(ສພຊ) ໃນລະຫວ່າງວັນທີ 07-08 ກຸມພາ 2024 ຄະນະຜູ້ແທນສະພາແຫ່ງຊາດລາວນຳໂດຍທ່ານ ສັນ ຍາ ປຣະເສີດ ກໍາມະການຄະນະປະຈໍາ, ປະທານກຳມາທິການການຕ່າງປະເທດ ແລະ ທ່ານ ສຸບັນ ສະວະບຸດ ກໍາມະການຄະນະປະຈໍາ, ປະທານກໍາມາທິການວຽກງານສະມາຊິກສະພາແຫ່ງຊາດ ພ້ອມດ້ວຍພະນັກງານກ່ຽວຂ້ອງ ໄດ້ເດີນທາງໄປເຂົ້າຮ່ວມສັງເກດການການເລືອກຕັ້ງປະທານາທິບໍດີ ແຫ່ງ ສາທາລະນະລັດ ອາແຊກໄບຊານ ຕາມການເຊື່ອເຊີນຂອງປະທານລັດຖະສະພາປະເທດດັ່ງກ່າວ ໃນນາມຄະນະຜູ້ແທນຈາກລັດຖະສະພາລະຫວ່າງຊາດອາ ຊຽນ ຫຼື ໄອປາ (AIPA) ເຊິ່ງມີຂຶ້ນໃນວາລະທີ່ສະພາແຫ່ງຊາດ ແຫ່ງ ສປປລາວ ເປັນປະທານໄອປາໃນປີ 2024.
ການເລືອກຕັ້ງປະທານາທິບໍດີ ແຫ່ງ ສ.ອາແຊກໄບຊານ ຈັດຂຶ້ນທຸກໆ 7 ປີ, ແຕ່ຄັ້ງນີ້ແມ່ນຈັດຂຶ້ນກ່ອນກໍານົດ 1 ປີ ເຊິ່ງມີຜູ້ລົງສະໝັກຮັບເລືອກຕັ້ງເປັນປະທານາທິບໍດີທັງໝົດ 7 ທ່ານ ໃນນີ້, ມີຜູ້ສະໝັກເອກະລາດ 2 ທ່ານ ແລະ ຜູ້ສະໝັກທີ່ເປັນຕົວແທນຈາກພັກການເມືອງ 5 ທ່ານ ປະກອບມີ: 1) ທ່ານ ອິລຮາມ ອາລີເຢັບ (Ilham Aliyev) ປະທານາທິບໍດີຄົນປັດຈຸບັນ ຈາກພັກອາແຊກໄບຊານໃໝ່; 2) ທ່ານ ຊາຮິດ ໂອຣຸກ (Zahid Oruc) ຜູ້ສະໝັກເອກະລາດ; 3) ທ່ານ ຟາຊິລ ມູສຕາຟາ (Fazil Mustafa) ຈາກພັກ ກຣີດ ອໍເດີ ປາຕີ (Great Order Party); 4) ທ່ານ ແອລຊາດ ມູຊາເຢັບ (Elsad Musayev) ຈາກພັກອາແຊກໄບຊານຍິ່ງໃຫຍ່; 5) ທ່ານ ຄູດຣາດ ຮາຊານກູລີເຢັບ (Qudrat Hasanquliyev) ຈາກພັກແນວໂຮມປະຊາຊົນອາແຊກໄບຊານ; 6) ທ່ານ ຣາຊີ ນູຣູລາເຢັບ (Razi Nurullayev) ຈາກພັກແນວໂຮມແຫ່ງຊາດ ແລະ 7) ທ່ານ ຟູອາດ ອາລີເຢັບ (Fuad Aliyev) ຜູ້ສະໝັກເອກະລາດ.
ຄະນະກຳມະການເລືອກຕັ້ງລະດັບຊາດ ໄດ້ກຳນົດເຂດເລືອກຕັ້ງອອກເປັນ 125 ເຂດ ໃນທົ່ວປະເທດ, ມີ 6.319 ໜ່ວຍເລືອກຕັ້ງ (ບໍ່ລວມໜ່ວຍເຄື່ອນທີ່) ເຊິ່ງຜູ້ມີສິດເລືອກຕັ້ງທີ່ມີອາຍຸຄົບ 18 ປີບໍລິບູນຂຶ້ນໄປ ຈໍານວນ 6,4 ລ້ານຄົນ, ການເລືອກຕັ້ງໄດ້ເປີດຂຶ້ນພ້ອມກັນໃນທົ່ວປະເທດນັບແຕ່ເວລາ 8 ໂມເຊົ້າ ແລະ ປິດຫີບລົງໃນເວລາ 7 ໂມງແລງຂອງວັນທີ 7 ກຸມພາ 2024; ການເລືອກຕັ້ງກ່ອນກຳນົດຄັ້ງນີ້ ມີຜູ້ໄປໃຊ້ສິດຫຼາຍກວ່າ 67% ຂອງຜູ້ມີສິດປ່ອນບັດທັງໝົດໃນທົ່ວປະເທດ, ໂດຍແມ່ນທ່ານ ອິລຮາມ ອາລີເຢັບ ຜູ້ສະໝັກຮັບເລືອກຕັ້ງຈາກພັກອາແຊກໄບຊານໃໝ່ ໄດ້ຮັບໄຊຊະນະຢ່າງຖ້ວມທົ້ນ ສູງເຖິງ 92% ເຮັດໃຫ້ທ່ານສືບຕໍ່ເປັນປະທານາທິບໍດີ ແຫ່ງ ສາທາລະ ນະລັດ ອາແຊກໄບຊານ ໄປອີກ 7 ປີ.
