ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນບ່າຍ ວັນທີ 23 ພຶດສະພາ 2022 ທີ່ຫ້ອງປະຊຸມສະພາປະຊາຊົນແຂວງ ສະພາປະຊົນແຂວງຜົ້ງສາລີ ຈັດຕັ້ງໂຄສະນາປາຖະກະຖາ ເລົ່າມູນເຊື້ອ 7 ເອກະສານສໍາ ຂອງພັກ, ຂອງຊາດ ແລະ ຂອງປະເທດເພື່ອນມິດສາກົນ ປະຈໍາເດືອນ ພຶດສະພາ 2022 ໂດຍການເປັນປະທານຂອງ ສະຫາຍ ນາງ ພອນສະຫວັນ ສັກຕິຄຸນ ເລຂາໜ່ວຍພັກສະພາປະຊາຊົນແຂວງ; ມີບັນດາສະມາຊິກພັກສົມບຸນ, ສໍາຮອງ ພ້ອມດ້ວຍພະນັກງານ-ລັດຖະກອນພາຍໃນສະພາປະຊາຊົນແຂວງ ເຂົ້າຮ່ວມ.

ການຈັດຕັ້ງໂຄສະນາປາຖະກະຖາ ເລົ່າມູນເຊື້ອໃນຄັ້ງນີ້ຈັດຂຶ້ນເພື່ອເປັນການຫວນຄືນມູນເຊື້ອ ວັນບູນສໍາຄັນຂອງພັກ, ຂອງຊາດ ກໍ່ຄືຂອງປະເທດເພື່ອນມິດສາກົນ ໃຫ້ແກ່ ສະມາຊິກພັກ, ພະນັກງານ-ລັດຖະກອນໄດ້ຮັບຮູ້ ແລະ ເຂົ້າໃຈ ເຖິງປະຫວັດສາດ ແລະ ມູນເຊື້ອດັ່ງກ່າວ, ທັງເປັນການສຶກສາຮໍ່າຮຽນ ແລະ ນໍາໃຊ້ເຂົ້າໃນການຈັດຕັ້ງປະຕິບັດວຽກງານຕົວຈິງ ເປັນຕົ້ນ: ຄຸນສົມບັດສິນທໍາປະຕິວັດ, ຄວາມຈົ່ງຮັກພັກດີ ແລະ ນໍ້າໃຈເສຍສະຫຼະຕໍ່ປະເທດຊາດ.

ໃນການຈັດຕັ້ງໂຄສະນາປາຖະກະຖາ ເລົ່າມູນເຊື້ອ ໄດ້ຮັບຟັງ ສະຫາຍ ພັທ ຄໍາດາ ໂສລະພົມ ຮອງເລຂາໜ່ວຍພັກ ເລົ່າຄືນມູນເຊື້ອວັນຜ່າວົງປິດລ້ອມກອງພັນທີ 2 ວິລະຊົນ ທີ່ທົ່ງໄຫຫີນຊຽງຂວາງ ຄົບຮອບ 63 ປີ (18/5/1959-18/5/2022); ວັນວິລະກໍາໂຕນຄຸກຢ່າງມະຫັດສະຈັນ ຂອງບັນດາຜູ້ນໍາຂອງພັກ ແລະ ແນວລາວຮັກຊາດ ຄົບຮອບ 62 ປີ (24/5/1960-24/5/2022); ວັນກໍາມະກອນສາກົນ ຄອບຮອບ 136 ປີ (1/5/1986-1/5/2022); ຮັບຟັງສະຫາຍ ນາງ ວຽງຄໍາ ວໍລະຈິດ ປະທານກວດກາຄະນະໜ່ວຍພັກ ເລົ່າຄືນວັນຄ້າຍເກີດຂອງທ່ານ ກາກມາກ ຄົບຮອບ 204 ປີ (5/5/1818-5/5/2022); ວັນໄຊຊະນະຂອງສະຫະພາບໂຊວຽດ ເໜືອຟາດຊິດເຢຍລະມັນ ໃນສົງຄາມໂລກ ຄັ້ງທີ II ຄົບຮອບ 77 ປີ (9/5/1945-9/5/2022); ຮັບຟັງ ສະຫາຍ ນາງ ພອນສະຫວັນ ສັກຕິຄຸນ ເລົ່າຄືນມູນເຊື້ອວັນໄຊຊະນະດຽນບຽນຟູ ຄົບຮອບ 68 ປີ (7/5/1954- 7/5/2022); ວັນຄ້າຍວັນເກີດຂອງປະທານໂຮ່ຈີມິນ ຄົບຮອບ 132 ປີ (19/5/1890-19/5/2022).

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