ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ພິທີປາຖະກະຖາວັນລັດຖະທຳມະນູນແຫ່ງ ສປປ ລາວ ຄົບຮອບ 31 ປີ ( 15 ສິງຫາ 1991 – 15 ສິງຫາ 2022 ) ແລະ ມູນເຊື້ອວັນສ້າງຕັ້ງສານປະຊາຊົນຄົບຮອບ 40 ປີ ( 15 ສິງຫາ 1982 – 15 ສິງຫາ 2022 ) ໄດ້ຈັດຂຶ້ນທີ່ສະໂມສອນໃຫຍ່ຂອງແຂວງຄໍາມ່ວນໂດຍການເຂົ້າຮ່ວມ ແລະ ໃຫ້ກຽດປາຖະກະ ຖາຂອງທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງ, ເຂົ້າຮ່ວມມີພະນັກງານອາວຸໂສບຳນານ, ບັນດາເມືອງ, ພະແນກການ ແລະ ພະນັກງານວິຊາການຈາກພາກສ່ວນຕ່າງໆ ອ້ອມຂ້າງແຂວງເຂົ້າຮ່ວມ.
ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ຍົກໃຫ້ເຫັນປະຫວັດຄວາມເປັນມາຂອງວັນສ້າງຕັ້ງລັດຖະທຳມະນູນໂດຍສະເພາະແມ່ນ ສະພາບແວດລ້ອມແຫ່ງການກຳເນີດ ລັດຖະທຳມະນູນຂອງ ສປປ ລາວ ພາຍຫຼັງປະເທດຊາດໄດ້ຮັບການສະຖາປະນາເປັນ ສປປ ລາວ ພັກໄດ້ວາງແນວທາງ ແລະ ນຳພາປະຊາຊົນປະຕິບັດສອງຫນ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ. ປີ 1986 ພັກໄດ້ວາງແນວທາງປ່ຽນແປງໃຫມ່ຮອບດ້ານໂດຍເລີ່ມຈາກການປ່ຽນແປງທາງດ້ານເສດຖະກິດ, ຫັນຈາກການຄຸ້ມຄອງລວມສູນບໍລິຫານເກື້ອກູນໄປສູ່ການຄຸ້ມຄອງຕາມກົນໄກຕະຫຼາດທີ່ມີການໄລ່ລຽງເສດຖະກິດ ແລະ ມີການດັດສົມຂອງລັດ. ໂດຍອີງໃສ່ຄວາມຮຽກຮ້ອງຕ້ອງການແຫ່ງການປ່ຽນແປງໃຫມ່ດັ່ງກ່າວຈິ່ງມີຄວາມຈຳເປັນຕ້ອງຫັນໄປສູ່ການຄຸ້ມຄອງລັດດ້ວຍລັດຖະທຳມະນູນ ແລະ ກົດຫມາຍຢ່າງເປັນເອກະພາບ . ດ້ວຍເຫດນັ້ນກອງປະຊຸມເທື່ອທີ 6 ຂອງສະພາປະຊາຊົນສູງສຸດ ຊຸດທີ II (ປີ 1991) ຈິ່ງໄດ້ພິຈາລະນາຮັບຮອງເອົາລັດຖະທຳມະນູນສະບັບທຳອິດຂອງ ສປປ ລາວ ຊຶ່ງໄດ້ປະກາດໃຊ້ໃນວັນທີ 15/8/ 1991. ໃນໂອກາດດຽວກັນ ທ່ານ ກໍ່ໄດ້ຍົກໃຫ້ເຫັນເຖິງມູນເຊື້ອ 40 ປີ, ແຫ່ງການເຕີບໃຫຍ່ຂະຫຍາຍຕົວ ຂອງສານປະຊາຊົນແຫ່ງ ສປປ ລາວ ເປັນຕົ້ນແມ່ນການປັບປຸງການຈັດຕັ້ງ ແລະ ການດໍາເນີນຄະດີຂອງສານປະຊາຊົນແຕ່ລະໄລຍະໄດ້ເຮັດໃຫ້ການຈັດຕັ້ງຂອງສານ ປະຊາຊົນ ມີການປ່ຽນແປງ, ເຕີບໃຫຍ່ຂະຫຍາຍຕົວ ແລະ ພັດທະນາຂຶ້ນຢ່າງບໍ່ຢຸດຢັ້ງ, ປັດຈຸບັນ ການຈັດຕັ້ງຂອງສານປະຊາຊົນໃນທົ່ວປະເທດ ປະກອບດ້ວຍ: ສານປະຊາຊົນສູງສຸດ 01 ແຫ່ງ, ສານປະຊາຊົນພາກ 03 ແຫ່ງ, ສານປະຊາຊົນ ແຂວງ, ນະຄອນຫຼວງ 18 ແຫ່ງ ແລະ ສານປະຊາຊົນເຂດ 45 ແຫ່ງ, ສານທະຫານ 04 ແຫ່ງ. ສັງລວມແລ້ວ ອັນທີ່ພົ້ນເດັ່ນໃນການປັບປຸງ ແລະ ພັດທະນາລະບົບສານປະຊາຊົນ ,ສານປະຊາຊົນທ້ອງຖິ່ນໃຫ້ຂຶ້ນກັບສາຍຕັ້ງ ຊຶ່ງຖືເປັນການພັດທະນາແບບກ້າວກະໂດດຂອງລະບົບສານປະຊາຊົນພວກເຮົາ, ການປະກາດສ້າງຕັ້ງຄະນະສານປົກຄອງຂຶ້ນໃນລະບົບສານປະຊາຊົນ ແລະ ການກໍ່ສ້າງ ແລະ ພັດທະນາບຸກ ຄະລາກອນ. ປັດຈຸບັນທົ່ວລະບົບສານມີພະນັກງານທັງຫມົດ 1.919 ທ່ານ, ຍິງ 725 ທ່ານ, ໃນນີ້ ມີຜູ້ພິພາກສາ 565 ທ່ານ, ຍິງ 115 ທ່ານ, ຜູ້ຊ່ວຍຜູ້ພິພາກສາ 516 ທ່ານ, ຍິງ 174 ທ່ານ, ຈ່າສານ 151 ທ່ານ, ຍິງ 66 ທ່ານ. ສຳລັບແຂວງຄຳມ່ວນມີສານປະຊາຊົນແຂວງ ແລະ ສານປະຊາຊົນເຂດ1 ແລະ ເຂດ2 ແຂວງຄຳມ່ວນ ມີພະນັກງານທັງໝົດ 73 ຄົນ, ຍິງ 30 ຄົນ, ມີຜູ້ພິພາກສາທັງໝົດ 18 ຄົນ, ຍິງ 07 ຄົນ, ສານປະຊາຊົນແຂວງ ມີພະນັກງານທັງໝົດ 32 ຄົນ, ຍິງ 14 ຄົນ, ຜູ້ພິພາກສາ 12 ຄົນ, ຍິງ 03 ຄົນ, ສານປະຊາຊົນເຂດ1: ມີພະນັກງານທັງໝົດ 20 ຄົນ, ຍິງ 07 ຄົນ, ຜູ້ພິພາກສາ 06 ຄົນ, ຍິງ 03 ຄົນ, ສານປະຊາຊົນເຂດ2: ມີພະນັກງານທັງໝົດ 21 ຄົນ, ຍິງ 09 ຄົນ, ຜູ້ພິພາກສາ 04 ຄົນ, ຍິງ 01 ຄົນ.
