ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 1-2 ສິງຫາ 2022 ນີ້, ສະພາປະຊາຊົນແຂວງໄຊສົມບູນ ໄດ້ເປີດກອງປະຊຸມຍົກສູງຄຸນນະພາບທາງດ້ານເນື້ອໃນ ດໍາເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງໄຊສົມບູນ ຊຸດທີ II ຂຶ້ນທີ່ ສະໂມສອນໃຫຍ່ເມືອງອະນຸວົງ ໂດຍພາຍໃຕ້ການເປັນປະທານຂອງ ທ່ານ ແດງ ປະທຸມທອງ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 18, ປະທານຄະນະປະຈໍາ, ປະທານສະພາປະຊາຊົນແຂວງໄຊສົມບູນ ຊຸດທີ II, ເຂົ້າຮ່ວມມີ ທ່ານ ຄໍາພູທອນ ວົງພະຈັນ ເລຂາໜ່ວຍພັກ, ຮອງປະທານສະພາປະຊາຊົນແຂວງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ ເມືອງອະນຸວົງ ພ້ອມດ້ວຍ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້້ງບັນດາເມືອງ ຕະຫຼອດຮອດ ບັນດາທ່ານ ຫົວໜ້າ, ຮອງຫົວໜ້າພະແນກ, ອົງການ, ກົມກອງ,​ ລັດວິສາຫະກິດ ອ້ອມຂ້າງແຂວງໄຊສົມບູນ ເຂົ້າຮ່ວມຢ່າງພ້ອມພຽງ.

ທັງນີ້ ກໍເພື່ອເປັນການສ້າງເງື່ອນໄຂໃຫ້ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງໄຊສົມບູນ  ໄດ້ຮັບຟັງການລາຍງານ, ການຊີ້ແຈງອະທິບາຍ ຂອງບັນດາທ່ານ ຫົວໜ້າ, ຮອງຫົວໜ້າພະແນກ, ອົງການ, ກົມກອງທີ່ກ່ຽວຂ້ອງກັບເນື້ອໃນຕ່າງໆ ພ້ອມທັງປຶກສາຫາລືແລກປ່ຽນຂໍ້ມູນເຊິ່ງກັນ ແລະກັນ ລະຫວ່າງສະມາຊິກສະພາປະຊາຊົນແຂວງໄຊສົມບູນ ແລະ ຄະນະນໍາພະແນກການທີ່ກ່ຽວຂ້ອງ ແນ່ໃສໃຫ້ມີຄວາມເຂົ້າໃຈຢ່າງເລິກເຊິ່, ເປັນເອກະພາບ ເຊິ່ງຈະເປັນຂໍ້ສະດວກ ໃຫ້ແກ່ການພິຈາລະນາຮັບຮອງເອກະສານຕ່າງໆ ຢູ່ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງໄຊສົມບູນ ຊຸດທີ II ໃຫ້ມີປະສິດທິຜົນ ບັນລຸຕາມເປົ້າໝາຍທີ່ກໍານົດໄວ້.

ກອງປະຊຸມຄັ້ງນີ້ ໄດ້ສຸມໃສ່ພິຈາລະນາ ແລະ ສ້າງຄວາມເຂົ້າໃຈ ຕໍ່ບັນດາເນື້ອໃນຕ່າງໆ ທີ່ມີຄວາມໝາຍອັນສໍາຄັນຂອງແຂວງໄຊສົມບູນຄື:

