ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຄະນະເລຂາທິການສະພາແຫ່ງຊາດ ລົງຕິດຕາມຊຸກຍູ້ ແລະ ເກັບກໍາຂໍ້ມູນການເຄື່ອນໄຫວວຽກງານ ຄະນະເລຂາທິການ ສະພາປະຊາຊົນແຂວງຫລວງນ້ຳທາ

ຕອນບ່າຍວັນທີ 10 ມີນາ 2022 ນີ້ຄະນະເລຂາທິການ ສະພາແຫ່ງຊາດ ນຳໂດຍ ທ່ານ ສິງຄໍາ ວົງພະຈັນ ຮອງເລຂາທິການສະພາແຫ່ງຊາດ ພ້ອມດ້ວຍຄະນະ ໄດ້ລົງຕິດຕາມຊຸກຍູ້ ແລະ ເກັບກໍາຂໍ້ມູນການເຄື່ອນໄຫວວຽກງານ ຂອງຄະນະເລຂາທິການສະພາປະຊາຊົນແຂວງ ແລະ ໄດ້ເປີດກອງປະຊຸມຮ່ວມ ກັບຄະນະເລຂາທິການສະພາປະຊາຊົນແຂວງ ຢູ່ທີ່ຫ້ອງປະຊຸມສະພາປະຊາຊົນແຂວງ ມີສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ພ້ອມດ້ວຍຄະນະທິມງານຈາກຄະນະເລຂາທິການສະພາແຫ່ງຊາດ, ພະນັກງານລັດຖະກອນພາຍໃນຄະນະເລຂາທິການສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.

ໃນກອງປະຊຸມທ່ານ ຂັດ ໝັ້ນທະໄລ ຮອງເລຂາທິການສະພາປະຊາຊົນແຂວງ ໄດ້ລາຍງານສະພາບລວມອັນພົ້ນເດັ່ນໃນການຈັດຕັ້ງປະຕິບັດວຽກງານ ພາຍໃນຄະນະເລຂາທິການສະພາປະຊາຊົນແຂວງໃນໄລຍະຜ່ານມາເປັນຕົ້ນ; ຍົກໃຫ້ເຫັນເຖີງຜົນງານດ້ານດີ, ດ້ານອ່ອນຂໍ້ຄົງຄ້າງໃນການເປັນເສນາທິການໃຫ້ ແກ່ຄະນະປະຈໍາສະພາປະຊາຊົນແຂວງ ແລະ ສະມາຊິກສະພາປະຊາຊົນແຂວງ ໂດຍສະເພາະ ຕໍ່ກັບວຽກງານດ້ານເນື້ອໃນ, ວຽກງານຈັດຕັ້ງພະນັກງານ, ວຽກງານກວດກາ, ວຽກງານຄຸ້ມຄອງຫ້ອງການ, ວຽກງານບໍລິຫານ, ພິທິການ, ວຽກງານການເງິນ ແລະ ວຽກງານສື່ມວນຊົນ; ພ້ອມດຽວກັນ ບັນດາທ່ານເຂົ້າຮ່ວມກອງປະຊຸມ ໄດ້ແລກປ່ຽນບົດຮຽນ, ປະກອບຄຳຄິດເຫັນຕໍ່ວຽກງານຂອງຄະນະເລຂາທິການຢ່າງມີຈຸດສຸມ ເພື່ອເຮັດໃຫ້ການຈັດຕັ້ງປະຕິບັດວຽກງານໃນການເປັນເສນາທິການໃຫ້ດີຂື້ນກວ່າເກົ່າ.

ໃນໂອກາດນີ້ ສະພາແຫ່ງຊາດ ຍັງໄດ້ເຂົ້າພົບປະທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ ແລະ ໄດ້ນຳເອົາເຄື່ອງສື່ສານທີ່ທັນສະໄໝ ສະມາດບອດ Smart Board (VIEWSONIC IFP6570) ທີ່ໄດ້ຮັບການຊ່ວຍເຫລືອຈາກແຜນງງານເຊກາ (CEGGA) ເຊິ່ງລວມມີສະຫະພາບເອີຣົບ/EU, ອົງການ ຮ່ວມມືເພື່ອການພັດທະນາແຫ່ງປະເທດສະວິສເຊີແລນ (SDC), ລັດຖະບານເຢຍລະມັນ/Germany ລວມມູນຄ່າ 150 ກວ່າລ້ານກີບ, ມອບໃຫ້ສະພາປະຊາຊົນແຂວງ ເພື່ອນຳໃຊ້ເຂົ້າໃນການຈັດຕັ້ງປະຕິບັດວຽກງານເຊັ່ນ; ຈັດກອງປະຊຸມແບບອອນລາຍທາງໄກ, ຝຶກອົບຮົມແລະ ການສຳມະນາຕ່າງໆ ຂອງສະພາປະຊາຊົນແຂວງ; ໂດຍໃຫ້ກຽດກ່າວມອບຂອງ ທ່ານ ສິງຄໍາ ວົງພະຈັນ ຮອງເລຂາທິການສະພາແຫ່ງຊາດ ແລະ ກ່າວຮັບຂອງ ທ່ານ ກົງເພັດ ແກ້ວບົວພາ ຮອງປະທານສະພາປະຊາຊົນແຂວງ; ທັງນີ້ກໍເພື່ອຍົກສູງການຫັນເປັນທັນສະໄໝ ໃນການນໍາໃຊ້ອຸປະກອນສື່ສານໄອທີເຂົ້າໃນການປະຕິບັດໜ້າທີ່ວຽກງານຂອງສະພາປະຊາຊົນແຂວງ.

ໂດຍ ນາງ ວັນນີ ແຝງບົວວັນ