ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ການແຜ່ລະບາດຂອງພະຍາດ ໂຄວິ-19 ໃນໄລຍະຜ່ານມາເຮັດໃຫ້ມີຜົນກະທົບຫລາຍໆດ້ານຕໍ່ກັບປະເທດຊາດກໍ່ຄືແຂວງອັດຕະປື ເຊິ່ງໄດ້ຮັບຜົນກະທົບຢ່າງໜັກໜ່ວງຕໍ່ກັບການດຳລົງຊີວິດ, ການທຳມາຫາກີນຂອງປະຊາຊົນ, ຜູ້ປະກອບການຕ່າງໆ ແລະ ກະທົບໃສ່ແຜນພັດທະນາເສດຖະກິດ-ສັງຄົມຂອງແຂວງ, ປະຈຸບັນ ລັດຖະບານໄດ້ອະນຸຍາດໃຫ້ເປີດດ່ານສາກົນໃນທົ່ວປະເທດ ຮອງຮັບຮອງເອົານັກທ່ອງທ່ຽວ, ນັກລົງທຶນຈາກຕ່າງປະເທດເຂົ້າມາເຄື່ອນໄຫວ ໃນ ສປປປລາວ ໄດ້ເປັນປົກກະຕິ ເຊິ່ງແຂວງອັດຕະປື ກໍ່ໄດ້ປະຕິບັດຕາມຂັ້ນເທິ່ງເຊັ່ນກັນ ໂດຍໄດ້ເປີດດ່ານສາກົນພູເກືອ ສາມາດເຂົ້າ-ອອກ ໄດ້ຕາມປົກກະຕິ ແລະ ປະຕິບັດມາດຕະການຕ່າງໆທີ່ວາງໄວ້.

ສະນັ້ນ, ເພື່ອຮັບປະກັນໃນການຕິດຕາມກວດກາ ແລະ ເກັບກຳຂໍ້ມູນ, ຂໍ້ສະດວກ, ຂໍ້ຄົງຄ້າງ ແລະ ມາດຕະການຕ່າງໆກ່ຽວກັບ ການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ການເປີດປະເທດ ຕິດພັນກັບການປ້ອງກັນ ແລະ ຮັບມືການແຜ່ລະບາດພະຍາດໂຄວິດ-19 ຢູ່ແຂວງອັັດຕະປື ແລະ ເພື່ອເປັນຂໍ້ມູນພື່ນຖານລາຍງານຕໍ່ຄະນະປະຈໍາສະພາແຫ່ງຊາດ ກະກຽມຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ທີ່ຈະໄຂຂຶ້ນໃນມໍ່ໆນີ້.

ໃນລະຫວ່າງວັນທີ 24-25 ພຶດສະພາ ຜ່ານມານີ້. ທີ່ຫ້ອງປະຊຸມນ້ອຍສະພາປະຊາຊົນແຂວງ. ທ່ານ ນາງ ພອນມະນີ ຂຽນໄຊຍະວົງ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17 ແຂວງອັດຕະປື, ຮອງປະທານສະພາປະຊາຊົນແຂວງ ແລະ ທ່ານ ແຫວນຄຳ ປະທຸມມະແສງ ປະທານກໍາມະການວັດທະນະທໍາ-ສັງຄົມ ແລະ ບັນດາເຜົ່າ ພ້ອມຄະນະ ໄດ້ຮັບຟັງການເຂົ້າລາຍງານຈາກພະແນກສາທາລະນະສຸກ, ພະແນກຖະແຫລງຂ່າວວັດທະນະທໍາ ແລະ ທ່ອງທ່ຽວ, ສະພາການຄ້າ ແລະ ສະມາຄົມນັກທຸລະກິດ.

ຈາກນັ້ນ, ຄະນະໄດ້ລົງເຮັດວຽກເກັບກຳຂໍ້ມູນພື່ນທີ່ຕົວຈິງ ເຮືອນພັກ, ຮ້ອນອາຫານ, ສະຖານທີ່ທ່ອງທ່ຽວ ແລະ ດ່ານສາກົນພູເກືອ ໃນການກະກຽມຄວາມພ້ອມໃນດ້ານຕ່າງທີ່ມີທັງຂໍ້ສະດວກ, ຂໍ້ຄົງຄ້າງ, ມາດຕະຖານ-ມາດຕະການຕ່າງໆໃນການຮັບມື ແລະ ຂໍ້ສະເໜີຈາກພາກສ່ວນທີ່ກ່ຽວຂ້ອງ.     (ວິນັດ ສີສຸລາດ)