ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 02 ມີນາ 2022 ນີ້ ຄະນະເລຂາທິການ ພ້ອມທັງບັນດາຂະແໝງກ່ຽວຂ້ອງພາຍໃນສະພາປະຊາຊົນແຂວງ ເຂົ້າຮ່ວມກອງປະຊຸມ ສະຫຼຸບການເຄື່ອນໄຫວປະຈໍາປີ 2021 ແລະ ວາງທິດທາງວຽກງານປີ 2022 ຂອງສະຖາບັນຄົ້ນຄວ້ານິຕິກຳສະພາແຫ່ງຊາດ (ໃນຮູບແບບອອນລາຍ) ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງ​ປະ​ທານ​ສະພາແຫ່ງ​ຊາດ ແລະ ທ່ານ ປອ ຢ່າງກູ້ ຢ່າງລືໄຊ ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ທ່ານ ບໍ ຫານປະເສີດ ຫົວໜ້າສູນຄົ້ນຄວ້າວິທະຍາສາດ ແລະ ນິຕິກໍາ ສະພາແຫ່ງຊາດ, ນອກຈາກນີ້ຍັງມີຮອງຫົວໜ້າສະຖາບັນ, ປະທານກໍາມາທິການຕ່າງໆ, ຄະນະເລຂາທິການ ສະພາປະຊາຊົນຂັ້ນແຂວງໃນທົ່ວປະເທດ.

ພາຍຫຼັງກ່າວເປີດກອງປະຊຸມຢ່າງເປັນທາງການແລ້ວ ກອງປະຊຸມ ໄດ້ຮັບຟັງການລາຍງານແຜນພັດທະນາວຽກງານຂອງສະຖາບັນຄົ້ນຄວ້ານິຕິກຳສະພາແຫ່ງຊາດ ໄລຍະ 05 ປີ(2021 – 2025), ພ້ອມທັງ ໄດ້ຮັບຟັງການລາຍງານສະຫຼຸບການເຄື່ອນໄຫວປະຈໍາປີ 2021 ແລະ ວາງທິດທາງວຽກງານປີ 2022 ຂອງສະຖາບັນຄົ້ນຄວ້ານິຕິກຳສະພາແຫ່ງຊາດ ຈາກນັ້ນ, ບັນດາທ່ານທີ່ເຂົ້າຮ່ວມກອງປະຊຸມໄດ້ສຸມໃສ່ປະກອບຄໍາເຫັນຢ່າງມີຈຸດສຸມ.

ຈາກນັ້ນ ທ່ານປະທານກອງປະຊຸມກໍ່ໄດ້ໂອ້ລົມຕໍ່ກອງປະຊຸມ ເພື່ອເນັ້ນໃຫ້ແກ່ການຈັດຕັ້ງແຜນພັດທະນານິຕິກໍາຂອງສະພາແຫ່ງຊາດ ໄດ້ຮັບຜົນເປັນຈິງ ໂດຍສະເພາະການສະໝອງບັນດາຂໍ້ມູນ ທີ່ສາມາດເປັນບ່ອນອີງໃນການຈັດຕັ້ງປະຕິບັດ, ນໍາຜົນປະໂຫຍດລວມມາສູ່ປະເທດຊາດ ແລະ ປະຊາຊົນບັນດາເຜົ່າຢ່າງແທ້ຈິງ.

ໃນວາລະສຸດທ້າຍນີ້ ທ່ານ ປອ ຢ່າງກູ້ ຢ່າງລືໄຊ ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ກ່າວຮັບຄຳໂອ້ລົມຈາກທ່ານປະທານກອງປະຊຸມ ພ້ອມທັງກ່າວປິດພິທີ.