ກອງປະຊຸມສະຫຼຸບຕີລາຄາຄືນຜົນການນຳພາ-ຊີ້ນຳວຽກງານຮອບດ້ານກາງສະໄໝ (2 ປີເຄີ່ງ)2021-2023 ຂອງຄະນະພັກຮາກຖານສະພາປະຊາຊົນແຂວງ ໄດ້ຈັດຂຶ້ນໃນຕອນເຊົ້າຂອງວັນທີ 07 ສິງຫາ 2024 ຢູ່ຫ້ອງປະຊຸມສະພາປະຊາຊົນແຂວງ ໃຫ້ກຽດເຂົ້າຮ່ວມຂຶ້ນເຜີຍແຜ່ເອກະສານຂອງສະຫາຍ ປອ ສຸວັນນີ ໄຊຊະນະ, ຮອງເລຂາຄະນະບໍລິຫານງານພັກແຂວງ ປະທານສະພາປະຊາຊົນແຂວງບໍລິຄຳໄຊ ມີສະຫາຍ ໃສຄຳ ທອງລັດ ກຳມະການພັກແຂວງ ເລຂາຄະນະພັກຮາກຖານສະພາປະຊາຊົນແຂວງບໍລິຄຳໄຊ ມີຄະນະຊຸກຍູ້ກອງປະຊຸມຂັ້ນແຂວງ, ມີຄະນະພັກຮາກຖານ, ເລຂາໜ່ວຍພັກ , ສະມາຊິກພັກທັງ 4 ໜ່ວຍພັກທີ່ຂຶ້ນກັບຄະນະພັກເຂົ້າຮ່ວມ.

ສະຫາຍ ປອ ສຸວັນນີ ໄຊຊະນະ ໄດ້ຍົກໃຫ້ເຫັນບັນດາເນື້ອໃນ 4 ເອກສານ ເປັນຕົ້ນແມ່ນ ຄວາມສຳຄັນ, ເຫດຜົນ ແລະ ຈຸດປະສົງຂອງການດຳເນີນກອງປະຊຸມກາງສະໄໝແຕ່ລະຂັ້ນ, ຈຸດປະສົງກໍ່ເພື່ອເຮັດໃຫ້ສະມາຊິກພັກຮັບຮູ້ເຂົ້າໃຈຕໍ່ບັນດາເນື້ອໃນເອກະສານດັ່ງກ່າວຢ່າງເລິກເຊີ່ງ ເປັນບ່ອນອິງເຂົ້າໃນການທາບທາມຄວາມໄວ້ວາງໃຈ ຄະນະພັກຮາກຖານ, ຄະນະໜ່ວຍພັກ, ສະມາຊິກພັກ ແລະ ເຂົ້າໃນການຂຽນໃບສຳຫຼວດ, ການໃຫ້ຄະແນນຈັດແບ່ງປະເພດຕົນເອງ ແລະ ສະມາຊິກພັກດ້ວຍກັນ, ກອງປະຊຸມກາງສະໄໝຄັ້ງນີ້ຈະໄດ້ແບ່ງໜ່ວຍ ສຳຫຼວດກວດກາຜົນງານການນຳພາ-ຊີ້ນຳຄະນະເລຂາໜ່ວຍພັກ ແລະ ທາບທາມບຸກຄະລິກຄະພາບຕາມ 4 ດ້ານສຳລັບຜູ້ທີ່ມີຕຳແໜ່ງປະເພດ 6 ຂຶ້ນໄປ ເພື່ອຕີລາຄາທົບທວນຄືນການນໍາພາຈັດຕັ້ງປະຕິບັດບັນດາທິດທາງ, ເນື້ອໃນ, ຄາດໝາຍ ທີ່ກອງປະຊຸມໃຫຍ່ ຂັ້ນຂອງຕົນວາງອອກ ອັນໃດໄດ້ເຮັດມີຜົນສໍາເລັດ ແລະ ອັນໃດຍັງຄົງຄ້າງ ເພື່ອສືບຕໍ່ນໍາພາປະຕິບັດ ໃຫ້ບັນລຸຜົນຕາມໄດ້ກຳນົດໄວ້, ເພື່ອກວດກາຄວາມຮັບຜິດຊອບໜ້າທີ່ການເມືອງ ຂອງບັນດາສະຫາຍເລຂາໜ່ວຍພັກຕໍ່ກັບການນໍາພາລວມ ແລະ ຄວາມຮັບຜິດຊອບຂອງບຸກຄົນໃນຄະນະພັກ ຕາມການແບ່ງງານ, ແບ່ງຄວາມຮັບຜິດຊອບ; ຊອກໃຫ້ ເຫັນດ້ານຕັ້ງໜ້າ ທີ່ຈະເສີມຂະຫຍາຍ, ດ້ານອ່ອນຄົງຄ້າງ ທີ່ຈະໄດ້ແກ້ໄຂ, ປະຕິບັດຫຼັກການ ຕຳນິຕົນເອງ ແລະ ຕິຊົມເຊິ່ງກັນ ແລະ ກັນ ພາຍໃນພັກ, ເພີ່ມທະວີຄວາມສາມັກຄີເປັນເອກະພາບພາຍໃນຄະນະພັກ, ຍົກສູງນໍ້າໃຈຮັບຜິດຊອບ ເປັນແບບຢ່າງນໍາໜ້າຂອງຄະນະພັກ ເພື່ອເປັນໃຈກາງ-ຫຼັກແຫຼ່ງ ໃຫ້ແກ່ການປັບປຸງກໍ່ສ້າງພັກ ໃຫ້ປອດໃສ, ເຂັ້ມແຂງ, ໜັກແໜ້ນ. ກອງປະຊຸມສະຫຼຸບຕີລາຄາຄືນຜົນງານການນຳພາ-ຊີ້ນຳກາງສະໄໝ (2 ປີເຄີ່ງ)ຄະນະພັກຮາກຖານສະພາປະຊາຊົນແຂວງ ບໍລິຄຳໄຊຈະໄດ້ດຳເນີນ 3 ວັນຈິ່ງຈະສໍາເລັດ.

ຂ່າວ-ພາບ: ໂສລະຢ໋າ