ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 15-16 ມິຖຸນາ 2022 ຜ່ານມານີ້ ຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນແຂວງຈໍາປາສັກ ໄດ້ລົງຕິດຕາມກວດກາ, ຊຸກຍູ້ ການຈັດຕັ້ງປະຕິບັດກົດໝາຍ, ນິຕິກໍາລຸ່ມກົດໝາຍ ແລະ ຄາດໝາຍສູ້ຊົນໃນຂົງເຂດວັດທະນະທໍາ-ສັງຄົມ ແລະ ບັນດາເຜົ່າ ຢູ່ເມືອງປະທຸມພອນ ແລະ ເມືອງໂຂງແຂວງຈໍາປາສັກ ເຊິ່ງນໍາໂດຍ ທ່ານ ສົມສີ ມະນີນິນ ກໍາມະການພັກແຂວງ, ຮອງປະທານສະພາປະຊາຊົນແຂວງຈໍາປາສັກ ແລະ ທ່ານ ບຸນຮອນ ໄຊຍະວົງ ຮອງປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ພ້ອມຄະນະ.

ເຊິ່ງໃນວັນທີ 15 ມິຖຸນາ 2022 ໄດ້ເຮັດວຽກຮ່ວມກັບອົງການປົກຄອງເມືອງປະທຸມພອນ, ທີ່ຫ້ອງປະຊຸມຂອງຫ້ອງວ່າການປົກຄອງເມືອງ, ໂດຍການໃຫ້ກຽດຕ້ອນຮັບຂອງ ທ່ານ ບຸນຖອງ ສຸພາວົງ ກໍາມະການພັກເມືອງ, ຮອງເຈົ້າເມືອງປະທຸມພອນ, ເຂົ້າຮ່ວມມີ ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງປະທຸມພອນ, ຫົວໜ້າຫ້ອງການກະສິກໍາ ແລະ ປ່າໄມ້ເມືອງ, ຫົວໜ້າຫ້ອງການພາຍໃນເມືອງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ໃນກອງປະຊຸມໄດ້ຮັບຟັງການລາຍງານກ່ຽວກັບການຄຸ້ມຄອງພົນລະເມືອງ ທີ່ຍົກຍ້າຍຖິ່ນຖານພູມລໍາເນົາຈາກທ້ອງຖິ່ນອື່ນ ມາດໍາລົງຊີວິດ ແລະ ທໍາການຜະລິດ ຢູ່ໃນເຂດເມືອງປະທຸມພອນ, ບົດລາຍງານກ່ຽວກັບການຄຸ້ມຄອງເນື້ອທີ່ປ່າສະຫງວນ, ປ່າຜະລິດ ແລະ ປ່າປ້ອງກັນໃນຂອບເຂດຂອງເມືອງປະທຸມພອນ, ການຈັດຕັ້ງ ແລະ ການເຄື່ອນໄຫວຽກງານຊົນເຜົ່າ ແລະ ສາສະໜາພາຍໃນເມືອງ ຈາກທ່ານຮອງເຈົ້າເມືອງໆປະທຸມພອນ ແລະ ບັນດາຫົວໜ້າຫ້ອງການທີ່ກ່ຽວຂ້ອງຂອງເມືອງ, ພາຍຫຼັງສໍາເລັດກອງປະຊຸມ ທ່ານຮອງປະທານສະພາປະຊາຊົນແຂວງພ້ອມຄະນະ ແລະ  ຄະນະນໍາຂອງເມືອງປະທຸມພອນ ຍັງໄດ້ລົງຕິດກວດກາສະພາບຕົວຈິງ ໃນເຂດທໍາການຜະລິດປູກມັນຕົ້ນຂອງປະຊາຊົນ ແລະ ລານເກັບຊື້້ມັນຕົ້ນຈໍານວນໜຶ່ງ.

ແລະ ໃນວັນທີ 16 ມິຖຸນາ 2022, ທ່ານຮອງປະທານສະພາປະຊາຊົນຊົນແຂວງ ພ້ອມຄະນະໄດ້ສືບຕໍ່ລົງເຮັດວຽກຮ່ວມກັບອົງການປົກຄອງເມືອງໂຂງ ເພື່ອຕິດຕາມກວດກາ, ຊຸກຍູ້ ຄວາມພ້ອມໃນການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ການເປີດປະເທດ ຕິດພັນກັບການປ້ອງກັນ ແລະ ຮັບມືການແຜ່ລະບາດຂອງພະຍາດໂຄວິດ-19, ໂດຍການໃຫ້ກຽດຕ້ອນຮັບຂອງ ທ່ານ ປອ. ສິດທິພອນ ບຸດຕິວົງ ຮອງເລຂາພັກເມືອງ, ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງໂຂງ, ທ່ານ ຄໍາສິງ ບຸນຈະເລີນ ຄະນະປະຈໍາພັກເມືອງ, ຮອງເຈົ້າເມືອງໆໂຂງ ພ້ອມດ້ວຍບັນດາຫົວໜ້າຫ້ອງການ ແລະ ພະນັກງານວິຊາການທີ່ກ່ຽວຂ້ອງໃຫ້ການຕ້ອນຮັບດ້ວຍຄວາມອົບອຸ່ນ, ໃນໂອກາດດັ່ງ ທ່ານ ຮອງປະທານສະພາປະຊາຊົນແຂວງ ພ້ອມຄະນະຍັງໄດ້ລົງຊຸກຍູ້, ຕິດຕາມກວດກາສະພາບການຕົວຈິງ ຢູ່ແຫຼ່ງທ່ອງທ່ຽວນໍ້າຕົກຕາດຄອນພະເພັງ ເພື່ອເກັບກໍາສະພາບບັນຫາ ແລະ ຊຸກຍູ້ການກະກຽມຄວາມພ້ອມຮອບດ້ານໃຫ້ແກ່ການປະຕິບັນແຜນການທ່ອງທ່ຽວສີຂຽວ ແລະ ການເປີດປະເທດ ຕິດພັນກັບການປ້ອງກັນ ແລະ ຮັບມືການແຜ່ລະບາດຂອງພະຍາດໂຄວິດ-19 ໃຫ້ມີປະສິດທິພາບ ແລະ ປະສິດທິຜົນສູງ.