(ສພຊ) ໃນຕອນເຊົ້າວັນທີ 8 ພະຈິກ 2023, ຄະນະຜູ້ແທນຂອງ ສະພາແຫ່ງຊາດລາວ ນໍາໂດຍທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ ໄດ້ຈັດກອງປະຊຸມປຶກສາຫາລືແບບທາງໄກ ຮ່ວມກັບຄະນະຜູ້ແທນສະພາແຫ່ງຊາດກຳປູເຈຍ ນຳໂດຍທ່ານ ສຸ ຍາຣາ ປະທານກຳມາທິການການຕ່າງປະເທດ, ການຮ່ວມມືສາກົນ, ໂຄສະນາ ແລະ ຂ່າວສານ ແລະ ຄະນະຜູ້ແທນສະພາແຫ່ງຊາດ ສສ.ຫວຽດນາມ ນຳໂດຍທ່ານ ວູ ຮາຍຮ່າ ປະທານກຳມາທິການການຕ່າງປະເທດ ໂດຍມີສະມາຊິກສະພາແຫ່ງຊາດຂອງ 3 ປະເທດ ພ້ອມດ້ວຍພະນັກງານ-ວິຊາການ ຈາກກຳມາທິການທີ່ກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້, ໄດ້ລົງເລິກປຶກສາຫາລືກັນກ່ຽວກັບວາລະການດຳເນີນກອງປະຊຸມສຸດຍອດລັດຖະສະພາ ກຳປູເຈຍ-ລາວ-ຫວຽດນາມ (CLV) ຄັ້ງທີ 1 ທີ່ຈະໄດ້ຈັດຂຶ້ນໃນລະຫວ່າງວັນທີ 4-7 ທັນວາ 2023, ໂດຍໄດ້ລົງເລິກລາຍລະອຽດແຕ່ລະການເຄື່ອນໄຫວຂອງຄະນະຜູ້ແທນ ໃນການເຂົ້າຮ່ວມກອງປະຊຸມ ເພື່ອໃຫ້ມີຄວາມເປັນເອກະພາບ ແລະ ຮັບປະກັນຜົນສຳເລັດຂອງກອງປະຊຸມດັ່ງກ່າວ. ພ້ອມດຽວກັນນີ້, ກອງປະຊຸມຍັງໄດ້ປຶກສາຫາລື ກ່ຽວກັບການກະກຽມຈັດງານຂີ່ລົດຖີບສາມັກຄີ ແລະ ລາຍການແຂ່ງຂັນລົດຖີບ ກຳປູເຈຍ-ລາວ-ຫວຽດນາມ ເຊິ່ງຈະເປັນຂະບວນການໜຶ່ງ ທີ່ຈະຈັດຂຶ້ນເນື່ອງໃນໂອກາດທີ່ ສະພາແຫ່ງຊາດລາວ ເປັນເຈົ້າພາບກອງປະຊຸມສຸດຍອດລັດຖະສະພາ ກຳປູເຈຍ-ລາວ-ຫວຽດນາມ (CLV) ຄັ້ງທີ 1.
(ພາບ ແລະ ຂ່າວ: ນາງ ປາກາລັກ ພົມມີໄຊ)