ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນຕອນເຊົ້າຂອງວັນທີ 21 ກັນຍາ 2022, ທີ່ສະໂມສອນແຂວງຈຳປາສັກ, ກຳມາທິການຍຸຕິທຳ ສະພາແຫ່ງຊາດ ໄດ້ເປີດກອງປະຊຸມຍົກສູງຂີດຄວາມສາມາດ ໃຫ້ແກ່ກຳມະການຂອງກຳມາທິການຍຸຕິທຳ, ຄະນະກຳມະການຍຸຕິທຳ ປກຊ-ປກສ ສະພາປະຊາຊົນຂັ້ນແຂວງ ແລະ ພະນັກງານເສນາທິການຊ່ວຍວຽກ ໃນການຮັບ ແລະ ພິຈາລະນາຄຳຮ້ອງຂໍຄວາມເປັນທຳ ໂດຍການເປັນປະທານກອງປະຊຸມຂອງທ່ານ ຄຳແພງ ວິລະພັນ ກຳມະການຄະນະປະຈຳ, ປະທານກຳມາທິການຍຸຕິທຳ, ມີບັນດາທ່ານປະທານ, ຮອງປະທານສະພາປະຊາຊົນຂັ້ນແຂວງ, ສະມາຊິກສະພາແຫ່ງຊາດ ທີ່ເປັນກໍາມະການຂອງກໍາມາທິການຍຸຕິທໍາ, ຄະນະກໍາມະການຍຸຕິທໍາ ປກຊ-ປກສ ແລະ ສະມາຊິກສະພາປະຊາຊົນແຂວງ, ຈາກ 5 ແຂວງ ຄື: ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອັດຕະປື; ມີຄະນະກົມ, ຄະນະພະແນກ ແລະ ພະນັກງານ-ວິຊາການ ທີ່ກ່ຽວຂ້ອງ ເຊິ່ງກອງປະຊຸມຄັ້ງນີ້ ໄດ້ຮັບການສະໜັບສະໜູນຈາກ ໂຄງການສ້າງຄວາມອາດສາມາດໃຫ້ແກ່ ສະພາແຫ່ງຊາດ (WFD) ແລະ ທຶນສົມທົບຈາກຄະນະເລຂາທິການສະພາແຫ່ງຊາດ.
ທັງນີ້, ເພື່ອເປັນການຍົກສູງຂີດຄວາມສາມາດ ໃຫ້ແກ່ກຳມະການຂອງ ກຳມາທິການຍຸຕິທໍາ, ຄະນະກຳມະການຍຸຕິທຳ ປກຊ-ປກສ ສະພາປະຊາຊົນຂັ້ນແຂວງ ແລະ ກົງຈັກເສນາທິການຊ່ວຍວຽກ ທີ່ຮັບຜິດຊອບວຽກງານ ຮັບ ແລະ ພິຈາລະນາ ຄຳຮ້ອງຂໍຄວາມເປັນທໍາ ຂອງສະພາປະຊາຊົນຂັ້ນແຂວງ ແລະ ສະພາແຫ່ງຊາດ ໄດ້ຮັບການຍົກລະດັບຄວາມຮັບຮູ້ຄວາມສາມາດ ກ່ຽວກັບກົນໄກການຮັບ ຄຳຮ້ອງຂໍຄວາມເປັນທຳ, ການຮັບຕ້ອນ ແລະ ໃຫ້ຄຳປຶກສາແກ່ປະຊາຊົນ ແລະ ວິທີການຄົ້ນຄວ້າ, ວິເຄາະ, ວິໄຈ ຄຳຮ້ອງຂໍຄວາມເປັນທຳ ລວມທັງຂັ້ນຕອນການພິຈາລະນາຄຳຮ້ອງຂໍຄວາມເປັນທຳ ໃຫ້ມີປະສິດທິພາບ ແນໃສ່ເຮັດໃຫ້ການປະຕິບັດພາລະບົດບາດ ໃນການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດ ອັນຊອບທຳ ຂອງປະຊາຊົນ ໃຫ້ມີຜົນສັກສິດຢ່າງເຕັມສ່ວນ.
