(ສພຊ) ເພື່ອຮັບປະກັນການປະຕິບັດວຽກງານສ້າງ ແລະ ປັບປຸງກົດໝາຍ ເປັນລະບົບ ແລະ ສອດຄ່ອງກັບພາ ລະບົດບາດ, ສິດ ແລະ ໜ້າທີ່ຂອງແຕ່ລະພາກສ່ວນ ແລະ ເພື່ອປັບປຸງກົນໄກ, ຂັ້ນຕອນການປະຕິບັດວຽກງານໃນການເປັນເສນາທິການສ້າງ ແລະ ປັບປຸງກົດໝາຍໃຫ້ແກ່ຄະນະປະຈຳສະພາແຫ່ງຊາດ ໃຫ້ຖືກຕ້ອງ ແລະ ສອດຄ່ອງຕາມກົດໝາຍ. ໃນວັນທີ 12 ມີນາ 2024 ທີ່ເມືອງແກ້ວອຸດົມ ແຂວງວຽງຈັນ, ໄດ້ມີກອງປະຊຸມສຳມະນາຍົກລະດັບຄວາມຮູ້ກ່ຽວກັບວຽກງານສ້າງ ແລະ ປັບປຸງກົດໝາຍ ໃຫ້ແກ່ພະນັກງານ-ລັດຖະກອນພາຍໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ ພາຍໃຕ້ການເປັນປະທານຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ ທັງເປັນປະທານກຳມາທິການກົດໝາຍ ໂດຍມີວິທະຍາກອນຈາກກະຊວງຍຸຕິທໍາ, ຫ້ອງວ່າການສໍານັກງານນາຍົກລັດຖະ ມົນຕີ ແລະ ຫ້ອງວ່າການສໍານັກງານປະທານປະເທດ; ເຂົ້າຮ່ວມມີທ່ານ ປອ. ພູທອນ ວໍລະເພັດ ຮອງປະທານກຳມາທິການກົດໝາຍ, ບັນດາທ່ານປະທານ-ຮອງປະທານຄະນະກຳມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບຈາກສະພາປະຊາຊົນນະຄອນຫຼວງວຽງຈັນ, ແຂວງຫຼວງນໍ້າທາ, ແຂວງອຸດົມໄຊ, ແຂວງຫຼວງພະບາງ, ແຂວງວຽງຈັນ ແລະ ແຂວງບໍລິຄໍາໄຊ ພ້ອມດ້ວຍຄະນະກົມ, ຄະນະພະແນກ ແລະ ພະນັກງານ-ລັດຖະກອນຈາກສະພາແຫ່ງຊາດ.

ທ່ານ ສຈ. ປອ. ຈະເລີນ ເຍຍປາວເຮີ ໄດ້ມີຄຳເຫັນກ່າວເປີດວ່າ: ກອງປະຊຸມຄັ້ງນີ້ມີຄວາມໝາຍສຳຄັນຫຼາຍ ເນື່ອງຈາກວ່າພະນັກງານ-ລັດຖະກອນຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ມີພາລະບົດບາດເປັນເສນາທິການໃຫ້ແກ່ຄະນະປະຈຳສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນວຽກງານສ້າງນິຕິກຳລະດັບຕ່າງໆຂອງລັດເຮົາ, ວຽກງານສ້າງ ແລະ ປັບປຸງກົດໝາຍ ເປັນໜຶ່ງໃນພາລະບົດບາດສຳຄັນຕົ້ນຕໍຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ. ໃນໄລຍະທີ່ຜ່ານມາ ພວກເຮົາໄດ້ຮ່ວມກັນຈັດຕັ້ງປະຕິບັດພາລະບົົດບາດດັ່ງກ່າວນີ້ ຕາມຂອບເຂດຄວາມຮັບຜິດຊອບ, ສິດ ແລະ ໜ້າທີ່ຂອງແຕ່ລະພາກສ່ວນໄດ້ດີສົມຄວນ ເຊິ່ງມາຮອດປັດຈຸບັນ ສະພາແຫ່ງຊາດໄດ້ຮັບ ຮອງເອົາຮ່າງກົດໝາຍສ້າງໃໝ່ ແລະ ປັບປຸງ 167 ສະບັບ; ແຕ່ຄຽງຄູ່ກັນນັ້ນ ກໍຍັງມີດ້ານອ່ອນທີ່ເລັ່ງທວງໃຫ້ພວກເຮົາຕ້ອງແກ້ໄຂ ເປັນຕົ້ນຕ້ອງບຳລຸງຍົກລະດັບຄວາມຮູ້ຄວາມສາມາດໃຫ້ແກ່ຖັນແຖວພະນັກງານ-ລັດຖະກອນ ທີ່ຮັບຜິດ ຊອບວຽກງານດັ່ງກ່າວ ໃຫ້ສາມາດຈັດຕັ້ງປະຕິບັດພາລະບົດບາດທີ່ເປັນເສນາທິການໃຫ້ແກ່ຄະນະປະຈຳສະພາແຫ່ງຊາດ, ຄະນະປະຈຳສະພາປະຊາຊົນຂັ້ນແຂວງ ກໍຄືທຸກພາກສ່ວນທີ່ເຮັດວຽກກງານສ້າງ ແລະ ປັບປຸງກົດໝາຍ ໃຫ້ມີປະ ສິດທິພາບ, ປະສິດທິຜົນສູງຂຶ້ນກວ່າເກົ່າ. ກອງປະຊຸມຂອງພວກເຮົາຈະໄດ້ດຳເນີນເປັນເວລາ 2 ວັນ ເຫັນວ່າເນື້ອໃນກອງປະຊຸມແມ່ນກວ້າງຂວາງ ແລະ ເລິກເຊິ່ງ ແຕ່ເວລາພັດມີໜ້ອຍ; ດັ່ງນັ້ນ, ສະເໜີໃຫ້ບັນດາທ່ານຈົ່ງຕັ້ງໜ້າຄົ້ນຄວ້າ,ປະກອບຄວາມເຫັນ ເຮັດໃຫ້ກອງປະຊຸມຄັ້ງນີ້ ບັນລຸຜົນສຳເລັດຕາມຈຸດປະສົງລະດັບຄາດໝາຍທີ່ວາງໄວ້.

