ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ລະຫວ່າງວັນທີ 20-24 ມີນາຜ່ານມາ, ຄະນະຜູ້ແທນສະພາແຫ່ງຊາດລາວ ນຳໂດຍທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ ພ້ອມດ້ວຍຄະນະ ໄດ້ສຳເລັດການເຂົ້າຮ່ວມກອງປະຊຸມໃຫຍ່ສະຫະພັນລັດຖະສະພາສາກົນ (IPU) ຄັ້ງທີ 144, ທີ່ ນູຊາ ດູອາ, ບາຫຼີ, ປະເທດອິນໂດເນເຊຍ ໂດຍການເປັນປະທານຂອງທ່ານ ດູອາເຕ ປາເຊໂກ (Duarte Pacheco) ປະທານສະຫະພັນລັດຖະສະພາສາກົນ (IPU); ມີສະມາຊິກສະພາແຫ່ງຊາດ ຈໍານວນ 1.000 ທ່ານ ທີ່ມາຈາກ 115 ປະເທດ ທົ່ວໂລກເຂົ້າຮ່ວມ. ນອກນີ້, ຍັງມີຄະນະຜູ້ແທນຈາກອົງການສະຫະປະຊາຊາດ ແລະ ຕົວແທນຈາກອົງການລັດຖະສະພາປະຈຳພາກພື້ນຕ່າງໆທົ່ວໂລກ ເຂົ້າຮ່ວມຢ່າງຫລວງຫລາຍ.
ກອງປະຊຸມຄັ້ງນີ້ ໄດ້ດຳເນີນພາຍໃຕ້ຫົວຂໍ້: “ເຂົ້າໃກ້ເປົ້າໝາຍທີ່ເປັນສູນ: ຊຸກຍູ້ໃຫ້ລັດຖະສະພາດຳເນີນງານກ່ຽວກັບການປ່ຽນແປງດິນຟ້າອາກາດ”. ພ້ອມນີ້, ກອງປະຊຸມໄດ້ມີການທົບທວນຄືນ ແລະ ປັບປຸງແນວທາງຂອງ ຂະບວນການສັນຕິພາບ ເພື່ອແນໃສ່ປະກອບສ່ວນເຂົ້າໃນການຊຸກຍູ້ສັນຕິພາບແບບຍືນຍົງ, ປຶກສາຫາລືກັນກ່ຽວກັບການນຳໃຊ້ເຕັກໂນໂລຊີຂໍ້ມູນຂ່າວສານ ແລະ ການສື່ສານ ເພື່ອເປັນການຂັບເຄື່ອນໃຫ້ແກ່ຂະແໜງການສຶກສາ ໂດຍສະເພາະແມ່ນໄລຍະການແຜ່ລະບາດຂອງພະຍາດໂຄວິດ-19. ນອກນັ້ນ, ໃນກອງປະຊຸມ ຍັງໄດ້ພິຈາລະນາບັນຫາຮີບດ່ວນທີ່ເປັນຄວາມກັງວົນຮ່ວມກັນໃນທົ່ວໂລກ ແລະ ຮັບຟັງການລາຍງານຈາກບັນດາກໍາມາທິການປະຈໍາຕ່າງໆຂອງ IPU.
ນອກຈາກການເຂົ້າຮ່ວມກອງປະຊຸມໃຫຍ່ແລ້ວ ຄະນະຜູ້ແທນລາວ ຍັງໄດ້ເຂົ້າຮ່ວມ ແລະ ປະກອບຄຳເຫັນໃນກອງປະຊຸມຕ່າງໆເຊັ່ນ: ກອງປະຊຸມສະພາບໍລິຫານງານ, ກອງປະຊຸມກຳມາທິການປະຈຳກ່ຽວກັບສັນຕິພາບ ແລະ ຄວາມໝັ້ນຄົງສາກົນ, ກອງປະຊຸມກຳມາທິການປະຈຳກ່ຽວກັບວຽກງານການພັດທະນາແບບຍືນຍົງ ແລະ ກອງປະຊຸມປິ່ນອ້ອມອື່ນໆຂອງ IPU.
