ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


ໃນວັນທີ 21 ຕຸລາ ຜ່ານມານີ້. ສະມາຊິກສະພາແຫ່ງຊາດ (ສສຊ) ເຂດເລືອກຕັ້ງທີ 17 ແຂວງອັດຕະປື ໄດ້ລົງເຜີຍແຜ່ເນື້ອໃນຜົນສຳເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນແຂວງ (ສພຂ) ຊຸດທີ II​ ຢູ່ດ່ານສາກົນພູເກືອ. ນໍາໂດຍ ທ່ານ ນາງ ມີນາພອນ ໄຊສົມພູ ປະທານຄະນະ ສສຊ ເຂດ17 ປະທານ ສພຂ, ພ້ອມຄະນະ, ເຂົ້າຮ່ວມມີ: ທ່ານ ພັອ ໂພໄຊ ສຸລິວົງສາ ຫົວໜ້າຄະນະຄຸ້ມຄອງດ່ານສາກົນພູເກືອ, ມີບັນດາທ່ານຄະນະຄຸ່ມຄອງດ່ານ, ພະນັກງານ-ລັດຖະກອນປະຈໍາດ່ານ, ທະຫານຊາຍແດນ ພ້ອມດ້ວຍອໍານາດການປົກຄອງບ້ານພູເກືອເຂົ້າຮ່ວມ.
ໂອກາດນີ້, ທ່ານ ພັອ ໂພໄຊ ສຸລິວົງສາ ຫົວໜ້າຄະນະຄຸ້ມຄອງດ່ານສາກົນພູເກືອ ໄດ້ລາຍງານສະພາບລວມຂອງດ່ານໃຫ້ຊາບວ່າ: ດ່ານສາກົນພູເກືອແມ່ນດ່ານໜຶ່ງຂອງ ສປປ ລາວ ຕັ້ງຢູ່ ເມືອງພູວົງ ແຂວງອັດຕະປື, ຫ່າງຈາກ ເມືອງ ສາມັກຄີໄຊ ເທດສະບານແຂວງ 113 Km ຕາມເສັ້ນທາງ 18 B ຕິດກັບດ່ານສາກົນ ເບິອິ ເມືອງ ງອກໂຫ້ຍ ແຂວງກອນຕູມ ( ສສຫວຽດນາມ ), ເຊີ່ງມີຄວາມສຳຄັນດ້ານຍຸດທະສາດ, ການເມືອງ, ເສດຖະກິດ – ສັງຄົມ ກັບຕ່າງປະເທດ, ເປົ້າໝາຍສໍາຄັນຂອງດ່ານແມ່ນການກວດການການເຂົ້າ-ອອກປະເທດຂອງຜູ້ໂດຍສານ, ຍານພາຫະນະ, ສິນຄ້າເຄື່ອງຂອງ ຂອງບັນດາປະເທດທີ່ມີຊາຍແດນຕິດຈອດກັນ ແລະ ບັນດາປະເທດອື່ນ, ດ່ານສາກົນພູເກືອແມ່ນອົງການຈັດຕັ້ງບໍລິຫານລັດໂດຍສັງກັດຢູ່ໃນໂຄງປະກອບການຈັດຕັ້ງຂອງແຂວງ, ຂື້ນກັບການຊີ້ນຳຂັ້ນແຂວງໂດຍກົງ ທັງເປັນກົງຈັກຊ່ວຍວຽກໃຫ້ແກ່ອໍານາດການປົກຄອງແຂວງ ແລະ ຄະນະພັກແຂວງ, ດ່ານສາກົນພູເກືອ ມີເນື້ອທີ່ທັງໝົດ 32,33 ເຮັກຕາ ໃນນີ້ມີສໍານັກງານເຮັດວຽກ, ມີເຮືອນພັກພະນັກງານ, ມີສາງສິນຄ້າ, ມີຮ້ານອາຫານຂະໜາດນອ້ຍ ສຳລັບຮັບໃຊ້ບໍລິການຕອ້ນຮັບແຂກ ໄປ-ມາ ທັງພາຍໃນ ແລະ ຕ່າງປະເທດທີ່ເຂົ້າມາເຮັດວຽກ – ຢ້ຽມຢາມ ແລະ ທ່ອງທ່ຽວໄປມາ.
ຈາກນັ້ນ, ບັນດາທ່ານ ສະມາຊິກສະພາແຫ່ງຊາດ ເຂດເລືອກຕັ້ງທີ 17 ໄດ້ຜັດປ່ຽນກັນຍົກເອົາບັນຫາສໍາຄັນທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II.ເຊິ່ງແນໃສ່ເຮັດໃຫ້ພະນັກງານ-ລັດຖະກອນ ຮັບຮູ້ ແລະ ເຂົ້າໃຈຕໍ່ການນຳພາຂອງພັກ, ລະບຽບກົດຫມາຍຂອງລັດ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືຂອງແຂວງ ແລະ ແນ່ໃສ່ຮັບຮູ້ ແລະ ເຂົ້າໃຈຕໍ່ລະບົບກົງຈັກການຈັດຕັ້ງ, ພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ ແລະ ເນື້ອໃນວຽກງານສຳຄັນທີ່ໄດ້ພິຈາລະນາຮັບຮອງເອົາໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ພ້ອມກັນນໍາເອົານິຕິກໍາໃຕ້ກົດໝາຍ ກໍຄືມະຕິທີ່ໄດ້ຮັບຮອງໄປຈັດຕັ້ງເຜີຍແຜ່ ແລະ ຈັດຕັ້ງປະຕິບັດຫັນເຂົ້າໃນວຽກງານຂອງຕົນຢ່າງເປັນຮູບປະທໍາ ແລະ ມີຜົນສໍາເລັດ ເຮັດໃຫ້ພໍ່ແມ່ປະຊາຊົນຫລຸດພົ້ນອອອກຈາກຄວາມທຸກຍາກເປັນກ້າວໆ.
ໃນນັ້ນ, ຜູ້ເຂົ້າຮ່ວມຍັງໄດ້ມີຄໍາສະເໜີ ແລະ ແລກປ່ຽນຄໍາຄິດຄໍາເຫັນ ເຊິ່ງມີຫລາຍບັນຫາເປັນຕົ້ນ: ຂໍ້ຄົງຄ້າງພາຍໃນດ່ານ, ບັນຫາດ້ານສິ່ງແວດລ້ອມ ແລະ ປະກົດການຫຍໍ້ທໍ້ຕ່າງໆ ບາງຄໍາສະເໜີ ສສຊ ຍັງໄດ້ຮັບເອົາໄປຄົ້ນຄວ້າ ນໍາສະເໜີຕາມຂັ້ນຕອນເພື່ອໃຫ້ພາກສ່ວນທີ່ກ່ຽວຂ້ອງລົງຕິດຕາມແກ້ໄຂຕາມຄວາມເໝາະສົມ.
(ນັກຂ່າວ: ສພຂ ອັດຕະປື)