ດ້ານການຕັດສິນ, ພິພາກສາຄະດີ ໄດ້ເອົາໃຈໃສ່ປັບປຸງແບບແຜນກົນໄກການດໍາເນີນຄະດີໃຫ້ມີຄວາມວ່ອງໄວ, ຈັດວາງຜູ້ພິພາກສາໃຫ້ມີຄວາມເຫມາະສົມ ຜ່ານການຈັດຕັ້ງປະຕິບັດຕົວຈິງເຮັດໃຫ້ການພິຈາລະນາຕັດສິນຄະດີ ມີຄວາມ ວ່ອງໄວ ແລະ ມີຄຸນນະພາບນັບມື້ນັບສູງຂຶ້ນ ສະແດງອອກ 5 ປີຜ່ານມາ ມີຄະດີເຂົ້າມາສານປະຊາຊົນ 44.521 ເລື່ອງ, ຄ້າງມາ 1.606 ເລື່ອງ, ລວມທັງຫມົດ 46.127 ເລືອງ, ແກ້ໄຂໄດ້ 43.559 ເລື່ອງເທົ່າກັບ 94,43%, ແຜນການກໍານົດ 85% ຖືວ່າລື່ນແຜນການກໍານົດ 9,43%. ຍັງຄ້າງ 2.568 ເລື່ອງເທົ່າກັບ 5,56%, ຜ່ານການຕັດສິນ, ພິພາກສາຄະດີດັ່ງກ່າວ ເຫັນ ໄດ້ວ່າຄູ່ຄວາມພໍໃຈຕໍ່ຜົນການຕັດສິນ, ພິພາກສາຄະດີຂອງສານຫຼາຍຂຶ້ນ ໂດຍສະເພາະແມ່ນຄະດີອາຍາ ຄູ່ຄວາມພໍໃຈຕໍ່ຜົນ ຂອງການຕັດສິນ ສົ່ງໄປຈັດຕັ້ງປະຕິບັດ 21.406 ເລື່ອງ ກວມເອົາ 92,63 % ຂອງຄະດີອາຍາທີ່ສານຂັ້ນຕົ້ນໄດ້ຕັດສີນ, ຄະດີແພ່ງ 5.517 ເລື່ອງ ກວມເອົາ 70,55% ຂອງຄະດີແພ່ງທີ່ສານຂັ້ນຕົ້ນໄດ້ຕັດສິນ.
ຜ່ານການຈັດຕັ້ງປະຕິບັດຕົວຈິງເຮັດໃຫ້ການພິຈາລະນາຕັດສິນຄະດີ ມີຄວາມ ວ່ອງໄວ ແລະ ມີຄຸນນະພາບນັບມື້ນັບສູງຂຶ້ນ ສະແດງອອກ 5 ປີຜ່ານມາ ມີຄະດີເຂົ້າມາສານປະຊາຊົນແຂວງ ແລະ ສານປະຊາຊົນເຂດ1 ແລະ ເຂດ2 ຈໍານວນ 1.177 ເລື່ອງ, ແກ້ໄຂໄດ້ 1.150 ເລື່ອງເທົ່າກັບ 97,70%, ແຜນການກໍານົດ 85% ຖືວ່າລື່ນແຜນການກໍານົດ 12,70%. ຂໍອຸທອນ 94 ເລື່ອງ, ຂໍລົບລ້າງ 45 ເລື່ອງ, ຍັງຄ້າງ 27 ເລື່ອງ.
ຕະຫລອດໄລຍະ 40 ປີຜ່ານມາ, ສານປະຊາຊົນໄດ້ຮັບການປັບປຸງ ກໍ່ສ້າງນັບມື້ນັບເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ, ຕັ້ງຫນ້າປະຕິບັດຫນ້າທີ່ການເມືອງດ້ວຍຄວາມຮັບຜິດຊອບສູງ ແລະ ມີຜົນສໍາເລັດເປັນກ້າວໆ ມາ ເຮັດໃຫ້ໄດ້ຮັບຄວາມເຄົາລົບເຊື່ອຖືຈາກປະຊາຊົນ ແລະ ໄດ້ຮັບຄວາມໄວ້ວາງໃຈຈາກພັກ-ລັດ ເປັນຢ່າງດີ, ມີຜົນງານຫລາຍດ້ານ.