ຄະນະຜູ້ແທນສະພາແຫ່ງຊາດ ແຫ່ງ ສປປ ລາວ ນຳໂດຍ ທ່ານ ສັນຍາ ປຣະເສີດ, ກຳມະການຄະນະປະຈຳສະພາແຫ່ງຊາດ, ປະທານກຳມາທິການການຕ່າງປະເທດ ພ້ອມດ້ວຍຄະນະກຳມາທິການ, ຄະນະເລຂາທິການ, ສະຖາບັນຄົ້ນຄວ້ານິຕິກຳ ແລະ ຄະນະເລຂາທິການສະພາປະຊາຊົນແຂວງ ຈຳນວນໜຶ່ງ ໄດ້ເດີນທາງໄປຢ້ຽມຢາມ, ທັດສະນະສຶກສາ ແລະ ແລກປ່ຽນບົດຮຽນກ່ຽວກັບວຽກງານລັດຖະສະພາ ກັບລັດຖະສະພາ ຂອງສະຫະລັດອາເມລິກາ ຢູ່ທີ່ນະຄອນຫລວງວໍຊິງຕັນ ດີຊີ, ສະຫະລັດອາເມລິກາ, ໃນລະຫວ່າງວັນທີ 16-22 ກໍລະກົດ 2023 ຕາມການສະໜັບສະໜູນ ຂອງມູນນິທິອາຊີ.

ໃນການເຄື່ອນໄຫວເຮັດວຽກ ໃນຄັ້ງນີ້, ຄະນະຜູ້ແທນສະພາແຫ່ງຊາດລາວ ໄດ້ພົບປະເຮັດວຽກ ກັບທ່ານ ໂດໂນ ສ. ເບເຢີ, ສະມາຊິກສະພາຜູ້ແທນປະຊາຊົນ ຂອງສະຫະລັດອາເມລິກາ ຊື່ງສອງຝ່າຍ ໄດ້ປຶກສາຫາລືກ່ຽວກັບການຊຸກຍູ້ ແລະ ສົ່ງເສີມການພົວພັນຮ່ວມມື ລະຫວ່າງສອງປະເທດລາວ-ອາເມລິກາ ກໍ່ຄືລະຫວ່າງສອງອົງການນິຕິບັນຍັດ ພ້ອມທັງໄດ້ແລກປ່ຽນຄຳເຫັນ ກ່ຽວກັບທິດທາງການພົວພັນຮ່ວມມືໃນຕໍ່ໜ້າ. ທ່ານຫົວໜ້າຄະນະຜູ້ແທນສະພາແຫ່ງຊາດລາວ ໄດ້ສະເໜີໃຫ້ລັດຖະສະພາອາເມລິກາ ໂດຍຜ່ານທ່ານສະມາຊິກສະພາຜູ້ແທນປະຊາຊົນ ຊ່ວຍສະໜັບສະໜູນ, ເພີ່ມທະວີການຮ່ວມມື ແລະ ໃຫ້ການຊ່ວຍເຫລືອແກ່ສະພາແຫ່ງຊາດ ແລະ ສະພາປະຊາຊົນແຂວງ ໃນການສ້າງຄວາມເຂັ້ມແຂງດ້ານວິຊາການ ແລະ ການເປັນເຈົ້າພາບຈັດກອງປະຊຸມສະມັດຊາໃຫຍ່ລະຫວ່າງຊາດອາຊຽນ ຫລືໄອປາ ຄັ້ງທີ 45 ໃນປີ 2024 ຢູ່ນະຄອນຫລວງວຽງຈັນ, ສປປ ລາວ. ພ້ອມດຽວກັນນີ້, ຄະນະຜູ້ແທນສະພາແຫ່ງຊາດລາວ ຍັງໄດ້ພົບປະເຮັດວຽກ ກັບທ່ານ ນາງ ລີຊາ ປີເຕີຊັນ, ຮອງຜູ້ຊ່ວຍລັດຖະມົນຕີກະຊວງການຕ່າງປະເທດ ພ້ອມບັນດາທີ່ປຶກສາພິເສດ ຈາກກົມປະຊາທິປະໄຕ, ສິດທິມະນຸດ ແລະ ແຮງງານ ຂອງກະຊວງການຕ່າງປະເທດສະຫະລັດອາເມລິກາ. ໃນການພົບປະຄັ້ງນີ້, ສອງຝ່າຍ ໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນ ກ່ຽວກັບການປະຕິບັດພະລະບົດບາດ, ການ ເຄື່ອນໄຫວວຽກງານ, ການຄົ້ນຄ້ວາສ້າງກົດໝາຍ ແລະ ນະໂຍບາຍ ທີ່ກ່ຽວກັບສິດທິຂອງຄົນພິການ, ການຄົ້ນຄ້ວາຍົກລະດັບ ດຳລັດ ຂອງນາຍົກລັດຖະມົນຕີ ຂອງ ສປປ ລາວ ມາເປັນກົດໝາຍ ວ່າດ້ວຍສາດສະໜາ, ການຮ່ວມມືດ້ານການຊອກຫາສິ່ງເສດເຫລືອ ຂອງທະຫານອາເມລິກາ ທີ່ຫາຍສາບສູນໃນປາງສົງຄາມ ຢູ່ ສປປ ລາວ, ການຮ່ວມມືດ້ານການປາບປາມຢາເສບຕິດ, ການຮ່ວມມືກ່ຽວກັບການເກັບກູ້ລະເບີດຝັງດິນບໍ່ທັນແຕກ, ການຊ່ວຍເຫລືດ້ານການສົ່ງເສີມສິດ ທິຂອງຄົນພິການ ຂອງ ສປປ ລາວ ແລະ ບັນຫາອື່ນໆ.

