(ສພຊ) ຄະນະສັນຕິພາບ ແລະ ສາມັກຄີຂອງລາວ ໄດ້ມອບຄອມພິວເຕີແລັບທັອບ ທີ່ໄດ້ຮັບການຊ່ວຍເຫຼືອຈາກ ກອງທຶນຈີນ ເພື່ອສັນຕິພາບ ແລະ ການພັດທະນາ ຈຳນວນ 10 ຊຸດ ມູນຄ່າ 119 ລ້ານກວ່າກີບ ໃຫ້ໂຮງຮຽນປະຖົມສົມບູນບ້ານໜອງປີງ ເມືອງຈັນທະບູລີ ນະຄອນຫຼວງວຽງຈັນ ເມື່ອວັນທີ 2 ພະຈິກ 2023 ທີ່ສະພາແຫ່ງຊາດ ໂດຍການມອບຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີຂອງລາວ ແລະ ຮັບໂດຍທ່ານ ນາງ ພັນທອງ ຄຳທອງມີ ອຳນວຍການໂຮງຮຽນປະຖົມສົມບູນດັ່ງກ່າວ, ເຂົ້າຮ່ວມເປັນສັກຂີພິຍານມີບັນດາທ່ານສະມາຊິກສະພາແຫ່ງຊາດ, ຄູອາຈານ, ນ້ອງນ້ອຍນັກຮຽນ ແລະ ພາກສ່ວນກ່ຽວຂ້ອງ.

ຄະນະສັນຕິພາບ ແລະ ສາມັກຄີ ຂອງລາວ ແລະ ກອງທຶນຈີນ ເພື່ອສັນຕິພາບ ແລະ ການພັດທະນາ ໄດ້ຮ່ວມມືກັນ ປະກອບສ່ວນໃນການພັດທະນາຢູ່ ສປປລາວ ຢ່າງຫຼວງຫຼາຍເປັນຕົ້ນ ແມ່ນພື້ນຖານໂຄງລ່າງການສຶກສາ. ປັດຈຸບັນ ສອງອົງການຈັດຕັ້ງໄດ້ຮ່ວມກັນສ້າງໂຮງຮຽນປະຖົມ ແລະ ມັດທະຍົມ ຈໍານວນ 17 ຫຼັງ ໃນ 9 ແຂວງ ຢູ່ ສປປລາວ. ນອກນັ້ນ, ຍັງໄດ້ຊ່ວຍເຫຼືອອຸປະກອນການຮຽນ-ການສອນ, ອຸປະກອນການແພດໃນໄລຍະການລະບາດຂອງພະຍາດໂຄວິດ-19.

ໂຮງຮຽນປະຖົມບ້ານໜອງປີງ ສ້າງຂຶ້ນໃນປີ 2014 ເປັນໂຮງຮຽນສັນຍາລັກຫຼັງທໍາອິດພາຍໃຕ້ໂຄງການເພື່ອນເສັ້ນທາງສາຍໄໝ ເຊິ່ງແມ່ນໂຮງຮຽນທີ່ສ້າງຂຶ້ນໂດຍການຮ່ວມມືລະຫວ່າງ ຄະນະສັນຕິພາບ ແລະ ສາມັກຄີຂອງລາວ ແລະ ກອງທຶນຈີນ ເພື່ອສັນຕິພາບ ແລະ ການພັດທະນາ.

(ພາບ ແລະ ຂ່າວ: ນາງ ປາກາລັກ ພົມມີໄຊ)