ຮັບຟັງບົດລາຍງານຫຍໍ້ຂອງ ທ່ານ ເຈົ້າແຂວງໄຊສົມບູນ ກ່ຽວກັບສະພາບການພັດທະນາໂດຍລວມຢູ່ແຂວງ ນໍາສະເໜີໂດຍ ທ່ານ ສົມບູນ ສອນລິດທິເດດ ຫົວໜ້າຫ້ອງວ່າການແຂວງ; ຮັບຟັງບົດລາຍງານ ກ່ຽວກັບບົດລາຍງານແຜນພັດທະນເສດຖະກິດ-ສັງຂອງແຂວງ ປະຈໍາ 6 ເດືອນຕົນປີ ແລະແຜນການ 6 ເດືອນທ້າຍປີ 2022 ນໍາສະເໜີໂດຍ ທ່ານ ພູພັດ ສິງທາວົງໄຊ ຮອງຫົວໜ້າພະແນກແຜນການ ແລະການລົງທຶນແຂວງ; ຮັບຟັງບົດລາຍງານກ່ຽວກັບແຜນງົບປະມານ ປະຈໍາ 6 ເດືອນຕົ້ນປີ ແລະແຜນການ 6 ເດືອນທ້າຍປີ 2022 ນໍາສະເໜີໂດຍ ທ່ານ ມີໄຊ ຂຸນພົນ ຮອງຫົວໜ້າພະແນກການເງິນແຂວງ; ຮັບຟັງບົດລາຍງານກ່ຽວກັບການຈັດຕັ້ງປະຕິບັດ ດໍາລັດ 414/ລບ, ປະຈໍາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022 ໂດຍຫົວໜ້າກອງເລຂາ 414; ຮັບຟັງການລາຍງານ ການຈັດຕັ້ງປະຕິບັດວຽກງານແກ້ໄຂຄວາມທຸກຍາກ ຂອງແຂວງໄຊສົມບູນ ຕາມມະຕິຂອງສະພາປະຊາຊົນແຂວງໄຊສົມບູນ ສະບັບເລກທີ 21/ສພຂ-ຊບ, ລົງວັນທີ 18 ກຸມພາ 2022 ໂດຍຫົວໜ້າກອງເລຂາຄະນະສະເພາະກິດແກ້ໄຂຄວາມທຸກຍາກ; ຮັບຟັງແຜນການເຄື່ອນໄຫວ ແລະ ແຜນງົບປະມານການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍຫົວໜ້າກອງເລຂາ; ຮັບຟັງແຜນການເຄື່ອນໄຫວ ແລະ ແຜນງົບປະມານ ການແກ້ໄຂບັນຫາຢາເສບຕິດ ໂດຍຫົວໜ້າກອງເລຂາ.

ພາຍຫຼັງທີ່ໄດ້ຮັບຟັງ ການຜ່ານບົດລາຍງານຕ່າງໆ ທີ່ກ່າວມາຂ້າງເທິງນັ້ນສໍາເລັດແລ້ວ ໃນໂອກາດດັ່ງກ່າວນັ້ນ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ສຸມສະຕິປັນຍາຄວາມຮູ້, ຄວາມສາມາດຂອງຕົນ ປະກອບຄໍາເຫັນແລກປ່ຽນບົດຮຽນ ແລະ ພ້ອມທັງມີຄໍາສະເໜີ ໃນຫຼາຍໆບັນຫາທີ່ບໍ່ທັນເຂົ້າໃຈ ຕໍ່ການປະຕິບັດຈັດຕັ້ງວຽກງານຂອງພະແນກການທີ່ກ່ຽວຂ້ອງ ເພື່ອໃຫ້ໄດ້ເນື້ອໃນທີ່ແທດເໝາະກັບສະພາບຄວາມເປັນຈິງ.

ພ້ອມດຽວກັນນີ້ ບັນດາທ່ານ ຫົວໜ້າ, ຮອງຫົວໜ້າພະແນກ, ອົງການ, ກົມກອງທີ່ກ່ຽວຂ້ອງ ໄດ້ຜັດປ່ຽນກັນຂຶ້ນລາຍງານ, ຊີ້ແຈງ, ອະທິບາຍ ຕໍ່ຄໍາຊັກຖາມ ຂອງບັນດາທ່ານ ຜູ້ແທນໃຫ້ຊັດເຈນ ທັງນີ້ກໍເພື່ອ ເຮັດໃຫ້ຜູ້ແທນປະຊາຊົນ ສາມາດນໍາເອົາຄໍາຕອບທີ່ສໍາຄັນດັ່ງກ່າວເຫຼົ່ານັ້ນ ເປັນຂໍ້ມູນທາງດ້ານເນື້ອໃນທີ່ມີຄຸນນະພາບໜັກແໜ້ນ ເຊື່ອຖືໄດ້ ໃຫ້ແກ່ ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງໄຊສົມບູນ ຊຸດທີ II ແລະ ພ້ອມທັງເປັນຂໍ້ມູນທີ່ຈະນໍາໄປ ແຈ້ງຂ່າວ, ໂຄສະນາເຜີຍແຜ່ໃຫ້ແກ່ ພໍ່ແມ່ປະຊາຊົນບັນດາເຜົ່າ ຜູ້ມີສິດເລືອກຕັ້ງ ທົ່ວແຂວງໄຊສົມບູນ ຮັບຮູ້ຢ່າງທົ່ວເຖິງກັນ.

(ນາງ ອໍາໄພພອນ ແກ້ວວິໄລ)