(ສພຊ) – ຕອນແລງວັນທີ 17 ມິຖຸນາຜ່ານມາ, ຄະນະສະມາຊິກສະພາແຫ່ງຊາດ (ສສຊ) ເພດຍິງ ຊຸດທີ IX ໄດ້ຈັດກອງປະຊຸມຄົ້ນຄວ້າປະກອບຄຳເຫັນໃສ່ຮ່າງແຜນດຳເນີນງານວ່າດ້ວຍການສົ່ງເສີມການມີສ່ວນຮ່ວມທາງດ້ານການເມືອງ ແລະ ຄວາມເປັນຜູ້ນຳຂອງເພດຍິງ (WPPL) ແລະ ແຜນການຈັດຕັ້ງປະຕິບັດ 2024-2030 ໂດຍການເປັນປະທານຂອງທ່ານ ນາງ ທຸມມາລີ ວົງພະຈັນ ປະທານຄະນະສະມາຊິກສະພາແຫ່ງຊາດເພດຍິງ ຊຸດທີ IX, ປະທານສະ ມາຊິກລັດຖະສະພາເພດຍິງຂອງສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄວປາ (WAIPA); ມີ ສສຊ ເພດຍິງ ຊຸດທີ IX ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.
ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງ ແລະ ສຸມໃສ່ປະກອບຄຳຄິດຄຳເຫັນໃສ່ຮ່າງແຜນດຳເນີນງານວ່າດ້ວຍການສົ່ງເສີມການມີສ່ວນຮ່ວມທາງດ້ານການເມືອງ ແລະ ຄວາມເປັນຜູ້ນຳຂອງເພດຍິງ ເຊິ່ງເປັນບົດອະທິບາຍເຖິງຄວາມເປັນມາ ແລະ ການກຳນົດສາມເສົາຄ້ຳ; ພ້ອມນັ້ນ, ຍັງໄດ້ຮັບຟັງ ແລະ ສຸມໃສ່ປະກອບຄຳຄິດຄຳເຫັນໃສ່ຮ່າງແຜນການຈັດຕັ້ງປະຕິບັດວ່າດ້ວຍການສົ່ງເສີມການມີສ່ວນຮ່ວມທາງດ້ານການເມືອງ ແລະ ຄວາມເປັນຜູ້ນຳຂອງເພດຍິງ 2024-2030 ເຊິ່ງໄດ້ກຳນົດກິດຈະກຳ, ເນື້ອໃນກິດຈະກຳ ແລະ ໄລຍະເວລາທີ່ຈະຈັດຕັ້ງປະຕິບັດໃນແຕ່ລະປີ. ທັງນີ້, ກໍເພື່ອເປັນການກະກຽມໃຫ້ແກ່ກອງປະຊຸມໄອປາ (AIPA) ຄັ້ງທີ 45 ທີ່ ສປປລາວ ຈະເປັນເຈົ້າພາບໃນເດືອນຕຸລາທີ່ຈະມາເຖິງນີ້; ລັດຖະສະພາ 10 ປະເທດ ໄດ້ຮ່ວມກັນຮ່າງແຜນດຳເນີນງານ ແລະ ແຜນການຈັດຕັ້ງປະຕິ ບັດດັ່ງກ່າວ ເຊິ່ງໄດ້ນຳເຂົ້າພິຈາລະນາໃນກອງປະຊຸມສຳມະນາວຽກງານໄວປາ ຄັ້ງທີ 2 ຢູ່ ສປປລາວ ເມື່ອເດືອນກຸມພາຜ່ານມາ ແລ້ວສົ່ງໃຫ້ບັນດາລັດຖະສະພາທີ່ເປັນສະມາຊິກໄອປາ ປະກອບຄຳເຫັນກ່ອນຈະສົ່ງໃຫ້ກອງເລຂາໄອປາ ໃນວັນທີ 21 ມິຖຸນານີ້.
(ນາງ ອາລິນ ສຸພິມມະປະດີດ)