ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນບ່າຍວັນທີ 18 ພຶດສະພາ 2022 ທີ່ຫ້ອງປະຊຸມສະພາປະຊາຊົນແຂວງສະຫວັນນະເຂດ ໄດ້ເປີດກອງປະຊຸມກ່ຽວກັບການຕິດຕາມກວດກາການຈັດຕັ້ງປະຕິບັດວຽກງານໃນຂົງເຂດເສດຖະກິດ ໂດຍການເປັນປະທານກອງປະຊຸມຂອງທ່ານ ສັນຍາ ປຣະເສີດ ກໍາມະການຄະນະປະຈຳສະພາແຫ່ງຊາດ, ປະທານກໍາມາທິການການຕ່າງປະເທດ, ທ່ານ ກອງແກ້ວ ມີວໍລະຈັກ ປະທານສະພາປະຊາຊົນແຂວງ ເປັນປະທານຮ່ວມ, ມີບັນດາທ່ານປະທານ ແລະ ຮອງປະທານຄະນະກໍາມະການເສດຖະກິດ, ແຜນການ ແລະ ການເງິນ, ບັນດາພະແນກການທີ່ກ່ຽວຂ້ອງ, ຫົວໜ້າຂະແໝງ ແລະ ພະນັກງານລັດຖະກອນທີ່ກ່ຽວຂ້ອງເຂົ້າຮ່ວມຈໍານວນໜຶ່ງ.

          ທ່ານ ຄຳຜັນ ຄູນສະຫວັນ ຄະນະປະຈໍາພັກແຂວງ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ໄດ້ຂຶ້ນກ່າວຕ້ອນຮັບ ແລະ ກ່າວຈຸດປະສົງຂອງກອງປະຊຸມໃນຄັ້ງນີ້, ຫຼັງຈາກນັ້ນປະທານກອງປະຊຸມກໍ່ໄດ້ຕັ້ງມີຄໍາຖາມເຈາະຈິ້ມ ເພື່ອໃຫ້ພະແນກການທີ່ກ່ຽວຂ້ອງລາຍງານ, ກອງປະຊຸມໄດ້ຮັບຟັງການລາຍງານຂອງທ່ານ ຫົວໜ້າພະແນກ ການເງິນແຂວງ ແລະ ຕາງໜ້າທີ່ມາຈາກກອງຄຸ້ມຄອງພາສີ VI, ປະທານກອງປະຊຸມໄດ້ເປີດໂອກາດໃຫ້ບັນດາທ່ານຜູ້ແທນກອງປະຊຸມປະກອບຄຳເຫັນໃສ່ບົດລາຍງານຂອງສອງພະແນກການທີ່ໄດ້ລາຍງານຜ່ານມານັ້ນ.

ໃນຕອນທ້າຍ ປະທານກອງປະຊຸມ ໄດ້ມີຄໍາເຫັນໂອ້ລົມ ແລະ ສະຫລຸບຕີລາຄາສູງຕໍ່ໝາກຜົນ ຜົນງານທີ່ທຸກພາກສ່ວນຍາດມາໄດ້. ຕໍ່ກັບການລາຍງານຂອງບັນດາທ່ານ ໃນການຈັດຕັ້ງວຽກງານຜ່ານມາທີ່ກ່າວຂ້າງເທິງນັ້ນ, ຄະນະພວກເຮົາໄດ້ເກັບກໍາເປັນຂໍ້ມູນອັນສໍາຄັນໃນການນໍາໄປຄົ້ນຄົ້ວປຶກສາຫາລື ແລະ ສະເໜີຕໍ່ຄະນະປະຈໍາສະພາແຫ່ງຊາດ ເພື່ອປະເມີນການຈັດຕັ້ງປະຕິບັດໃຫ້ເກີດດອກອອກຜົນໃນຕໍ່ໜ້າ.