ຄະນະຜູ້ແທນສະພາແຫ່ງຊາດລາວ ກໍ່ຍັງໄດ້ພົບປະ ແລະ ແລກປ່ຽນບົດຮຽນ ກ່ຽວກັບວຽກງານລັດຖະສະພາ ກັບບັນດາຊ່ຽວຊານອາວຸໂສ, ນັກກົດໝາຍ ແລະ ທີ່ປຶກສາດ້ານວິຊາການ ຂອງສະພາສູງ, ສະພາຜູ້ແທນແຫ່ງລັດ, ສະຖາບັນຄົ້ນຄວ້າວຽກງານລັດຖະບານ ຂອງມະຫາວິທະຍາໄລຊອດເຊີທາວ, ບັນດາຊ່ຽວຊານ ຈາກຫ້ອງສະມຸດກົດໝາຍ ແລະ ສະຖາບັນຄົ້ນຄ້ວານິຕິບັນຍັດ ຂອງລັດຖະສະພາອາເມລິກາ. ຄະນະຜູ້ແທນສະພາແຫ່ງຊາດລາວ ໄດ້ຮຽນຮູ້ ແລະ ເຂົ້າໃຈກ່ຽວກັບກົງຈັກການຈັດຕັ້ງ, ພາລະບົດບາດ, ສິດ ແລະ ໜ້າທີ່ ຂອງທັງສອງສະພາຂອງສະຫະລັດອາເມລິກາ (ສະ ພາຕໍ່າ ແລະ ສະພາສູງ). ໃນນີ້, ສະພາສູງ ມີອາຍຸການ 6 ປີ, ສະມາຊິກມີຈຳນວນ 100 ທ່ານ, ປະກອບມີ 16 ກຳມາທິການ ແລະ ອະນຸຄະນະກຳມາທິການ ຈຳນວນໜຶ່ງ. ສະພາຜູ້ແທນປະຊາຊົນ ມີການເລືອກຕັ້ງທຸກ 2 ປີ, ມີສະມາຊິກ 432 ທ່ານ, ປະກອບມີ 20 ກຳມາທິການ ແລະ ມີອານຸກຳມະທິການຈຳໜຶ່ງ; ລັດຖະສະພາອາເມລິກາ ໄດ້ສ້າງຕັ້ງສະຖາບັນຄົ້ນ ຄວ້າລັດຖະສະພາອາເມລິກາ ຊຶ່ງເປັນກົງຈັກໜຶ່ງໃນການຊ່ວຍສະມາຊິກລັດຖະສະພາຄົ້ນຄວ້າບັນດາກົດໝາຍຕ່າງໆທີ່ ຈະຜ່ານລັດຖະສະພາ. ພາຍຫລັງຜ່ານການຮັບຮອງກົດໝາຍ, ນິຕິກໍາລຸ່ມກົດໝາຍ ແລະ ການອອກນະໂຍບາຍຕ່າງໆ ບັນດາເອກະສານທາງການຈະອອກຜ່ານລະບົບດິຈິຕອນ, ການຄົ້ນຄວ້າວິທະຍາສາດຂອງສະຖາບັນຄົ້ນຄວ້າລັດຖະສະ ພາເປັນມືອາຊີບ ແລະ ຜົນຂອງການຄົ້ນຄ້ວາດ້ານວິທະຍາສາດ ສາມາດຕອບສະໜອງໄດ້ຕາມຄວາມຕ້ອງການໃນທຸກເວລາ ແລະ ປະຊາຊົນທົ່ວໄປ ສາມາດເຂົ້າເຖິງຂໍ້ມູນໄດ້. ຫ້ອງສະໝຸດກົດໝາຍ ແລະ ສະຖາບັນຄົ້ນຄ້ວາຂອງລັດຖະສະພາອາເມລິກາ ມີພະນັກງານປະມານ 600 ກ່ວາຄົນ ທີ່ມາຈາກຫຼາຍຂະແໜງວິຊາອາຊີບ ເພື່ອປະຕິບັດໜ້າທີໃນການສະໜອງຂໍ້ມູນ-ຂ່າວສານ ໃຫ້ແກ່ລັດຖະສະພາ ແລະ ສະມາຊິກສະພາລັດຖະສະພາອາເມລິກາ ຢ່າງມີປະສິດທິຜົນ.

