(ສພຊ) – ກອງປະຊຸມເຝິກອົບຮົມຍົກສູງຂີດຄວາມສາມາດໃນການກະກຽມເນື້ອໃນຕ່າງໆ ແລະ ທັກສະໃນການຮ່າງບົດລາຍງານຫຍໍ້, ການບັນທຶກ, ບົດສັງລວມຂໍ້ມູນ, ການຕີພິມ (Track-Changes) ແລະ ອື່ນໆ ໃຫ້ແກ່ວິ ຊາການໃນການກະກຽມຄວາມພ້ອມຮັບໃຊ້ກອງປະຊຸມໄອປາ (AIPA) ຄັ້ງທີ 45 ໄດ້ຈັດຂຶ້ນໃນວັນທີ 1-2 ຕຸລານີ້ ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ນາງ ວັນດີ ບຸດທະສະວົງ ຮອງປະທານກໍາມາທິການການຕ່າງປະເທດ ເຊິ່ງການເຝິກອົບຮົມເນັ້ນໃສ່ບັນຫາສໍາຄັນດັ່ງນີ້:

1. ການດຳເນີນກອງປະຊຸມສະມັດຊາໃຫຍ່ໄອປາຄັ້ງທີ 45: ວາລະການປະຊຸມ, ຂັ້ນຕອນ, ປະເດັນເຫດການທີ່ສຳ ຄັນ, ພາບລວມຂອງຄະນະກຳມະການ;
2. ຂໍ້ມູນເບື້ອງຕົ້ນກ່ຽວກັບກອງປະຊຸມສະມັດຊາໃຫຍ່ໄອປາ (ຄວາມເປັນມາຂອງ AIPA,​ ໜ້າທີ່, ກົດລະບຽບ ແລະ ແນວທາງໃນການປະຕິບັດ);
3. ຄູ່ມື, ການຮ່າງບົດລາຍງານຫຍໍ້, ການບັນທຶກ, ການສັງລວມຂໍ້ມູນ, ການຕີພິມ, ບົດລາຍງານຂອງກອງປະຊຸມກຳມາທິການ ແລະ ກອງປະຊຸມພົບປະກັບປະເທດສັງເກດການ, ຂັ້ນຕອນ ແລະ ເຫດການຕ່າງໆ;
4. ການກະກຽມກອງປະຊຸມສາກົນ ໂດຍເນັ້ນໜັກການກະກຽມຄວາມພ້ອມ ແລະ ການດຳເນີນກອງປະຊຸມ, ພາ ລະບົດບາດ-ໜ້າທີ່ຂອງພະນັກງານຮັບໃຊ້, ການທົບທວນຄືນ ແລະ ປັບປຸງເອກະສານ, ການເຂົ້າເຖິງຂໍ້ມູນ;
5. ການກະກຽມຄວາມພ້ອມໃຫ້ແກ່ກອງປະຊຸມກຳມາທິການຕ່າງໆ;
6. ຂັ້ນຕອນການກະກຽມຮ່າງມະຕິ ແລະ ການຄົ້ນຄວ້າປະກອບຄຳເຫັນຂອງຄະນະຜູ້ແທນ;
7. ການກະກຽມເອກະສານສຳລັບກອງປະຊຸມພົບປະລະຫວ່າງຜູ້ນຳອາຊຽນ-ໄອປາ, ໜ້າທີ່ຄວາມຮັບຜິດຊອບ ແລະ ບັນຫາອື່ນໆທີ່ກ່ຽວຂ້ອງ.

ທ່ານ ນາງ ວັນດີ ບຸດທະສະວົງ ໄດ້ມີຄຳເຫັນວ່າ: ການເຝິກອົບຮົມຄັ້ງນີ້ ເປັນໂອກາດທີ່ດີໃຫ້ແກ່ຜູ້ເຂົ້າຮ່ວມໄດ້ຮຽນຮູ້, ແລກປ່ຽນປະສົບການ, ຖອດຖອນບົດຮຽນນຳຊ່ຽວຊານມາຈາກຫຼາຍປະເທດ, ຫຼາຍສາຂາວິຊາ ທີ່ຈະສົ່ງຄວາມຮູ້ໃຫ້ ເພື່ອນຳໄປໃຊ້ເຂົ້າໃນວຽກງານຕົວຈິງ ໂດຍສະເພາະແມ່ນບັນດາໜ້າວຽກທີ່ຈະໄດ້ກະກຽມຄວາມພ້ອມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ທີ່ຈະເປີດຂຶ້ນໃນມໍ່ໆມານີ້.

ກອງປະຊຸມຄັ້ງນີ້ ມີບັນດາຄະນະຮັບຜິດຊອບຈາກແຕ່ລະອະນຸກຳມະການທີ່ຮັບໃຊ້ກອງປະຊຸມໃຫຍ່ໄອປາ ຄັ້ງທີ 45, ຊ່ຽວຊານທີ່ມາຈາກຕ່າງປະເທດ, ກອງເລຂາໄອປາ, ສູນຄົ້ນຄວ້າລັດຖະສະພາອາຊີ (PCASia), ໂຄງການ ສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ແລະ ກອງເລ ຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ (ICPMS) ເຂົ້າຮ່ວມຢ່າງພ້ອມພຽງ ໂດຍໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກສະເຕັບສ໌ ໂດຍຜ່ານ ICPMS ສົມທົບກັບງົບປະມານຂອງຄະນະເລຂາທິ ການສະພາແຫ່ງຊາດ.

(ກົງທະນູຄຳ ພິພັດເສລີ)