ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 ເຂດຕໍາລວງ​​ ປະກອບ​ມີທັງ​ໝົດ 8 ບ້ານ​ຄື: ບ້ານ​ສາງ​ແຈນ, ບ້ານລະ​ອູ, ບ້ານ​ສະ​ລອຍ, ບ້ານ​ຕຳ​ລວງ, ບ້ານ​ນາກ​ອງ, ບ້ານ​ຫູບ ​ແລະ ບ້ານ​ນາ​ລົງ​ເກົ່າ; ມີ​ພົນລະ​ເມືອງ​ທັງ​ໝົດ ​3ພັນ57 ຄົນ, ຍິງ 1ພັນ525 ຄົນ, ມີ 480 ຫຼັງຄາ, 626 ຄ​ອບຄົວ; ປະ​ກອບ​ມີ 1 ເຜົ່າ​ຄື: ​ເຜົ່າມັງກອງ. ເຂດຕຳລວງມີ​ເງື່ອນ​ໄຂ​ອຳນວຍ​ຄວາມ​ສະດວກ​ໃນ​ການ​ພັດທະນາ​ທາງ​ດ້ານ​ເສດຖະກິດ-ສັງຄົມ ​ເພາ​ະວ່າ ມີ​​​ເສັ້ນທາງ​ຄົມມະນາຄົມ​ທຽວ​ໄດ້ສອງ​ລະດູກວມເອົາຫຼາຍບ້ານ, ປະຊາຊົນ​ສ່ວນ​ຫຼາຍ​ແມ່ນ​ຢຶດຖື​ເອົາ​ການ​ປູກຝັງ​ ​ແລະ ລ້ຽງສັດ​ເປັນ​ຕົ້ນຕໍ.

ຜ່ານມາການນຳຂອງເມືອງແມ່ນໄດ້​ຊຸກຍູ້​ສົ່ງ​ເສີມ​ໃຫ້​ບັນດາ​ພໍ່​ແມ່​ປະຊາຊົນ​ພາຍ​ໃນ​ເຂດປູກ​ພືດ​ກະສິກຳ ​ແລະ ອຸດສາຫະກຳ, ຢຸດຕິ​ການ​ຖາງ​ປ່າເຮັດໄຮ່​ແບບ​ເລື່ອນລອຍ, ປັດຈຸ​ບັນ​ພາຍ​ໃນ​ບ້ານ​ມີ​ເນື້ອ​ທີ່​ນາ ທັງໝົດ 18 ​ເຮັກຕາ , ມີເນື້ອທີ່ໄຮ່ 231 ​ເຮັກຕາ,ປູກຢາງ​ໂບງ 13 ເຮັກຕາ, ກ້ວຍ 102 ​ເຮັກຕາ, ມັນຕົ້ນ 117 ​ເຮັກຕາ, ​ແຂມ 18 ​ເຮັກຕາ; ນອກຈາກ​ການ​ປູກຝັງ​ແລ້ວ ​ຢູ່​ພາຍ​ໃນ​​ເຂດ ຍັງ​ມີ​ການ​ລ້ຽງສັດ​ຕື່ມອີກ​​ເຊັ່ນ: ມີຄວາຍ ​36 ໂຕ, ງົວ 260 ​ໂຕ, ໝູ 36 ໂຕ, ​ແບ້ 483 ໂຕ, ສັດ​ປີກ 3ພັນກວ່າໂຕ, ມີ​ໜອງ​ປາ 26 ໜອງ, ປ່ອຍ​ປາ​ໄດ້ 2ພັນ​ກວ່າໂຕ.

ນອກຈາກ​ນັ້ນ​ຍັງ​ໄດ້​ເອົາ​ໃຈ​ໃສ່​ຊຸກ​ຍູ້ ​ແລະ ສົ່ງ​ເສີມ​ຫັດຖະກຳ​ທີ່​ເປັນ​ມູນ​ເຊື້ອ​ຂອງ​ປະຊາຊົນ​ພາຍ​ໃນ​ບ້ານ​ເປັນ​ຕົ້ນ​ແມ່ນ​ການ​ຈັກສານ, ຕໍ່າ​ຜ້າ​ທໍ​ໄໝ ​ແລະ ອື່ນໆທີ່ສາມາດ ​ສ້າງລາຍ​ຮັບ​ໃຫ້​ແກ່​ຄອບຄົວ ທັງໝົດນີ້ແມ່ນການລາຍງານຂອງ ທ່ານ ພູໂຮງ ອຸ່ນທະວີ ກໍາມະການພັກເມືອງ ຜູ້ຊີ້ນໍາໜ່ວຍພັກ ເຂດຕໍາລວງ ເມືອງນອງ ທີ່ໄດ້ລາຍງານຕໍ່ ທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ ຮອງປະທານສະພາແຫ່ງຊາດ, ທ່ານ ໄຊຍະເດດ ຜຸຍຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ພ້ອມດ້ວຍ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນອງ ໃນໂອກາດທີ່ໄດ້ແຢູ່ເມືອງນອງໃນລະຫວ່າງວັນທີ 5-7 ສິງຫາ 2022 ນີ້ ໂດຍການຕ້ອນຮັບຂອງ ທ່ານ ລໍາແກ້ວ ແສງໜູທອງ ກໍາມະການພັກແຂວງ ເລຂາພັກເມືອງ ເຈົ້າເມືອງໆນອງ.