ຕໍ່ກັບການເລືອກຕັ້ງປະທານາທິບໍດີອາແຊກໄບຊານ ກ່ອນກຳນົດຄັ້ງນີ້, ເຈົ້າພາບໄດ້ເຊື່ອເຊີນຜູ້ສັງເກດການພາຍໃນ, ຜູ້ຕາງໜ້າຈາກອົງການຈັດຕັ້ງສາກົນ ແລະ ປະເທດຕ່າງໆເປັນຈໍານວນຫຼວງຫຼາຍ ເພື່ອເຂົ້າຮ່ວມສັງເກດການ; ຄະນະຜູ້ແທນສະພາແຫ່ງຊາດລາວ ກໍໄດ້ຮ່ວມກັບສະມາຊິກໄອປາ ແລະ ຄະນະຜູ້ສັງເກດການປະເທດອື່ນໆທີ່ໄປຕິດຕາມ ແລະ ສັງເກດການຢູ່ໜ່ວຍເລືອກຕັ້ງຕ່າງໆຈຳນວນ 6 ແຫ່ງ ທີ່ນະຄອນຫຼວງບາກູ, ເຫັນວ່າຄະນະກຳ ມະການເລືອກຕັ້ງຂັ້ນສູນກາງ ແລະ ຄະນະກຳມະການເລືອກຕັ້ງຂັ້ນຕ່າງໆ ໄດ້ມີການກະກຽມເຈົ້າໜ້າທີ່, ໜ່ວຍປ່ອນບັດ, ຫີບບັດ, ບັນຊີລາຍຊື່ຜູ້ສະໝັກ, ບັນຊີລາຍຊື່ຜູ້ມີສິດປ່ອນບັດ ລວມທັງສິ່ງອຳນວຍຄວາມສະດວກຕ່າງໆ ແລະ ຄວາມປອດໄພຮອບດ້ານ ໃຫ້ແກ່ການມາໃຊ້ສິດປ່ອນບັດເລືອກຕັ້ງຂອງປະຊາຊົນ ໂດຍກຳນົດເອົາໂຮງຮຽນ ແລະ ສະຖາບັນການສຶກສາຕ່າງໆໃນຂອບເຂດທົ່ວປະເທດ ເປັນໜ່ວຍປ່ອນບັດ ພ້ອມທັງປະກາດມື້ເລືອກຕັ້ງ ເປັນວັນພັກລັດຖະການອີກດ້ວຍ ເພື່ອອຳນວຍຄວາມສະດວກໃຫ້ແກ່ປະຊາຊົນໄດ້ໄປໃຊ້ສິດຂອງຕົນຢ່າງເຕັມສ່ວນ.
ໃນການເຂົ້າຮ່ວມສັງເກດການຄັ້ງນີ້, ທ່ານ ສັນຍາ ປຣະເສີດ ຫົວໜ້າຄະນະຜູ້ແທນຈາກສະພາແຫ່ງຊາດລາວ ກໍໄດ້ຖືກເຊີນໃຫ້ຖະແຫຼງຂ່າວ ແລະ ໃຫ້ສຳພາດຕໍ່ສື່ມວນຊົນຂອງອາແຊກໄບຊານຫຼາຍຄັ້ງ ໂດຍທ່ານໄດ້ຕີລາ ຄາ ແລະ ສະແດງຄວາມຊົມເຊີຍຕໍ່ການເລືອກຕັ້ງຄັ້ງນີ້ວ່າ “ປະຊາຊົນມີຄວາມຕື່ນຕົວມາໃຊ້ສິດປ່ອນບັດເລືອກຕັ້ງຢ່າງຫຼວງຫຼາຍ, ດຳເນີນໄປດ້ວຍຄວາມເປັນລະບຽບຮຽບຮອຍ, ຕາມຂະບວນການປະຊາທິປະໄຕ, ເປີດເຜີຍ, ໂປ່ງໃສ, ຍຸຕິທຳ ແລະ ເປັນໄປຕາມກົດໝາຍວ່າດ້ວຍການເລືອກຕັ້ງຂອງສາທາລະນະລັດ ແຫ່ງ ອາແຊກໄບຊານ”. ພ້ອມດຽວກັນນີ້, ຄະນະຜູ້ແທນສະພາແຫ່ງຊາດລາວ ຍັງໄດ້ຖືໂອກາດພົບປະເຮັດວຽກແບບບໍ່ເປັນທາງການກັບຄະ ນະຮັບຜິດຊອບຜູ້ສັງເກດການຈາກສະພາແຫ່ງຊາດອາແຊກໄບຊານ ເພື່ອປຶກສາຫາລືກ່ຽວກັບການຮ່ວມມືສອງຝ່າຍລະຫວ່າງສອງອົງການນິຕິບັນຍັດຂອງສອງປະເທດລາວ-ອາແຊກໄບຊານ ໂດຍສະເພາະແມ່ນການສະໜັບສະໜູນການເປັນປະທານໄອປາຂອງ ສປປລາວ ໃນປີນີ້.