ໃນວັນທີ 19 ກໍລະກົດ 2023, ຄະນະຜູ້ແທນໄດ້ໄປທັດສະນະສຶກສາ ແລະ ເຮັດວຽກຢູ່ລັດມາຣິແລນ ທີ່ຕັ້ງຢູ່ຫ່າງຈາກນະຄອນຫຼວງວໍຊິງຕັນດີຊີ ປະມານ 100 ກ່ວາກິໂລແມັດ, ໃນລັດນີ້ມີປະຊາກອນປະມານ 6 ລ້ານຄົນ, ລັດຖະສະພາຂອງລັດມາຣິແລນ ປະກອບມີສະພາສູງ ແລະ ສະພາຕໍ່າ ຊື່ງສະມາຊິກມີຈໍານວນ 188 ທ່ານ; ໃນນັ້ນ, ສະມາຊິກສະພາຕໍ່າມີ 141 ທ່ານ ແລະ ສະພາສູງມີ 47 ທ່ານ, ປະກອບມີ 6 ກໍາມາທິການໃນສະພາຕໍ່າ, ມີ 4 ກໍາມາທິການ ໃນສະພາສູງ ແລະ ສໍານັກງານຄະນະເລຂາທິການ. ໃນການພົບປະຄັ້ງນີ້, ສອງຝ່າຍ ໄດ້ແລກປ່ຽນຄວາມຄິດເຫັນ ກ່ຽວກັບການຈັດຕັ້ງປະຕິບັດພາລະບົດບາດ ຂອງລັດຖະສະພາທ້ອງຖິ່ນ, ຂະບວນການສ້າງກົດໝາຍ, ນິຕິກຳ, ນະໂຍບາຍຕ່າງໆ, ການຈັດສັນງົບປະມານຂອງທ່ອງຖິ່ນ, ພາລະບົດບາດ ໃນການເຂົ້າຮ່ວມໃນການປົກປັກຮັກສາສິ່ງແວດລ້ອມ, ການພົບປະກັບຜູ້ມີສິດເລືອກຕັ້ງ, ການສົ່ງເສີມ ແລະ ສ້າງເງື່ອນໄຂສະພາບແວດລ້ອມ ໃນການຮັບຟັງເອົາຄໍາຄິດເຫັນຂອງປະຊົນ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ.

ນອກຈາກນີ້, ຄະນະຜູ້ແທນສະພາແຫ່ງຊາດລາວ ຍັງໄດ້ໄປທັດສະນະສຶກສາ ແລະ ຢ້ຽມຢາມຕຶກອາຄານລັດ ຖະສະພາ (Capitol Hill), ຕຶກສະພາສູງ, ຕຶກລັດຖະສະພາລັດມາຣິແລນ, ໂຮງຮຽນທະຫານເຮືອ, ບັນດາຫໍພິພິຕະພັນຈໍານວນໜຶ່ງ ຊຶ່ງເປັນສະຖານທີ່ທ່ອງທ່ຽວອັນລືຊື່ ແລະ ຍອດນິຍົມ ຢູ່ນະຄອນຫຼວງວໍຊິງຕັນດີຊີ ແລະ ລັດມາຣິແລນ.

ໃນໂອກາດມາຢ້ຽມຢາມ, ທັດສະນະສຶກສາ ແລະ ແລກປ່ຽນບົດຮຽນ ໃນຄັ້ງນີ້, ຄະນະຜູ້ແທນສະພາແຫ່ງຊາດລາວ ຍັງໄດ້ພົບປະໂອລົ້ມກັບຄະນະນຳຂອງສະຖານເອກອັກຄະລັດຖະທູດ ແລະ ບັນດາພີ່ນ້ອງຄົນເຊື້ອຊາດລາວ ທີ່ດຳ ລົງຊີວິດ ແລະ ທຳມາຫາກິນ ຢູ່ສະຫະລັດອາເມລິກາ ແລະ ການາດາ. ຄະນະຜູ້ແທນ ໄດ້ຮັບການຕ້ອນຮັບຢ່າງອົບອຸ່ນ, ເປັນກັນເອງ ແລະ ອໍານວຍຄວາມສະດວກເປັນຢ່າງດີ ຈາກສະຖານເອກອັກຄະລັດຖະທູດ ແຫ່ງ ສປປ ລາວ, ມູນລະນິທິ ອາຊີ ປະຈໍາ ສະຫະລັດອາເມລິກາ ແລະ ສະຖານເອກອັກຄະລັດຖະທູດສະຫະລັດອາເມລິກາ ປະຈໍາ ສປປ ລາວ ອີກດ້ວຍ.