ໃນກອງປະຊຸມ, ໄດ້ຮັບຟັງການສະເໜີກ່ຽວກັບພາລະບົດບາດ, ສິດ ແລະ ໜ້າທີ່ຂອງຫ້ອງວ່າການສຳນັກງານນາຍົກລັດຖະມົນຕີ ໃນການເປັນເສນາທິການໃນວຽກງານສ້າງ ແລະ ປັບປຸງກົດໝາຍໃຫ້ແກ່ລັດຖະບານ; ພາລະບົດ ບາດ, ສິດ ແລະ ໜ້າທີ່ຂອງກຳມາທິການກົດໝາຍ ໃນວຽກງານສ້າງ ແລະ ປັບປຸງກົດໝາຍໃຫ້ແກ່ຄະນະປະຈຳສະພາແຫ່ງຊາດ; ພາລະບົດບາດ, ສິດ ແລະ ໜ້າທີ່ຂອງກະຊວງຍຸຕິທຳ ໃນການກວດກາຄວາມສອດຄ່ອງທາງດ້ານກົດໝາຍ; ພາລະບົດບາດ, ສິດ ແລະ ໜ້າທີ່ຂອງຫ້ອງວ່າການສຳນັກງານປະທານປະເທດ ໃນການເປັນເສນາທິການໃນວຽກງານສ້າງ ແລະ ປັບປຸງກົດໝາຍໃຫ້ແກ່ປະທານປະເທດ; ບົດຮຽນຂອງຕ່າງປະເທດ ກ່ຽວກັບຂັ້ນຕອນການສ້າງ ແລະ ປັບປຸງກົດໝາຍ ຈາກຫົວໜ້າຊ່ຽວຊານປະຈຳໂຄງການສະເຕັບສ໌ UNDP ແລະ ເຜີຍແຜ່ຄຳແນະນຳການສ້າງແຜນການສ້າງ ແລະ ປັບປຸງກົດໝາຍ ໄລຍະ 2026-2030. ຈາກນັ້ນ, ບັນດາຜູ້ເຂົ້າຮ່ວມໄດ້ສົນທະນາແລກປ່ຽນບົດຮຽນເຊິ່ງກັນ ແລະກັນໃນແຕ່ລະຫົວຂໍ້ທີ່ທາງກອງປະຊຸມໄດ້ຍົກຂຶ້ນມາ.

ກອງປະຊຸມຄັ້ງນີ້, ຈະໄດ້ດຳເນີນໄປຈົນເຖິງວັນທີ 13 ມີນາ 2024 ຈຶ່ງຈະສຳເລັດ ເຊິ່ງໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ.

(ພາບ ແລະ ຂ່າວ: ນາງ ສຸພາວັນ ຫອມສະນິດ)