ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ຕອບສະໜອງຕາມການເຊື້ອເຊີນ ຂອງ ທ່ານ Yondonperenlein BAATARBILEG ປະທານຄະນະມິດຕະພາບລັດຖະສະພາ ມົງໂກລີ-ລາວ, ໃນລະຫວ່າງວັນທີ 6-12 ກັນຍາ 2022 ທ່ານ ພົຕ. ປອ. ວົງສັກ ພັນທະວົງ ກຳມະການຄະນະປະຈຳສະພາແຫ່ງຊາດ, ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ, ປະທານຄະນະມິດຕະພາບລັດຖະສະພາ ລາວ-ມົງໂກລີ ຂອງສະພາແຫ່ງຊາດລາວ ພ້ອມດ້ວຍຄະນະ ເດີນທາງຢ້ຽມຢາມ ແລະ ເຮັດວຽກ ຢູ່ປະເທດມົງໂກລີ, ຈຸດປະສົງຂອງການຢ້ຽມຢາມ ແລະ ເຮັດວຽກໃນຄັ້ງນີ້ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ມົງໂກລີ ຄົບຮອບ 60 ປີ, ປະກອບສ່ວນຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອທີ່ດີ ລະຫວ່າງ ລາວ-ມົງໂກລີ ກໍຄືການພົວພັນຮ່ວມມື ລະຫວ່າງ ສະພາແຫ່ງຊາດ ແຫ່ງ ສປປລາວ ແລະ ສະພາຄູຣານໃຫຍ່ ແຫ່ງ ມົງໂກລີ ໃຫ້ນັບມື້ນັບຂະຫຍາຍຕົວ ແລະ ເປັນຮູບປະທຳຫຼາຍຂຶ້ນ.
ໃນການຢ້ຽມຢາມ ແລະ ເຮັດວຽກຄັ້ງນີ້ ຄະນະມິດຕະພາບລັດຖະສະພາ ລາວ-ມົງໂກລີ, ມົງໂກລີ-ລາວ ໄດ້ພົບປະສອງຝ່າຍນຳກັນ ທີ່ທຳນຽບແຫ່ງລັດ ຂອງມົງໂກລີ ເຊິ່ງໄດ້ຕີລາຄາຄືນການພົວພັນຮ່ວມມືໃນໄລຍະຜ່ານມາ ແລະ ພ້ອມກັນປຶກສາຫາລືທິດທາງແຜນການພົວພັນຮ່ວມມືໃນຕໍ່ໜ້າ ລະຫວ່າງ ຄະນະມິດຕະພາບລັດຖະສະພາ ລາວ-ມົງໂກລີ, ມົງໂກລີ-ລາວ ໃນນາມທີ່ເປັນກົນໄກໜຶ່ງ ຂອງສອງອົງການນິຕິບັນຍັດ ລາວ-ມົງໂກລີ ເພື່ອຊຸກຍູ້ ແລະ ສົ່ງເສີມການພົວພັນ ແລະ ຮ່ວມມືລະຫວ່າງສອງອົງການນິຕິບັນຍັດ, ສອງຝ່າຍໄດ້ຕີລາຄາສູງ ຕໍ່ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືທີ່ດີ ລະຫວ່າງ ສປປລາວ ແລະ ມົງໂກລີ ຕະຫຼອດໄລຍະຜ່ານມາ. ໂດຍສະເພາະ ຕີລາຄາການພົວພັນຮ່ວມມື ຂອງສອງອົງການນິຕິບັນຍັດ, ກໍຄືຄະນະມິດຕະພາບລັດຖະສະພາລາວ-ມົງໂກລີ, ສອງຝ່າຍ ໄດ້ເຫັນດີເປັນເອກະພາບກັນວ່າ ການພົວພັນຮ່ວມມືໄດ້ສືບຕໍ່ເສີມຂະຫຍາຍຢ່າງຕໍ່ເນື່ອງ ແລະ ເຂົ້າສູ່ລວງເລິກເປັນກ້າວໆມາ ເຊິ່ງສອງຝ່າຍຈະໄດ້ພ້ອມກັນຊຸກຍູ້ໃຫ້ມີການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ແຕ່ສູນກາງລົງຮອດທ້ອງຖິ່ນ ລະຫວ່າງ ສອງປະເທດ ໂດຍສະເພາະ ລະຫ່ວາງສະພາແຫ່ງຊາດລາວ ແລະ ສະພາຄູຣານໃຫຍ່ ແຫ່ງ ມົງໂກລີ ມີການພົວພັນຮ່ວມມື ຢ່າງເປັນປະຈຳຕໍ່ເນື່ອງ ເປັນຕົ້ນແມ່ນ ສອງຝ່າຍໄດ້ມີການແລກປ່ຽນຄະນະຜູ້ແທນຢ້ຽມຢາມ ເຊິ່ງກັນ ແລະ ກັນ, ມີການສົ່ງສານອວຍພອນກັນໃນວັນສຳຄັນຕ່າງໆເຊິ່ງກັນແລະ ກັນ. ພ້ອມນີ້ ຍັງເຫັນວ່າການພົວພັນຮ່ວມມືທາງດ້ານເສດຖະກິດ, ການຄ້າ, ການລົງທຶນ ແລະ ການທ່ອງທ່ຽວ ໃນໄລຍະຜ່ານມາ ແມ່ນຍັງມີບໍ່ຫຼາຍ, ແຕ່ຂະແໜງການກ່ຽວຂ້ອງຂອງສອງຝ່າຍ ກໍໄດ້ພະຍາຍາມຊຸກຍູ້ ເພື່ອໃຫ້ມີການຮ່ວມມື ໃນດ້ານດັ່ງກ່າວຫຼາຍຂຶ້ນ. ອັນພົ້ນເດັ່ນກວ່າໝູ່ ແມ່ນດ້ານສາທາລະນະສຸກ, ກະສິກຳ ແລະ ລ້ຽງສັດ ເຊິ່ງຝ່າຍມົງໂກລີ ໄດ້ຊ່ວຍສ້າງ, ຟື້ນຟູໂຮງໝໍ ແລະ ສົ່ງຊ່ຽວຊານແພດໝໍ ມາປະຈຳ ຢູ່ແຂວງຊຽງຂວາງ, ໄດ້ມອບແກະ ຈຳນວນ ພັນກວ່າໂຕໃຫ້ແກ່ລາວ ເຊິ່ງກາຍເປັນສັນຍາລັກໜຶ່ງໃຫ້ແກ່ການພົວພັນຮ່ວມມືສອງປະເທດ. ສອງຝ່າຍເຫັນວ່າ ເນື່ອງຈາກການລະບາດຂອງພະຍາດໂຄວິດ-19 ຜ່ານມາສອງຝ່າຍບໍ່ສາມາດໄປມາຫາສູ່ກັນໄດ້ ແຕ່ການພົວພັນກໍບໍ່ໄດ້ຢຸດສະງັກ, ແຕ່ລະຂະແໜງການຂອງສອງປະເທດຍັງສືບຕໍ່ສົ່ງສານອວຍພອນ, ສານຊົມເຊີຍນຳກັນເນື່ອງໃນໂອກາດສຳຄັນຕ່າງໆຂອງສອງປະເທດ, ພ້ອມນີ້ ຍັງໄດ້ປຶກສາຮ່ວມກັນເພື່ອຊຸກຍູ້ສົ່ງເສີມການຮ່ວມມື ທາງດ້ານການພັດທະນາຊັບພະຍາກອນມະນຸດ, ການຄ້າ, ການລົງທຶນ ແລະ ການທ່ອງທ່ຽວ ລະຫວ່າງປະເທດຕື່ມອີກ, ໂດຍອີງໃສ່ທ່າແຮງຂອງສອງຝ່າຍ. ຄະນະຜູ້ແທນ ຍັງເຂົ້າຢ້ຽມຂ່ຳນັບ ທ່ານ ກ. ຊັງຕັງຊາທາຣ໌ ປະທານສະພາຄູຣານໃຫຍ່ ແຫ່ງ ມົງໂກລີ, ພົບປະເຮັດວຽກກັບປະທານກຳມາທິການຄວາມໝັ້ນຄົງ ແລະ ນະໂຍບາຍຕ່າງປະເທດຂອງສະພາຄູຣານໃຫຍ່ ແຫ່ງ ມົງໂກລີ, ລັດຖະມົນຕີກະຊວງປ້ອງກັນປະເທດ, ລັດຖະມົນຕີກະຊວງສາທາລະນະສຸກ, ປະທານຄະນະກຳມະການຮ່ວມມືມົງໂກລີ-ລາວ ໂດຍເຫັນວ່າ ການນຳຂັ້ນສູງ ຕະຫຼອດຮອດຂະແໜງການກ່ຽວຂ້ອງ ຂອງປະເທດ ມົງໂກລີ ໄດ້ໃຫ້ຄວາມສຳຄັນ ເປັນຢ່າງດີ ຕໍ່ຄະນະຜູ້ແທນຝ່າຍລາວ ແລະ ໃນໂອກາດນີ້, ຄະນະ ຍັງໄດ້ເຂົ້າຮ່ວມກອງປະຊຸມວິທະຍາສາດ “ວັນຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດລະຫວ່າງ ມົງໂກລີ ແລະ ສປປລາວ”, ເຊິ່ງຫົວໜ້າຄະນະຜູ້ແທນໄດ້ກ່າວຄຳປາໄສ ຢູ່ໃນກອງປະຊຸມວິທະຍາສາດດັ່ງກ່າວ. ນອກຈາກນີ້, ຄະນະຜູ້ແທນ ໄດ້ໄປເຄື່ອນໄຫວຢ້ຽມຢາມ ຢູ່ແຂວງອາຣ໌າຮັງໄກ ເຊິ່ງເປັນແຂວງໜຶ່ງຂອງມົງໂກລີ ທີ່ມີທໍາມະຊາດທີ່ສວຍງາມ ແລະ ອຸດົມສົມບູນ, ມີພື້ນຖານການຜະລິດກະສິກໍາທີ່ມີຊື່ສຽງ, ມີສະຖານທີ່ປະຫວັດສາດ, ວັດທະນະທຳ ແລະ ເປັນເອກະລັກຂອງມົງໂກລີ ຕື່ມອີກ.