ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


ຄະນະຜູ້ແທນຄະນະເລຂາທິການສະພາແຫ່ງຊາດແຫ່ງ ສປປລາວ ນໍາໂດຍສະຫາຍ ນາງ ປິ່ງຄໍາ ລາຊະສິມມາ ກໍາມະການສູນກາງພັກ, ເລຂາທິການສະພາແຫ່ງຊາດລາວ ໄດ້​ເດີນທາງ​ເຂົ້າຮ່ວມກອງປະຊຸມສໍາມະນາແລກປ່ຽນບົດຮຽນ ຄັ້ງທີ XI ລະຫວ່າງຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາແຫ່ງຊາດຫວຽດນາມ ທີ່ຈັດຂຶ້ນຢູ່ແຂວງກວາງບິງ ສສ.ຫວຽດນາມ.
ໃນວັນທີ 19 ສິງຫາ 2022 ພາຍຫລັງທີ່ຄະນະຜູ້ແທນຄະນະເລຂາທິການສະພາແຫ່ງຊາດລາວ ​ໄດ້​ເດີນທາງ​ໄປ​ເຖິງ, ສະຫາຍ ນາງ ປິ່ງຄໍາ ລາຊະສິມມາ ພ້ອມດ້ວຍຄະນະທາງການ ໄດ້ເຂົ້າຢ້ຽມຂ່ຳນັບສະຫາຍ ເຈີ່ນ ແທັງ ເມີ້ນ ກຳມະການກົມການເມືອງສູນກາງພັກ, ຮອງປະທານສະພາແຫ່ງຊາດຫວຽດນາມ ຜູ້ປະຈຳການ ແລະ ໄດ້ພົບປະສອງຝ່າຍ ກັບສະຫາຍ ບຸ່ຍ ວັນ ເກື່ອງ ເລຂາທິການ, ຫົວໜ້າຫ້ອງວ່າການສະພາແຫ່ງຊາດຫວຽດນາມ.
ໃນກອງປະຊຸມພົບປະ, ທັງສອງຝ່າຍ ໄດ້ຕີລາຄາຄືນການພົວພັນຮ່ວມມື ໂດຍສະເພາະແມ່ນການຈັດຕັ້ງປະຕິບັດບົດບັນທຶກການຮ່ວມມື ສະບັບປີ 2017-2019 ​ແລະ ບົດບັນທຶກ​ທີ່​ເຊັນ​ກັນ​ໃນ​ເດືອນ​ພຶດສະພາ 2022 ພ້ອມທັງປຶກສາຫາລືທິດທາງແຜນການຮ່ວມມືໃນຕໍ່ໜ້າ.
(ຂ່າວ: ນາງ ປາກາລັກ ພົມມີໄຊ; ພາບ: ນາງ ນິດຕາ ຄຸນປາກດີ)