(ສພຊ) ກອງປະຊຸມເຝິກອົບຮົມການຍົກສູງຂີດຄວາມສາມາດທັກສະການຕິດຕາມກວດກາ, ທັກສະການປະເມີນຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ, ການຊັກຖາມ ແລະ ການປະກອບຄຳເຫັນ ແລະ ການລົງພົບປະຜູ້ມີສິດເລືອກຕັ້ງໃຫ້ແກ່ສະມາຊິກສະພາປະຊາຊົນຂັ້ນແຂວງ ໃຫ້ມີປະສິດທິພາບ ແລະ ປະສິດທິຜົນດີຂຶ້ນ ໃນລະຫວ່າງວັນທີ 3-4 ສິງຫາ 2023 ທີ່ສະພາປະຊາຊົນແຂວງຫຼວງພະບາງ ໄດ້ຈັດກອງປະຊຸມການຍົກສູງຂີດຄວາມສາມາດດ້ານທັກສະໃຫ້ແກ່ສະມາຊິກສະພາປະຊາຊົນຂັ້ນແຂວງ ໂດຍການເປັນປະທານຂອງທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ, ມີປະທານກຳມາທິການວຽກງານສະມາຊິກສະພາແຫ່ງຊາດ, ຮອງຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ 3 ແຂວງຄື: ຜົ້ງສາລີ, ຫຼວງພະບາງ ແລະ ໄຊຍະບູລີ, ຫົວໜ້າກົມ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ກອງປະຊຸມໄດ້ຮັບຟັງການສະເໜີຫົວຂໍ້ທັກສະການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ທັກສະການປະເມີນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ; ການຊັກຖາມ, ການປະກອບຄໍາເຫັນ ແລະ ທັກສະການລົງພົບປະຜູ້ມີສິດເລືອກຕັ້ງ ໄດ້ນຳສະເໜີໂດຍທ່ານວິທະຍາກອນທີ່ມີປະສົບການວຽກງານຕົວຈິງ ເຊິ່ງເປັນປະທານກຳມາທິການວຽກງານສະມາຊິກສະພາແຫ່ງຊາດ ແລະ ຫົວໜ້າກົມ ແຜນການ ແລະ ການລົງທຶນ ຂອງສະພາແຫ່ງຊາດ; ຈາກນັ້ນ, ຜູ້ເຂົ້າຮ່ວມໄດ້ສຸມໃສ່ຄົ້ນຄວ້າ, ສົນທະນາແລກປ່ຽນບົດຮຽນກັບວິທະຍາກອນຢ່າງກົງໄປກົງມາ.

ກອງປະຊຸມໄດ້ຮັບການສະໜັບສະໜູນງົບປະມານສົມທົບຈາກ ຄະນະເລຂາທິການສະພາແຫ່ງຊາດ ຮ່ວມກັບໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ.