(ສພຊ) ຄະນະຜູ້ແທນສະພາແຫ່ງຊາດລາວ ນໍາໂດຍທ່ານ ທັນຕາ ກອງຜາລີ ຮອງປະທານກຳມາທິການແຜນການ, ການເງິນ ແລະ ການກວດສອບ ໄດ້ສໍາເລັດການເຂົ້າຮ່ວມກອງປະຊຸມປຶກສາຫາລືກ່ຽວກັບການຮ່າງແຜນຍຸດທະສາດຂອງສະມັດຊາລັດຖະສະພາລະຫວ່າງຊາດອາຊຽນ ຄັ້ງທີ 2 (The Second Workshop of ASEAN Inter-Parliamentary Assembly Strategic Planning) ໃນວັນທີ 28 ກຸມພາ 2023, ໃນຮູບແບບທາງໄກ ທີ່ຈາກາຕາ ປະເທດອິນໂດເນເຊຍ ເຊິ່ງມີຕົວແທນຈາກ 7 ປະເທດສະມາຊິກອາຊຽນເຂົ້າຮ່ວມຄື: ຣາຊະອານາຈັກກຳປູເຈຍ, ອິນໂດເນເຊຍ, ສປປລາວ, ມາເລເຊຍ, ຟີລິບປິນ, ຣາຊະອານາຈັກໄທ ແລະ ສສ.ຫວຽດນາມ.

ຈຸດປະສົງຂອງກອງປະຊຸມສຳມະນາຄັ້ງນີ້ ເພື່ອກວດກາ ແລະ ປັບປຸງຄືນຜົນຂອງກອງປະຊຸມ ຄັ້ງທີ 1 ໂດຍໄດ້ມີການປະກອບຄໍາຄິດຄໍາເຫັນ ແລະ ຂໍ້ສະເໜີຈາກຜູ້ເຂົ້າຮ່ວມກອງປະຊຸມຈາກບັນດາປະເທດສະມາຊິກລັດຖະສະພາໄອປາ ຕໍ່ຮ່າງວິໄສທັດໄອປາ, ຮ່າງແຜນດໍາເນີນງານ, ຮ່າງເປົ້າໝາຍຍຸດທະສາດ ແລະ ຮ່າງແຜນດຳເນີນງານໃຫ້ສົມບູນຂຶ້ນຕື່ມ ເຊິ່ງຄະນະຜູ້ແທນລາວ ກໍໄດ້ມີການຄົ້ນຄວ້າ ແລະ ແລກປ່ຽນປະກອບຄຳເຫັນຕໍ່ເອກະສານ ແລະ ເນື້ອໃນກອງປະຊຸມຢ່າງສ້າງສັນ ແລະ ກົງໄປກົງມາ.

ກອງປະຊຸມຄັ້ງນີ້, ໄດ້ປິດລົງດ້ວຍຜົນສໍາເລັດອັນຈົບງາມ ໂດຍຜູ້ແທນໄດ້ຕົກລົງເຫັນດີເປັນເອກະພາບຮ່ວມກັນໃນການຮັບຮອງເອົາຮ່າງວິໄສທັດໄອປາ, ຮ່າງແຜນດໍາເນີນງານ, ຮ່າງເປົ້າໝາຍຍຸດທະສາດ ແລະ ຮ່າງແຜນດຳເນີນງານ ເພື່ອນໍາສະເໜີເຂົ້າໄປພິຈາລະນາຮັບຮອງເອົາໃນກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ໃນເດືອນກັນຍາ 2023 ນີ້, ທີ່ປະເທດອິນໂດເນເຊຍ.