(ສພຊ) – ໃນລະຫວ່າງວັນທີ 11-17 ສິງຫາ 2024, ທ່ານ ຈັນທະວົງ ແສນອາມາດມົນຕີ ຮອງປະທານກໍາມາທິການການຕ່າງປະເທດ ພ້ອມດ້ວຍຄະນະ ໄດ້ສຳເລັດການເຄື່ອນໄຫວວຽກງານຢູ່ແຂວງຜົ້ງສາລີ, ຫຼວງນຳ້ທາ ແລະ ອຸດົມໄຊ. ຈຸດປະສົງແມ່ນເພື່ອຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ໃນຂົງເຂດວຽກງານການຕ່າງປະເທດ ກໍຄືການຕິດຕາມການຈັດຕັ້ງປະຕິບັດບັນດາສົນທິສັນຍາ ແລະ ສັນຍາສາກົນ ທີ່ ສປປລາວ ເປັນພາຄີ ເປັນຕົ້ນ: ການຄຸ້ມຄອງເສັ້ນຊາຍແດນ, ການຄຸ້ມຄອງດ່ານສາກົນ, ການຄຸ້ມຄອງຄົນເຂົ້າ-ອອກເມືອງ, ບັນຫາການຄ້າມະນຸດ, ການແຕ່ງງານທີ່ບໍ່ຖືກຕ້ອງຕາມກົດໝາຍ; ຊຸກຍູ້ການຕິດຕາມກວດກາການຈັດຕັ້ງປະຕິບັດ ແລະ ຄຸ້ມຄອງໂຄງການຊ່ວຍເຫຼືອລ້າ (ODA), ການລົງທຶນຂອງຕ່າງປະເທດ, ອົງການທີ່ບໍ່ແມ່ນລັດຖະບານ (NGOs), ອົງການຈັດຕັ້ງທາງສັງຄົມ (CSO) ແລະ ອື່ນໆຢູ່ ສປປລາວ ພ້ອມທັງເກັບກໍາບັນ ຫາທີ່ພົ້ນເດັ່ນວຽກງານຂົງເຂດການຕ່າງປະເທດຢູ່ທ້ອງຖິ່ນ ເພື່ອເປັນຂໍ້ມູນລາຍງານຕໍ່ຄະນະປະຈໍາສະພາແຫ່ງຊາດ.
ໂອກາດດັ່ງກ່າວ, ຄະນະໄດ້ເຂົ້າຢ້ຽມຂໍ່ານັບທ່ານເຈົ້າແຂວງ, ພົບປະຮອງເຈົ້າແຂວງ ແລະ ການນຳແຂວງ, ເຮັດວຽກກັບສະພາປະຊາຊົນແຂວງ, ຮັບຟັງການລາຍງານຫຍໍ້ຈາກບັນດາພະແນກການຕ່າງໆອ້ອມຂ້າງແຂວງ ກ່ຽວກັບວຽກງານການຕ່າງປະເທດ. ພ້ອມດຽວກັນນີ້, ທ່ານຮອງປະທານກໍາມາທິການການຕ່າງປະເທດ ກໍໄດ້ເນັ້ນໜັກໃຫ້ພາກສ່ວນທີ່ກ່ຽວຂ້ອງ ເອົາໃຈໃສ່ຕື່ມບາງບັນຫາເຊັ່ນ: ການຈັດຕັ້ງປະຕິບັດລັດຖະທຳມະນູນ, ບັນດາກົດໝາຍ ແລະ ນິຕິກໍາໃຕ້ກົດໝາຍ ໃນຂົງເຂດວຽກງານການຕ່າງປະເທດ, ການຄຸ້ມຄອງໂຄງການລົງທຶນຂອງຕ່າງປະເທດ ເປັນຕົ້ນການແກ້ໄຂບັນຫາຜົນກະທົບຕໍ່ສິ່ງແວດລ້ອມ-ສັງຄົມໃນຂະແໜງການບໍ່ແຮ່, ການຄຸ້ມຄອງໂຄງການຊ່ວຍ ເຫຼືອລ້າ, ການຄຸ້ມຄອງຄົນເຂົ້າ-ອອກເມືອງ, ການຄຸ້ມຄອງຄົນຕ່າງປະເທດ ແລະ ບັນຫາອື່ນໆທີ່ສົ່ງຜົນກະທົບເຖິງຊີ ວິດການເປັນຢູ່ຂອງປະຊາຊົນ.
ຄະນະຍັງໄດ້ເຄື່ອນໄຫວເຮັດວຽກຮ່ວມກັບຄະນະຄຸ້ມຄອງດ່ານສາກົນບໍ່ເຕັນ, ຄະນະຄຸ້ມຄອງເຂດເສດ ຖະກິດພິເສດແຂວງຫຼວງນຳ້ທາ (ເຂດເສດຖະກິດພິເສດບໍ່ເຕັນແດນງາມ) ແລະ ຢ້ຽມຢາມບັນດາໂຄງການລົງທຶນຂອງຕ່າງປະເທດ, ສະຖານທີ່ທ່ອງທ່ຽວ ແລະ ພື້ນຖານການຜະລິດຂອງພໍ່ແມ່ປະຊາຊົນຈຳນວນໜຶ່ງ.