ໃນໂອກາດນີ້, ທ່ານ ຄຳແພງ ວິລະພັນ ໄດ້ມີຄຳເຫັນກ່າວເປີດກອງປະຊຸມວ່າ: ເພື່ອເຮັດໃຫ້ການຈັດຕັ້ງປະຕິບັດ ກົດໝາຍວ່າດ້ວຍການແກ້ໄຂຄໍາຮ້ອງທຸກ ໃຫ້ມີຄວາມເປັນເອກະພາບກັນ ໃນຂອບເຂດທົ່ວປະເທດ, ກຳມາທິການຍຸຕິທຳ ສະພາແຫ່ງຊາດ ໄດ້ນໍາເອົາເນື້ອໃນຂອງ ກົດໝາຍວ່າດ້ວຍການແກ້ໄຂຄໍາຮ້ອງທຸກ ສະບັບປີ 2022 ມາເຜີຍແຜ່ ແລະ ແລກປ່ຽນຄຳຄິດຄຳເຫັນ ພ້ອມທັງນໍາເອົາກົນໄກການຮັບ ແລະ ພິຈາລະນາຄຳຮ້ອງຂໍຄວາມເປັນທຳ ຂອງຄະນະປະຈຳສະພາແຫ່ງຊາດ ກໍຄື ສະພາປະຊາຊົນຂັ້ນແຂວງ ແລະ ຂັ້ນຕອນ ວິທີການ ໃນການຮັບຕ້ອນ ແລະ ໃຫ້ຄໍາປຶກສາແກ່ປະຊາຊົນ ທີ່ມາຍື່ນຄໍາຮ້ອງຂໍຄວາມເປັນທໍາ ມານໍາສະເໜີ ແລກປ່ຽນຄວາມຄິດເຫັນນໍາບັນດາທ່ານ ເພື່ອເປັນການສ້າງຄວາມເຂົ້າໃຈເປັນເອກະພາບທາງດ້ານທັດສະນະ ແລະ ວິທີການ ໃນການຈັດຕັ້ງປະຕິບັດກົດໝາຍ ກໍຄືວິທີການໃນການພິຈາລະນາຄໍາຮ້ອງຂໍຄວາມເປັນທໍາ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃຫ້ມີປະສິດທິພາບ; ພ້ອມດຽວກັນນັ້ນ ກໍເພື່ອເປັນການຍົກລະດັບຄວາມຮູ້ຄວາມສາມາດໃຫ້ແກ່ ພະນັກງານ-ລັດຖະກອນ ທີ່ຮັບຜິດຊອບວຽກງານຄໍາຮ້ອງຂໍຄວາມເປັນທໍາ ສາມາດປະຕິບັດໜ້າທີ່ວຽກງານຕາມພາລະບົດບາດ, ສິດ ແລະ ໜ້າທີ່ ຕາມທີ່ໄດ້ກຳນົດໄວ້ໃນກົດໝາຍ ເຊິ່ງຈະໄດ້ພ້ອມກັນສຸມໃສ່ຄົ້ນຄວ້າ, ແລກປ່ຽນຄຳຄິດຄຳເຫັນຢ່າງກົງໄປກົງມາ ດ້ວຍຄວາມຮັບຜິດຊອບ ເພື່ອເຮັດໃຫ້ການຈັດຕັ້ງປະຕິບັດ ກົດໝາຍວ່າດ້ວຍການແກ້ໄຂຄໍາຮ້ອງທຸກ ສະບັບປີ 2022 ມີຄວາມເປັນເອກະພາບ ໂດຍການນໍາເອົາບົດຮຽນທາງດ້ານທິດສະດີ ແລະ ພຶດຕິກໍາຕົວຈິງ ໃນໄລຍະຜ່ານມາ ກ່ຽວກັບການຮັບ ແລະ ພິຈາລະນາຄຳຮ້ອງຂໍຄວາມເປັນທຳ ຂອງຄະນະປະຈຳສະພາແຫ່ງຊາດ ມາເປັນພື້ນຖານ, ນໍາສະເໜີແລກປ່ຽນຄວາມເຫັນນໍາບັນດາທ່ານ ແນໃສ່ຫັນເອົາການຄຸ້ມຄອງລັດ, ການຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ໃຫ້ເຂົ້າສູ່ລວງເລິກ ແລະ ຊີວິດຕົວຈິງເທື່ອລະກ້າວ ທັງເປັນການເພີ່ມທະວີບົດບາດຂອງ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນການຕິດຕາມກວດກາ ການປະຕິບັດໜ້າທີ່ຂອງບັນດາອົງການທີ່ມີສິດອໍານາດໃນການແກ້ໄຂຄຳຮ້ອງທຸກ ໃຫ້ມີຄວາມຍຸຕິທໍາ, ຮັບປະກັນໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ, ປະຊາຊົນມີຄວາມຮັບຮູ້ ແລະ ເຂົ້າໃຈ ຕໍ່ຂະບວນການບໍລິຫານລັດຂັ້ນຕ່າງໆ ກໍຄືຂະບວນການດໍາເນີນຄະດີຕາມ ຂະບວນຍຸຕິທໍາເປັນຢ່າງດີ ສາມາດເຂົ້າເຖິງຂະບວນການຍຸຕິທຳ ໄດ້ຖືກຕ້ອງຕາມຂັ້ນຕອນຂອງກົດໝາຍກໍານົດໄວ້.
ກອງປະຊຸມ, ໄດ້ຮັບຟັງການເຜີຍແຜ່ ກົດໝາຍວ່າດ້ວຍການແກ້ໄຂຄຳຮ້ອງທຸກ (ສະບັບປີ 2016), ລົງເລິກຄົ້ນຄວ້າສົມທຽບເນື້ອໃນຂອງ ກົດໝາຍວ່າດ້ວຍການແກ້ໄຂຄຳຮ້ອງທຸກ ສະບັບປັບປຸງ ປີ 2022; ການເຜີຍແຜ່ບັນດາມາດຕາຂອງ ກົດໝາຍວ່າດ້ວຍການແກ້ໄຂຄຳຮ້ອງທຸກ (ພາກທີ I, II, III, IV ແລະ ພາກທີ V), ຈາກທ່ານ ນາງ ຫວັນໄຊ ຈັນທະລາ ຮອງຫົວໜ້າກົມຕິດຕາມກວດກາວຽກງານຍຸຕິທຳ; ການສະເໜີບົດ ການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ ຂອງຄະນະປະຈຳສະພາແຫ່ງຊາດ ແລະ ສະພາປະຊາຊົນແຂວງ, ຈາກທ່ານ ໄກມະນິນ ເທບບົວລີ ວ່າການຫົວໜ້າກົມຄໍາຮ້ອງຂໍຄວາມເປັນທໍາ ແລະ ການສະເໜີບົດຮຽນ ການຕ້ອນຮັບ ແລະ ໃຫ້ຄຳປຶກສາ, ຮ່າງ ມະຕິ ຂອງຄະນະປະຈຳສະພາແຫ່ງຊາດ ວ່າດ້ວຍ ການຮັບ ແລະ ໃຫ້ຄຳປຶກສາກ່ຽວກັບ ການຮ້ອງຂໍຄວາມເປັນທຳ ຈາກທ່ານ ກາວອນ ມະໂນກຸນ ຮອງຫົວໜ້າກົມຕິດຕາມກວດກາວຽກງານຍຸຕິທຳ; ຈາກນັ້ນ, ຜູ້ເຂົ້າຮ່ວມ ໄດ້ພ້ອມກັນປະກອບຄຳຄິດຄຳເຫັນຢ່າງສ້າງສັນ, ມີຈຸດສຸມ ແລະ ກົງໄປກົງມາ.
ກອງປະຊຸມຈະໄດ້ດຳເນີນ ຮອດວັນທີ 23 ກັນຍາ 2022 ຈຶ່ງຈະສຳເລັດ.
(ພາບ ແລະ ຂ່າວ: ນາງ ສຸພາວັນ ຫອມສະນິດ)