ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

               ໂດຍໄດ້ຮັບການສະໜັບສະໜູນຈາກແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ແຜນງານເຊກາ) ໃນລະຫວ່າງວັນທີ 6-7 ພຶດສະພາ 2022 ນີ້, ທີ່ສະໂມສອນຫ້ອງວ່າການເມືອງ ກະລຶມ, ສະພາປະຊາຊົນແຂວງ ເຊກອງ (ສພຂ) ໄດ້ເປີດກອງປະຊຸມເຝິກອົບຮົມຍົກສູງຂີດຄວາມສາມາດດ້ານການຕິດຕາມກວດກາໃນຂົງເຂດເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ ແລະ ວຽກງານປົກປ້ອງກົດໝາຍໃຫ້ແກ່ ສສຊ-ສສຂ ແລະ ເສນາທິການ ສພຂ ໂດຍການເຂົ້າຮ່ວມເປັນປະທານຂອງທ່ານ ດົງເພັດ ພະຍົນ ຮອງເລຂາພັກແຂວງ, ປະທານ ສພຂ ແລະ ທ່ານ ອໍບົວລາ ອ່ອນມະໄລວົງ ກໍາມການພັກແຂວງ, ເລຂາພັກເມືອງ, ເຈົ້າເມືອງໆກະລຶມ, ມີບັນດາທ່ານ ສສຊ-ສສຂ, ຜູ້ປະສານງານແຜນງານເຊກາ ພ້ອມດ້ວຍແຂກທີ່ຖືກເຊີນເຂົ້າຮ່ວມທັງໝົດ 67 ທ່ານ, ຍິ່ງ 18 ທ່ານ.

ໂອກາດດັ່ງກ່າວ, ທ່ານ ດົງເພັດ ພະຍົນ ໄດ້ມີຄໍາເຫັນຕໍ່ກອງປະຊຸມໃນຄັ້ງວ່າ:  ຊຸດຝຶກອົບຮົມໄດ້ໄຂຂຶ້ນໃນທ່າມກາງທີ່ທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ກໍຄືຊາວແຂວງເຊກອງ ພວມກໍາລັງອອກແຮງແຂ່ງຂັນ ແລະ ສຸມໃສ່ປະຕິບັດມະຕິກອງປະຊຸມໃຫຍ່ຄັ້ງທີ XI ຂອງສູນກາງພັກ ແລະ ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ ພ້ອມທັງຈັດຕັ້ງຜັນຂະຫຍາຍ 2 ວາລະແຫ່ງຊາດໃຫ້ປະກົດຜົນເປັນຈິງ. ເຊິ່ງຈັດຂຶ້ນເພື່ອຍົກລະດັບຄວາມຮູ້, ຄວາມເຂົ້າ​ໃຈກ່ຽວກັບແບບແຜນວິທີເຮັດວຽກ ແລະ ທັກສະຕ່າງໆ ໃຫ້ແກ່ ສສຊ-ສສຂ ຊຸດໃໝ່ ແລະ ຜູ້ທີ່ເປັນເສນາທິການໃຫ້ແກ່ ສພສ ໂດຍສະເພາະການປະຕິບັດພາລະບົດບາດໃນການຕິດຕາມກວດກາໃນແຕ່ລະຂົງເຂດວຽກງານ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ໃຫ້​ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ.               ກອງປະຊຸມ, ໄດ້ຮັບຟັງກ່ຽວກັບການຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດເສດຖະກິດ-ສັງຄົມ ແລະ ແຜນງົບປະມານ; ວຽກງານການຕິດຕາມກວດກາແຜນພັດທະນາເສດຖະກິດ-ສັງຄົມ ແລະ ແຜນງບປະມານແຫ່ງລັດຂອງແຂວງ (ຂົງເຂດວຽກງານເສດຖະກິດ); ວຽກງານການຕິດຕາມກວດກາແຜນງົບປະມານແຫ່ງລັດຂອງແຂວງ;  ວຽກງານການຕິດຕາມກວດກາແຜນພັດທະນາເສດຖະກິດ-ສັງຄົມຂອງແຂວງ (ຂົງເຂດວຽກງານວັດທະນະທໍາ-ສັງຄົມ) ແລະ ຮັບຟັງຂັ້ນຕອນວິທີການຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ນະຕິກໍາໃຕ້ກົດໝາຍ ຂອງສານປະຊາຊົນແຂວງ, ອົງການໄອຍະການປະຊາຊນແຂວງ ແລະ ຕິດຕາມການປະຕິບັດຄໍາຕັດສິນຂອງສານ ເຊິ່ງສະເໜີໂດຍບັນດາທ່ານ​ວິ​ທະ​ຍາ​ກອນ​ທີ່​ມີ​ຄວາມຮູ້ ແລະ ປະ​ສົບ​ການສູງ ຈາກສະພາແຫ່ງຊາດ ແລະ ສະພາປະຊາຊົນແຂວງ.                     ພ້ອມນັ້ນ, ບັນດາ​ຜູ້ເຂົ້າຮ່ວມກໍໄດ້ມີການຄົ້ນຄວ້າ, ປຶກສາຫາລື ແລະ ສົນທະນາແລກປ່ຽນບົດຮຽນເຊິ່ງກັນ ແລະ ກັນ, ພ້ອມທັງ ປະກອບຄໍາຄິດຄໍາເຫັນໃສ່ຫຼາຍບັນຫາທີ່ວິທະຍາກອນນຳມາສະເໜີ ເພື່ອໃຫ້ມີຄວາມຮັບຮູ້ເຂົ້າໃຈຢ່າງກວ້າງຂວາງ.                                                                       #ໂດຍ: ນັກຂ່າວເຂດທີ 16.