……………………………………………………………………….
(ສພຊ) – ໃນວັນທີ 28 ພຶດສະພາ 2024 ຄະນະຜູ້ແທນສະພາແຫ່ງຊາດ ນໍາໂດຍທ່ານ ອໍາໄພ ຈິດມະນົນ ຮອງປະທານກຳມາທິການກົດໝາຍ ແລະ ທ່ານ ຈັນທະວົງ ແສນອາມາດມົນຕີ ຮອງປະ ທານກຳມາທິການການຕ່າງປະເທດ ພ້ອມດ້ວຍກອງເລຂາໄອປາແຫ່ງຊາດລາວ ໄດ້ຈັດກອງປະຊຸມແບບທາງໄກຮ່ວມກັບທ່ານ ນາງ ຊິຕິ ໂລໄຊເມຣີຢັນຕີ ດາໂຕ ຫາຈິ ອັບດຸ ຣາມັນ ເລຂາທິການໃຫຍ່ໄອປາ ພ້ອມດ້ວຍກອງເລຂາໄອປາ ເພື່ອປຶກສາຫາລືກັນກ່ຽວກັບການກະກຽມຈັດກອງປະຊຸມສະພາທີ່ປຶກສາໄອປາ ກ່ຽວກັບໄພອັນຕະລາຍຂອງຢາເສບຕິດ (AIPACODD) ຄັ້ງທີ 7 ເຊິ່ງຈະຈັດຂຶ້ນໃນລະ ຫວ່າງວັນທີ 06-09 ສິງຫາ 2024 ທີ່ແຂວງຫຼວງພະບາງ.
ໃນກອງປະຊຸມ, ທ່ານເລຂາທິການໃຫຍ່ໄອປາ ໄດ້ນຳສະເໜີກ່ຽວກັບຮູບແບບ ແລະ ກົນໄກການຈັດກອງປະຊຸມ AIPACODD ຫຼັງຈາກນັ້ນ, ຄະນະຜູ້ແທນໄດ້ປຶກສາຫາລືກັນກ່ຽວກັບຂອບແນວຄວາມຄິດ (Concept Note) ຂອງກອງປະຊຸມ AIPACODD ຄັ້ງທີ 7 ພາຍໃຕ້ຫົວຂໍ້: “ການເພີ່ມທະວີບົດບາດຂອງລັດຖະສະພາ ໃນການຮ່ວມມືເພື່ອແກ້ໄຂບັນຫາຢາເສບຕິດ ເຮັດໃຫ້ອາຊຽນປອດຢາເສບຕິດຢ່າງເປັນຮູບປະທຳ” ພ້ອມດຽວກັນນັ້ນ, ກໍໄດ້ປຶກສາຫາລື ແລະ ເປັນເອກະພາບກັນກ່ຽວກັບວາລະການດຳເນີນກອງປະຊຸມ ແລະ ບັນຫາອື່ນໆກ່ຽວກັບການກະກຽມກອງປະຊຸມ AIPACODD ຄັ້ງທີ 7.
(ຂ່າວ: ກົມພົວພັນລັດຖະສະພາຫຼາຍຝ່າຍ, ກຳມາທິການການຕ່າງປະເທດ; ພາບ: ນາງ ສຸພາວັນ ຫອມສະນິດ)