ໃນກອງປະຊຸມໃຫຍ່ຄົບຄະນະ, ທ່ານ ສັນຍາ ປຣະເສີດ ໄດ້ກ່າວປາໄສໃນຫົວຂໍ້: “ເຂົ້າໃກ້ເປົ້າໝາຍທີ່ເປັນສູນ: ຊຸກຍູ້ໃຫ້ລັດຖະສະພາດຳເນີນງານກ່ຽວກັບການປ່ຽນແປງດິນຟ້າອາກາດ” ເຊິ່ງທ່ານໄດ້ຍົກໃຫ້ເຫັນເຖິງຜົນກະທົບອັນຮ້າຍແຮງຈາກການປ່ຽນແປງດິນຟ້າອາກາດ ທີ່ສົ່ງຜົນກະທົບໃນທົ່ວໂລກ ລວມທັງໃນ ສປປລາວ ເປັນຕົ້ນແມ່ນຜົນກະທົບທີ່ເກີດຈາກນ້ຳຖ້ວມ, ໄພແຫ້ງແລ້ງ, ຝົນບໍ່ມາຕາມລະດູການ, ອາກາດຮ້ອນຂຶ້ນ ແລະ ອື່ນໆ ເຊິ່ງໄດ້ສົ່ງຜົນກະທົບຢ່າງໃຫຍ່ຫລວງຕໍ່ສິ່ງແວດລ້ອມ, ລະບົບນິເວດ, ລະບົບເສດຖະກິດ ແລະ ຊີວິດການເປັນຢູ່ຂອງປະຊາຊົນລາວບັນດາເຜົ່າ. ພ້ອມດຽວກັນນີ້, ທ່ານຍັງໄດ້ຍົກໃຫ້ເຫັນເຖິງຄວາມພະຍາຍາມຂອງ ສປປລາວ ກໍຄືສະພາແຫ່ງຊາດລາວ ໃນການຮັບມືກັບບັນຫາດັ່ງກ່າວ ໂດຍການຮັບຮອງເອົາແນວທາງນະໂຍບາຍ, ກົດໝາຍທີ່ກ່ຽວຂ້ອງ, ຍຸດທະສາດການເຕີບໂຕສີຂຽວແຫ່ງຊາດ ແລະ ລະບຽບການໃນການຈັດຕັ້ງປະຕິບັດວຽກງານ ການຕ້ານການປ່ຽນແປງຂອງດິນຟ້າອາກາດ, ພ້ອມທັງການໃຫ້ສັດຕະຍາບັນແກ່ສົນທິສັນຍາ, ສັນຍາສາກົນຕ່າງໆ ແລະ ໄດ້ມີການຊຸກຍູ້ຕິດຕາມກວດກາການຄຸ້ມຄອງສິ່ງແວດລ້ອມ, ເອົາໃຈໃສ່ຄຸ້ມຄອງການນໍາໃຊ້ຊັບພະຍາກອນປ່າໄມ້ໃຫ້ຍືນຍົງ, ສົ່ງເສີມການຄົ້ນຄວ້ານຳໃຊ້ພະລັງງານທົດແທນ, ການສ້າງຈິດສຳນຶກໃຫ້ແກ່ປະຊາຊົນ ເພື່ອເປັນການປະກອບສ່ວນໂດຍກົງໃນການຫລຸດຜ່ອນສະພາບການປ່ຽນແປງດິນຟ້າອາກາດ ແລະ ວາງເປົ້າໝາຍໃຫ້ເປັນສູນໃນປີ 2022.
ກອງປະຊຸມຄັ້ງນີ້ ໄດ້ດໍາເນີນໄປດ້ວຍຜົນສຳເລັດ ຕາມຈຸດປະສົງລະດັບຄາດໝາຍ ໂດຍໄດ້ມີການຮັບຮອງເອົາມະຕິໃນຂົງເຂດວຽກງານຕ່າງໆຮ່ວມກັນ ຈຳນວນ 3 ສະບັບ ແລະ ຮັບຮອງເອົາຖະແຫລງການ ນູສາ ດູອາ ເຊິ່ງຄະນະຜູ້ແທນຂອງສະພາແຫ່ງຊາດລາວ ກໍໄດ້ໃຊ້ສິດຢ່າງເຕັມສ່ວນໃນການປະກອບຄຳເຫັນ ແລະ ລົງຄະແນນສຽງໃນວາລະຕ່າງໆຂອງກອງປະຊຸມ.
ກອງປະຊຸມໃຫຍ່ IPU ຄັ້ງທີ 145 ຈະຈັດຂຶ້ນຢູ່ ກິກາລີ ປະເທດລາວັນດາ, ໃນເດືອນຕຸລາ 2022.