ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

ໃນໂອກາດເຂົ້າຮ່ວມກອງປະຊຸມທາບທາມຄຳເຫັນໃສ່ຮ່າງກົດໝາຍ 12 ສະບັບ ຢູ່ທີ່ແຂວງອຸດົມໄຊ ທ່ານ ຄໍາດີ ວົງລ້ອມ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 04, ປະທານ ສພຂ, ໄດ້ຕາງໜ້າຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 04 ແລະ ສະມາຊິກສະພາປະຊາຊົນແຂວງອຸດົມໄຊ ໄດ້ໃຫ້ສໍາພາດຕໍ່ກົມສື່ມວນຊົນ ສະພາແຫ່ງຊາດ ລາຍການ “ກົດໝາຍເພື່ອປະຊາຊົນ” ໃນຕອນເຊົ້າຂອງວັນພະຫັດ, ວັນທີ 27 ຕຸລາ 2022 ວ່າ:

ໄລຍະຜ່ານມາເຫັນວ່າ ການໂຄສະນາເຜີຍແຜ່ກົດໝາຍທີ່ໄດ້ຮັບຮອງໄປແລ້ວ 156 ກວ່າສະບັບ ໄດ້ຈັດຕັ້ງປະຕິບັດແຕ່ສູນກາງຮອດທ້ອງຖິ່ນ ຈາກຂະແໜງການທີ່ກ່ຽວຂ້ອງເປັນຕົ້ນແມ່ນຂະແໜງການຍຸຕິທຳ, ສະພາປະຊາຊົນແຂວງ, ໄອຍະການປະຊາຊົນ, ສານປະຊາຊົນ, ປກຊ-ປກສ ໄດ້ເປັນເຈົ້າການເຜີຍແຜ່ໃຫ້ພະນັກງານ-ລັດຖະກອນ ຕະຫຼອດຮອດປະຊາຊົນບັນດາເຜົ່າ ດ້ວຍຮູບການເຜີຍແຜ່ທາງວິທະຍຸ, ທາງໂທລະໂຄ່ງ ແລະ ອື່ນໆ ທັງນີ້ກໍ່ເພື່ອເປັນການໂຄສະນາ, ປຸກລະດົມ, ສຶກສາອົບຮົມສ້າງຄວາມຮັບຮູ້, ຄວາມເຂົ້າໃຈ, ສ້າງສະຕິເຄົາລົບກົດໝາຍ ຕິດພັນກັບການດໍາລົງຊີວິດຫາກິນລ້ຽງຊີບອັນບໍລິສຸດຕໍ່ໜ້າກົດໝາຍ, ສ້າງຄວາມເປັນເອກະພາບ ທາງດ້ານທັດສະນະ, ຄວາມຮັບຮູ້ເຂົ້າໃຈ ແລະ ການກະທຳຕົວຈິງຂອງປະຊາຊົນໃນທົ່ວແຂວງ ໃນການຈັດຕັ້ງປະຕິບັດກົດໝາຍໃຫ້ໄດ້ຢ່າງເດັດຂາດ ແລະ ເຂັ້ມງວດ.

