັ້ນ, ຍັງໄດ້ປຶກສາຫາລືວຽກງານສຳຄັນຈຳນວນໜຶ່ງກ່ຽວກັບການປັບປຸງລັດຖະທຳມະນູນ ແລະ ການຈັດກອງປະຊຸມວິທະຍາສາດ.

ທ່ານ ປອ. ໄຊສົມພອນ ພົມວິຫານ ໄດ້ສະເໜີໃຫ້ບັນດາທ່ານທີ່ເຂົ້າຮ່ວມ ຈົ່ງຍົກສູງຄວາມຮັບຜິດຊອບໃນການຄົ້ນຄວ້າ, ປະກອບຄວາມເຫັນໃຫ້ເລິກເຊິ່ງ ແລະ ຕົກລົງບັນຫາຕ່າງໆຢ່າງມີປະສິດທິພາບ, ປະສິດທິຜົນ ໃນນັ້ນ, ໃຫ້ຕີລາຄາບົດສະຫຼຸບຜົນການປະເມີນການຈັດຕັ້ງປະຕິບັດລັດຖະທຳມະນູນ ສະບັບປີ 2015 ຢູ່ 5 ຈຸດ ອ້ອມຂ້າງສູນກາງ ແລະ 18 ແຂວງ-ນະຄອນຫຼວງ; ບັນດາຂໍ້ສະດວກ ແລະ ຫຍຸ້ງຍາກໃນການເຄື່ອນໄຫວຂອງອະນຸກໍາມະການຕ່າງໆ; ເອົາໃຈໃສ່ຄົ້ນຄວ້າ, ວິເຄາະ-ວິໄຈບັນດາຄໍາເຫັນທີ່ໄດ້ຈາກການທາບທາມຢູ່ 5 ຈຸດອ້ອມຂ້າງສູນກາງ ແລະ 18 ແຂວງ-ນະຄອນຫຼວງ ເພື່ອສັງລວມເອົາຄໍາເຫັນໃສ່ຮ່າງລັດຖະທໍາມະນູນສະບັບປັບປຸງ ໃຫ້ມີເນື້ອໃນຄົບຖ້ວນສົມບູນຍິ່ງໆຂຶ້ນ. ຫຼັງຈາກນັ້ນ, ຈຶ່ງລາຍງານຕໍ່ກອງປະຊຸມກົມການເມືອງສູນກາງພັກ ມີທິດຊີ້ນໍາ ເພື່ອເປັນບ່ອນອີງໃນການຈັດຕັ້ງປະຕິບັດໃນຕໍ່ໜ້າ.

(ນາງ ປາກາລັກ ພົມມີໄຊ)