ຈາກນັ້ນ ປະຊາຊົນຜູ້ມີສິດເລືອກຕັ້ງ ກໍ່ໄດ້ຮັບຟັງການເຜີຍແຜ່ເນື້ອໃນຜົນສຳເລັດຂອງ ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ແລະສະພາປະຊາຊົນແຂວງຊຸດທີ II ທີ່ໄດ້ຮັບຮອງເອົາຫຼາຍບັນຫາສຳຄັນເປັນຕົ້ນແມ່ນ: ການຮັບຮອງເອົາ 10ມະຕິຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ແລະການຮັບຮອງເອົາ 4 ມະຕິຂອງກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຊຸດທີ II, ໂອກາດນີ້ ພໍ່ແມ່ປະຊົນ ກໍ່ຍັງໄດ້ຊັກຖາມ ແລະ ມີຄຳສະເໜີ ໂດຍສະເພາະແມ່ນ ບັນຫາການພັດທະນາພື້ນຖານໂຄງລ່າງເປັນຕົ້ນແມ່ນ: ການບຸກເບີກເສັ້ນທາງ ໄປຫາບ້ານ ຫູບ ທີ່ເປັນທາງທໍາມະຊາດຕາມຮ່ອມພູ ໄລຍະ4ກິໂລແມັດ, ການສ້າງຕາຂ່າຍໄຟຟ້າ ເພື່ອເປັນການແກ້ໄຂຊິວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ, ພ້ອມນັ້ນ ສສຊ ແລະ ສສຂ ກໍ່ຍັງໄດ້ມີຄຳເຫັນຫຼາຍດ້ານ ຕໍ່ກັບການການພັດທະນາພື້ນຖານໂຄງລ່າງ, ການພັດທະນາທາງດ້ານເສດຖະກິດ, ການແກ້ໄຂບັນຫາທາງດ້ານຢາເສບຕິດ ໂດຍຕິດພັນກັບການແກ້ໄຂ 2 ວາລະແຫ່ງຊາດຂອງລັດຖະບານ. ເພື່ອແນ່ໃສ່ໃຫ້ບັນລຸໄດ້ຕາມລະດັບຄາດ ໝາຍທີ່ພັກ-ລັດວາງໄວ້ ແລະ ຍັງໄດ້ຕອບບັນຫາການຊັກຖາມຂອງພໍ່ແມ່ປະຊາຊົນເພື່ອໃຫ້ຮັບຮູ້ ແລະ ເຂົ້າໃຈເຖິງບັນຫາຕ່າງໆຕໍ່ກັບສະພາບການອັນລວມຕໍ່ກັບການພັດທະນາຂອງປະເທດເຮົາ ໃນໄລຍະປັດຈຸບັນ ພ້ອມທັງຮັບເອົາຄຳສະເໜີຂອງ ອົງການປົກຄອງບ້ານ ແລະພໍ່ແມ່ປະຊາຊົນໄປນຳສະເໜີຕໍ່ຂະແໜງການກ່ຽວຂ້ອງຢູ່ສະພາເພື່ອຄົ້ນຄ້ວາຈັດສັນງົບປະມານລົງມາແກ້ໄຂຊີວິດການເປັນຢູ່ຂອງພໍ່ແມ່ປະຊາຊົນໃຫ້ດີຂຶ້ນ

ໂອກາດນີ້ ກໍໄດ້ມອບ ອຸປະກອນການຮຽນ ແລະ ອຸປະກອນກິລາ ໃຫ້ໂຮງຮຽນ 8 ບ້ານໃນເຂດດັ່ງກ່າວ ເພື່ອຊຸກຍູ້ການຮຽນ ຂອງນ້ອງນັກຮຽນເຂດຊົນເຜົ່າ ໃຫ້ມີຄວາມກະຕືລືລົ້ນຂຶ້ນຕື່ມ.