ຕໍ່ການປະເມີນການຈັດຕັ້ງປະຕິບັດກົດໝາຍ 12 ສະບັບ ທີ່ຈະນຳເຂົ້າພິຈາລະນາ ແລະ ຮັບຮອງເອົາໃນກອງປະຊຸມສະໄໝສາມັນເທື່ອທີ 4 ຂອງ ສພຊ ຊຸດທີ IX ໃນຄັ້ງນີ້ ເຫັນວ່າມີຫຼາຍບັນຫາມີຄວາມຈໍາເປັນຕ້ອງໄດ້ສ້າງ ແລະ ປັບປຸງ ເພື່ອໃຫ້ສອດຄ່ອງກັບສະພາບຊີວິດ-ສັງຄົມໃນຕົວຈິງ, ທັງເປັນການຕອບສະໜອງຕໍ່ຄວາມຮຽກຮ້ອງຕ້ອງການ ໃນການຄຸ້ມຄອງບໍລິຫານລັດດ້ວຍກົດໝາຍ. ສ້າງໄດ້ເນື້ອໃນທີ່ຫັດກຸມ, ຊັດເຈນ, ຄົບຖ້ວນ, ສະນັ້ນ ການທາບທາມ ແລະ ການປະກອບຄຳເຫັນຄັ້ງນີ້ແມ່ນ ເພື່ອເປັນການອຸດສ່ອງຫວ່ານສວຍໃຊ້ ກົດໝາຍໄປໃນທາງທີ່ບໍ່ສອດຄ່ອງ ໃນການຈັດຕັ້ງປະຕິບັດຂອງພະນັກງານ, ການລົງທຶນພາຍໃນ ແລະ ຕ່າງປະເທດ.

ຕອນທ້າຍ, ທ່ານຍັງໄດ້ຮຽກຮ້ອງມາຍັງບັນດາກະຊວງ, ພະແນກການ ແລະ ພາກສ່ວນຕ່າງໆ ເພີ່ມທະວີໃນການໂຄສະນາເຜີຍແຜ່ບັນດາກົດໝາຍ ໃຫ້ພະນັກງານ-ລັດຖະກອນ ແລະ ພໍ່ແມ່ປະຊາຊົນໃຫ້ກວ້າງຂວາງ ແລະ ເລິກ ເຊິ່ງກວ່າເກົ່າ ເພື່ອເປັນການສ້າງສະຕິໃຫ້ເຂົາເຈົ້າມີຄວາມເຂົ້າໃຈເຄົາລົບກົດໝາຍ ຕິດພັນກັບການຈັດຕັ້ງປະຕິບັດກົດໝາຍໃຫ້ເຂັ້ມງວດກວ່າເກົ່າ ເພື່ອກ້າວໄປສູ່ການສ້າງລັດແຫ່ງກົດໝາຍ ແລະ ຂໍຮຽກຮ້ອງມາຍັງບັນດາທ່ານຄະນະພັກທຸກໆຂັ້ນ, ພະນັກງານ-ລັດຖະກອນ, ທະຫານ-ຕໍາຫຼວດ ຈົ່ງເປັນເຈົ້າການໃນການຈັດຕັ້ງປະຕິບັດ ແລະ ໂຄສະນາປຸກ ລະດົມເຜີຍແຜ່ກົດໝາຍໃຫ້ກວ້າງຂວາງ ແລະ ເລິກເຊິ່ງ ພ້ອມທັງເປັນແບບຢ່າງນຳໜ້າໃນການເຄົາລົບ, ປະຕິບັດກົດ ໝາຍຢ່າງເຂັ້ມງວດ ແລະ ຮຽກຮ້ອງມາຍັງປະຊາຊົນບັນດາເຜົ່າ, ນັກທຸລະກິດ, ຜູ້ປະກອບການຕ່າງໆ ຈົ່ງໄດ້ສຶກສາ, ຮຽນຮູ້ບັນດາກົດໝາຍຕ່າງໆ ໂດຍສະເພາະແມ່ນບັນດາກົດໝາຍທີ່ພົວພັນກັບການເຄື່ອນໄຫວດຳລົງຊີວິິດ ຕິດພັນກັບການປະກອບອາຊີບຂອງຕົນ, ເພື່ອປະຕິບັດສິດ, ພັນທະຂອງຕົນຢ່າງຖືກຕ້ອງ ແລະ ຄົບຖ້ວນ ປະກອບສ່ວນໃນການເຄົາລົບ ແລະ ປະຕິບັດກົດໝາຍຢ່າງເຂັ້ມງວດ.

ພາບ/ຂ່າວ: ແສງພອນ ອິນນະລົງ.