(ສພຊ) ເພື່ອຍົກລະດັບຄວາມຮູ້ ຄວາມສາມາດໃຫ້ແກ່ພະນັກງານ-ລັດຖະກອນ ໃນການເປັນເສນາທິການໃຫ້ແກ່ຄະນະປະຈຳສະພາແຫ່ງຊາດ ເພື່ອໃຫ້ມີຄວາມເອກະພາບກັນ ພາຍໃນສະພາແຫ່ງຊາດ ແລະ ເຝິກອົບຮົມໃນການຂີດຂຽນເອກະສານຮັບໃຊ້ວຽກງານ ຂອງກຳມາທິການຍຸຕິທຳ ສະພາແຫ່ງຊາດ ຕາມພາລະບົດບາດ, ສິດ ແລະ ໜ້າທີ່ ໃນການຕິດຕາມກວດກາ ແລະ ການແກ້ໄຂຄຳຮ້ອງຂໍຄວາມເປັນທຳ ໃຫ້ມີປະສິດທິພາບ ແລະ ຖືກຕ້ອງ ຕາມກົດໝາຍ. ໃນລະຫວ່າງວັນທີ 27-28 ກຸມພາ 2023 ກໍາມາທິການຍຸຕິທຳ ສະພາແຫ່ງຊາດ ໄດ້ເປີດກອງປະຊຸມ ເຝິກອົບຮົມສ້າງຄວາມເຂັ້ມແຂງ ແລະ ຍົກລະດັບຄວາມຮູ້ ໃຫ້ແກ່ພະນັກງານ-ວິຊາການ ວຽກງານຄຳຮ້ອງຂໍຄວາມເປັນທຳ ທີ່ສູນເຝິກອົບຮົມ ສູນກາງແນວລາວສ້າງຊາດ ໂດຍການເປັນປະທານຂອງທ່ານ ສີສູນທອນ ສ.ຜາບມີໄຊຍ໌ ຮອງປະທານກຳມາທິການຍຸຕິທຳ, ມີບັນດາຄະນະກົມ, ຄະນະພະແນກ ພາຍໃນກຳມາທິການຍຸຕິທຳ ແລະ ປກຊ-ປກສ ສະພາປະຊາຊົນຂັ້້ນແຂວງຈຳນວນ 11 ແຂວງຄື: ນະຄອນຫຼວງວຽງຈັນ, ວຽງຈັນ, ໄຊຍະບູລີ, ຫຼວງພະບາງ, ຊຽງຂວາງ, ຫົວພັນ, ອຸດົມໄຊ, ຜົ້ງສາລີ, ຫຼວງນໍ້າທາ, ບໍ່ແກ້ວ ແລະ ໄຊສົມບູນ) ເຂົ້າຮ່ວມ.

ໂອກາດດັ່ງກ່າວ ທ່ານ ສີສູນທອນ ສ.ຜາບມີໄຊຍ໌ ໄດ້ກ່າວເປີດກອງປະຊຸມວ່າ: ກຳມາທິການຍຸຕິທໍາ ແມ່ນກົງຈັກການຈັດຕັ້ງໜຶ່ງ ຂອງສະພາແຫ່ງຊາດ, ເປັນເສນາທິການໃຫ້ແກ່ສະພາແຫ່ງຊາດ ແລະ ຄະນະປະຈຳສະພາແຫ່ງຊາດ ໃນການປະຕິບັດພາລະບົດບາດນິຕິບັນຍັດ, ຕົກລົງບັນຫາສໍາຄັນຂອງຊາດ ແລະ ຕິດຕາມກວດກາ ໃນຂົງເຂດວຽກງານຍຸຕິທໍາ ແລະ ເປັນໃຈກາງການຮັບ, ແຈກຢາຍຄໍາຮ້ອງຂໍຄວາມເປັນທໍາຂອງຄະນະປະຈໍາສະພາແຫ່ງຊາດ. ພາຍຫຼັງກົດໝາຍວ່າດ້ວຍ ການແກ້ໄຂຄໍາຮ້ອງທຸກ ໄດ້ຮັບການປັບປຸງໃນປີ 2022 ແລະ ຄະນະປະຈໍາສະພາແຫ່ງຊາດໄດ້ອອກມະຕິ ວ່າດ້ວຍການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ, ຈຶ່ງມີຄວາມຈໍາເປັນ ຕ້ອງໄດ້ເຜີຍແຜເຊື່ອມຊຶມ ແລະ ສ້າງຄວາມຮັບຮູ້ ຄວາມເຂົ້າໃຈ ກໍຄືການສ້າງຄວາມເຂັ້ມແຂງ ໃຫ້ແກ່ພະນັກງານ-ລັດຖະກອນ ພາຍໃນກໍາມາທິການ ແລະ ວິຊາການ ພາຍໃນຄະນະກໍາມາທິການຍຸຕິທໍາ, ປກຊ-ປກສ ກ່ຽວກັບວຽກງານຄໍາຮ້ອງຂໍຄວາມເປັນທໍາ. ກອງປະຊຸມຄັ້ງນີ້ ຖືໄດ້ວ່າເປັນຄັ້ງທໍາອິດ ພາຍຫຼັງທັງສອງນິຕິກໍາດັ່ງກ່າວ ມີຜົນຈັດຕັ້ງປະຕິບັດ ເພື່ອຍົກລະດັບຄວາມຮູ້ ແລະ ສ້າງຄວາມເຂົ້າໃຈໃຫ້ເປັນເອກະພາບກັນ ກ່ຽວກັບວຽກງານຄໍາຮ້ອງຂໍຄວາມເປັນທໍາ ຂອງສະພາແຫ່ງຊາດ, ຈຶ່ງຂໍສະເໜີໃຫ້ບັນດາທ່ານ ຍົກສູງຄວາມຮັບຜິດຊອບຂອງຕົນ ສຸມໃສ່ຄົ້ນຄວ້າ ແລະ ປະກອບຄຳຄິດ, ຄຳເຫັນ ຢ່າງກົງໄປກົງມາ, ພາວະວິໄສ ຕໍ່ບັນດາເນື້ອໃນຂອງກອງປະຊຸມ ເພື່ອເຮັດໃຫ້ກອງປະຊຸມເຝິກອົບຮົມສ້າງຄວາມເຂັ້ມແຂງ ແລະ ຍົກລະດັບຄວາມຮູ້ ໃຫ້ແກ່ພະນັກງານ-ວິຊາການ ຄັ້ງນີ້ ບັນລຸຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້.

ຈາກນັ້ນ ກອງປະຊຸມຍັງໄດ້ຮັບຟັງ ການສະເໜີບົດ ການຕ້ອນຮັບ ແລະ ໃຫ້ຄຳປຶກສາປະຊາຊົນ ຂອງກຳມາທິການຍຸຕິທຳ ໂດຍທ່ານ ນາງ ກັນທິນາ ປ້ານອິນຫວນ ຫົວໜ້າກົມຕິດຕາມກວດກາວຽກງານຍຸຕິທຳ ແລະ ຮັບຟັງການສະເໜີບົດ ການພິຈາລະນາຄຳຮ້ອງຂໍຄວາມເປັນທຳ ຕາມກົນໄກໃໝ່ ທີ່ໄດ້ແຍກອອກເປັນ 8 ປະເພດ ໂດຍທ່ານ ໄກມະນິນ ເທບບົວລີ ຫົວໜ້າກົມຄຳຮ້ອງຂໍຄວາມເປັນທຳ.

(ພາບ ແລະ ຂ່າວ: ອານຸສອນ ພູມມີທອນ)