(ສພຊ) – ຄະນະຜູ້ແທນສະພາແຫ່ງຊາດລາວ ນໍາໂດຍທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ ໄດ້ສໍາເລັດການເຂົ້າຮ່ວມກອງປະຊຸມສຳມະນາກ່ຽວກັບການປະຕິບັດການປົກຄອງທີ່ດີຂອງລັດຖະສະພາເຊິ່ງໄດ້ຈັດຂຶ້ນໃນລະຫວ່າງວັນທີ 03-05 ເມສາ 2024 ທີ່ບາງກອກ, ລາຊະອານາຈັກໄທ ໂດຍມີຕົວແທນຈາກບັນ ດາປະເທດສະມາຊິກລັດຖະສະພາໃນພາກພື້ນອາຊຽນ ແລະ ພາກພື້ນອື່ນ.

ຈຸດປະສົງກອງປະຊຸມສຳມະນາຄັ້ງນີ້ ເປັນເວທີແລກປ່ຽນຄຳຄິດຄຳເຫັນ ແລະ ບົດຮຽນເຊິ່ງກັນ ແລະກັນກ່ຽວກັບການບໍລິຫານ ແລະ ການປົກຄອງຂອງແຕ່ລະລັດຖະສະພາໃນພາກພື້ນອາຊຽນ ແລະ ພາກພື້ນອື່ນ; ພ້ອມດຽວກັນນັ້ນ, ກໍເປັນໂອກາດອັນດີທີ່ບັນດາສະມາຊິກລັດຖະສະພາທີ່ເຂົ້າຮ່ວມ ໄດ້ປຶກສາຫາລືກ່ຽວກັບຜົນປະ ໂຫຍດ ແລະ ແນວທາງທີ່ກ່ຽວຂ້ອງກັບການຮ່າງ ແລະ ການຈັດຕັ້ງປະຕິບັດລະບຽບການ, ພາລະບົດບາດ, ສິດ ແລະ ໜ້າທີ່ຄວາມຮັບຜິຊອບໃນລັດຖະສະພາຂອງຕົນ ໂດຍສະເພາະເຄື່ອງມືຕ່າງໆທີ່ນຳໃຊ້ເຂົ້າໃນການບໍລິຫານ ການປົກຄອງ ເພື່ອສະແດງໃຫ້ເຫັນເຖິງຄວາມໂປ່ງໃສໃນການປົກຄອງ ເຊິ່ງຄະນະຜູ້ແທນລາວກໍໄດ້ມີການຄົ້ນຄວ້າ, ແລກປ່ຽນ ແລະ ປະກອບຄຳເຫັນຕໍ່ກອງປະຊຸມຢ່າງສ້າງສັນ ແລະ ກົງໄປກົງມາ.