(ສພຊ) ໃນວັນທີ 17 ຕຸລາ 2022, ທ່ານ ພອນສານ ວິໄລເມັ້ງ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ແຂວງສະຫວັນນະເຂດ, ຮອງປະທານຄະນະບໍລິຫານງານສູນກາງສະຫະພັນກໍາມະບານລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມປຶກສາຫາລື ຂອງສະມາຊິກລັດຖະສະພາໜຸ່ມສະມັດຊາລັດຖະສະພາລະຫວ່າງຊາດອາຊຽນ (AIPA) ໃນຮູບແບບທາງໄກ. ກອງປະຊຸມດັ່ງກ່າວ ໂດຍການເປັນເຈົ້າພາບຂອງສະພາແຫ່ງຊາດ ແຫ່ງຣາຊະອານາຈັກກຳປູເຈຍ ໂດຍມີຄະນະຜູ້ແທນຈາກສະພາແຫ່ງຊາດ ກຳປູເຈຍ, ອິນໂດເນເຊຍ, ລາວ, ໄທ, ຫວຽດນາມ, ບຣູໄນ, ຟີລິບປິນ ແລະ ເລຂາທິການໃຫຍ່ໄອປາ ເຂົ້າຮ່ວມ.

ກອງປະຊຸມຄັ້ງນີ້, ຄະນະຜູ້ແທນໄດ້ປຶກສາຫາລືຮ່ວມກັນກ່ຽວກັບຄວາມເປັນໄປໄດ້ໃນການຍົກລະດັບກອງປະຊຸມສະມາຊິກລັດຖະສະພາໜຸ່ມໄອປາ ໃຫ້ກາຍເປັນກຳມາທິການວຽກງານສະມາຊິກລັດຖະສະພາໜຸ່ມ ຂອງສະມັດຊາໃຫຍ່ໄອປາ ເຊິ່ງກອງປະຊຸມບໍ່ເປັນທາງການຂອງສະມາຊິກລັດຖະສະພາໜຸ່ມໄອປາ ໄດ້ຈັດຂຶ້ນຄັ້ງທຳອິດ ໃນໂອກາດຈັດກອງປະຊຸມ ສະມັດຊາລັດຖະສະພາອາຊຽນ (AIPA) ຄັ້ງທີ 41 ໃນປີ 2020.

ໃນໂອກາດເຂົ້າຮ່ວມກອງປະຊຸມ, ທ່ານ ພອນສານ ວິໄລເມັ້ງ ຜູ້ແທນສະພາແຫ່ງຊາດລາວ ໄດ້ມີຄໍາເຫັນຕໍ່ກອງປະຊຸມ ໂດຍໄດ້ຕີລາຄາສູງຕໍ່ກອງປະຊຸມສະມາຊິກລັດຖະສະພາໜຸ່ມໄອປາ ເຊິ່ງເປັນເວທີສຳຄັນ ສຳລັບສະມາຊິກລັດຖະສະພາໜຸ່ມຂອງໄອປາ ໃນການພົບປະ, ແລກປ່ຽນ ແລະ ປຶກສາຫາລືກັນ ກ່ຽວກັບການແກ້ໄຂບັນຫາຕ່າງໆໃນບັນດາປະເທດອາຊຽນ. ພ້ອມນີ້, ທ່ານຍັງເຊື່ອວ່າ ກອງປະຊຸມສະມາຊິກລັດຖະສະພາໜຸ່ມຂອງໄອປາ ຈະເປັນການສະໜັບສະໜູນ ແລະ ເສີມສ້າງນະໂຍບາຍ ໃນການສົ່ງເສີມການມີສ່ວນຮ່ວມຂອງຊາວໜຸ່ມ ໃນການຈັດຕັ້ງປະຕິບັດວຽກງານຕ່າງໆ ເພື່ອປະກອບສ່ວນເຂົ້າໃນການສ້າງປະຊາຄົມອາຊຽນ.

ກອງປະຊຸມຄັ້ງນີ້, ໄດ້ດຳເນີນໄປດ້ວຍບັນຍາກາດອັນດີ, ສະມາຊິກລັດຖະສະພາໜຸ່ມ ຈາກບັນດາປະເທດຕ່າງໆ ທີ່ເຂົ້າຮ່ວມກອງປະຊຸມ ໄດ້ມີການປະກອບຄຳຄິດຄຳເຫັນຢ່າງຟົດຟື້ນ ແລະ ໃຫ້ການສະໜັບສະໜູນການຈັດກອງປະຊຸມກຳມາທິການສະມາຊິກລັດຖະສະພາໜຸ່ມຂອງໄອປາ ເຊິ່ງຈະຈັດຂຶ້ນເປັນຄັ້ງທຳອິດ ໃນລະຫວ່າງກອງປະຊຸມສະມັດຊາໃຫຍ່ໄອປາ ຄັ້ງທີ 43, ທີ່ຣາຊະອານາຈັກກຳປູເຈຍ ຈະເປັນເຈົ້າພາບໃນເດືອນ ພະຈິກ 2022 ນີ້.