(ສພຊ) ໃນລະຫວ່າງວັນທີ 6-10 ພະຈິກ 2023, ຄະນະຜູ້ແທນສະພາແຫ່ງຊາດລາວ ນຳໂດຍທ່ານ ປອ. ບຸນທັນ ບຸນວິໄລ ຮອງເລຂາທິການສະພາແຫ່ງຊາດ ໄດ້ສຳເລັດການເຂົ້າຮ່ວມທັດສະນະສຶກສາ ທີ່ສະພາແຫ່ງຊາດຝຣັ່ງ (Study Mission to France Parliament) ທີ່ປາຣີ, ປະເທດຝຣັ່ງ ໂດຍມີຜູ້ແທນທີ່ເປັນເຈົ້າໜ້າທີ່ອາວຸໂສຕາງໜ້າຈາກສະພາແຫ່ງຊາດ ແຫ່ງ ຣາຊະອານາຈັກກໍາປູເຈຍ, ສປປລາວ, ຣາຊະອານາຈັກໄທ ແລະ ກອງເລຂາສະມັດຊາລັດຖະສະພາລະຫວ່າງຊາດອາຊຽນ (AIPA) ລວມທັງໝົດ ຈໍານວນ 10 ທ່ານ ເຂົ້າຮ່ວມ.

ການທັດສະນະສຶກສາຄັ້ງນີ້ ຄະນະຜູ້ແທນໄດ້ພົບປະເຮັດວຽກ ຮັບຟັງການສະເໜີກ່ຽວກັບກົງຈັກການຈັດຕັ້ງ, ບົດບາດ ແລະ ການປະຕິບັດໜ້າທີ່ຂອງອົງການເສນາທິການຂອງກຳມາທິການປະຈຳ ແລະ ໜ່ວຍງານຕ່າງໆຂອງສະພາສູງ ແລະ ສະພາຕໍ່າຂອງຝຣັ່ງ ໂດຍໄດ້ມີການປຶກສາຫາລື, ແລກປ່ຽນບົດຮຽນ ແລະ ປະສົບການຕົວຈິງຈາກຜູ້ບໍລິຫານລະດັບສູງ ແລະ ພະນັກງານກ່ຽວຂ້ອງ ກ່ຽວກັບຍຸດທະສາດ ແລະ ການພັດທະນາການດຳເນີນງານດ້ານການບໍລິຫານລັດຖະສະພາໃຫ້ທັນສະໄໝ ແລະ ຕອບສະໜອງຄວາມຕ້ອງການຂອງວິວັດທະນາການຂອງລັດຖະສະພາໃນໄລຍະໃໝ່ຂອງສະພາແຫ່ງຊາດຝຣັ່ງ ລວມທັງການປັບປຸງທິດທາງການເຄື່ອນໄຫວໃນນາມເປັນຕົວແທນຂອງປະຊາຊົນ ເພື່ອຮັບມືກັບສິ່ງທ້າທາຍຕ່າງໆ ທີ່ເກີດຂຶ້ນທັງໃນລະດັບໂລກ ແລະ ພາຍໃນປະເທດຂອງຕົນຄືແນວໃດ ເປັນຕົ້ນແມ່ນການປັບປຸງກົນໄກ ແລະ ເພີ່ມທະວີການຕິດຕາມກວດກາ ແລະ ການປະເມີນຜົນ, ການພິຈາລະນາຮ່າງກົດໝາຍ, ການຄົ້ນຄວ້າໃຫ້ສັດຕະຍາບັນ ໃຫ້ວ່ອງໄວ ທັນສະໄໝ ໂດຍຫັນເປັນລັດຖະສະພາດີຈີຕອນ ພ້ອມທັງ ຍົກລະດັບຂີດຄວາມສາມາດຂອງພະນັກງານທຸກລະດັບ ແລະ ປັບປຸງກົນໄກການບໍລິຫານລັດຖະສະພາໃຫ້ສອດຄ່ອງກັບຄວາມຕ້ອງການໃນໄລຍະໃໝ່. ຄະນະຜູ້ແທນລາວ ກໍໄດ້ປະກອບສ່ວນຢ່າງຕັ້ງໜ້າໃນການປະກອບຄໍາຄິດຄໍາເຫັນ ແລະ ແລກປ່ຽນບົດຮຽນກ່ຽວກັບການຈັດຕັ້ງ ແລະ ການເຄື່ອນໄຫວປະຕິບັດໜ້າທີ່ຂອງສະພາແຫ່ງຊາດລາວ ໂດຍສະເພາະແມ່ນການເຄື່ອນໄຫວຂອງກໍາມາທິການ ແລະ ການບໍລິຫານຄຸ້ມຄອງດ້ານຕ່າງໆຂອງຄະນະເລຂາທິການສະພາແຫ່ງຊາດລາວ.

ພ້ອມກັນນີ້, ຄະນະຜູ້ແທນໄດ້ເຂົ້າຮ່ວມຕິດຕາມ, ສັງເກດການກ່ຽວກັບກົນໄກ ແລະ ຮູບການດຳເນີນກອງປະຊຸມບາງກຳມາທິການ; ການດຳເນີນກອງປະຊຸມສາມັນທັງຂອງສະພາສູງ ແລະ ສະພາຕໍ່າ; ພົບປະຢ້ຽມຢາມເລຂາທິການໃຫຍ່ທີ່ສະພາສູງຝຣັ່ງ ແລະ ຢ້ຽມຢາມສະຖານທີ່ມໍລະດົກໂລກທີ່ສໍາຄັນຫຼາຍແຫ່ງຂອງເມືອງ ສະຕາສບວກ.