ເພື່ອຮັບປະກັນໃນການ ຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດ ລັດຖະທໍາມະນູນ, ກົດໝາຍ ແລະ ແຜນພັດທະນາເສດຖະກິດ-ສັງຄົມ ໃນຂົງເຂດວຽກງານວັດທະນະທໍາສັງຄົມ ຕາມມະຕິທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 2 ຂອງ ສພຂ ໃຫ້ໄດ້ບັນລຸຕາມຄາດໝາຍທີ່ວາງໄວ້, ພ້ອມທັງ ເປັນການຊຸກຍູ້ ແລະ ເກັບກໍາຂໍ້ມຸນ ຂໍ້ຫຍຸ້ງຍາກ, ຂໍ້ຄົງຄ້າງ, ບັນດາປະກົດການຫຍໍ້ທໍ້ຕ່າງໆ ແລະ ບັນຫາຫາງສຽງສັງຄົມ ເພື່ອເປັນຂໍ້ມູນພື້ນຖານນຳໄປ ຄົ້ນຄວ້າພິຈາລະນາ ເຂົ້າໃນວຽກງານ ແລະ ລາຍງານຕໍ່ຄະນະປະຈໍາ ສພຂ.

ໃນວັນທີ 27 ມິຖຸນາ 2022 ນີ້. ຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ (ຄວສຜ) ສະພາປະຊາຊົນແຂວງ (ສພຂ) ລົງຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດວຽກງານ 6 ເດືອນຕົ້ນປີ 2022 ໃນຂົງເຂດວັດທະນະທໍາ-ສັງຄົມ ແລະ ບັນດາເຜົ່າ, ທີ່ຫ້ອງວ່າການປົກຄອງເມືອງຊານໄຊ. ນໍາໂດຍ ທ່ານ ແຫວນຄໍາ ປະທຸມມະແສງ ປະທານ ຄວສຜ ພ້ອມຄະນະ ເຂົ້າຮ່ວມມີ ທ່ານ ບຸນເນັມ ໄຊຍະເສັ້ມ ຮອງເລຂາພັກເມືອງ, ຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຊານໄຊ, ມີຮອງເຈົ້າເມືອງ ແລະ ຕາງໜ້າບັນດາຫ້ອງການໃນຂົງເຂດວັດທະນະທໍາ-ສັງຄົມ ເຂົ້າຮ່ວມ.

ໂອກາດນີ້, ໄດ້ຮັບຟັງໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານ 6 ເດືອນຕົ້ນປີ 2022 ໃນຂົງເຂດວັດທະນະທໍາສັງຄົມ ຂອງເມືອງ ໂດຍສະເພາະບັນດາຄາດໝາຍ, ບັນດາຕົວຊີ້ວັດ, ຂໍ້ສະດວກ-ຂໍ້ຫຍຸ້ງຍາກ ແລະ ມາດຕະການຕ່າໆໃນການຈັດຕັ້ງປະຕິບັດວຽກງານ ແລະ ຮັບຟັງຈາກບັນດາຂະແໜງການທີ່ກ່ຽວຂ້ອງຂອງເມືອງເປັນຕົ້ນ: ຂົງເຂດວຽກງານສືກສາ ແລະ ກິລາ, ຂົງເຂດສາທາລະນະສຸກ, ຂົງເຂດແຮງງານ ແລະ ສະຫວັດດີການສັງຄົມ, ຂົງເຂດຖະແຫລງຂ່າວ,ວັດທະນະທໍາ ແລະ ທ່ອງທ່ຽວ, ຂົງເຂດພັດທະນາຊົນນະບັດ ແລະ ລຶບລ້າງຄວາມທຸກຍາກ. ຈາກນັ້ນ, ກໍໄດ້ພ້ອມກັນ ແລກປ່ຽນຄໍາຄິດຄໍາເຫັນ ຢ່າງມີຈຸດສຸມ ແລະ ກົງໄປກົງມາ.
(ພາບ-ຂ່າວ:ວິນັດ​ ສພຂ).