(ສພຊ) ຄະນະຜູ້ແທນສະພາແຫ່ງຊາດລາວ ນໍາໂດຍທ່ານ ທັນຕາ ກອງຜາລີ ຮອງປະທານກຳມາທິການແຜນການ, ການເງິນ ແລະ ການກວດສອບ ໄດ້ສໍາເລັດການເຂົ້າຮ່ວມກອງປະຊຸມສຳມະນາ ກ່ຽວກັບການຮ່າງແຜນຍຸດທະສາດ ຂອງສະມັດຊາ ລັດຖະສະພາ ລະຫວ່າງຊາດອາຊຽນ (AIPA). ກອງປະຊຸມດັ່ງກ່າວ ໄດ້ຈັດຂຶ້ນໃນລະຫວ່າງວັນທີ 24-25 ມັງກອນ 2023, ທີ່ຈາກາຕ້າ ປະເທດອິນໂດເນເຊຍ ເຊິ່ງມີຕົວແທນຈາກ 6 ປະເທດສະມາຊິກອາຊຽນເຂົ້າຮ່ວມຄື: ຣາຊະອານາຈັກກຳປູເຈຍ, ອິນໂດເນເຊຍ, ສປປລາວ, ມາເລເຊຍ, ຟີລິບປິນ ແລະ ຣາຊະອານາຈັກໄທ.
ຈຸດປະສົງຂອງກອງປະຊຸມດັ່ງກ່າວ ເພື່ອຜັນຂະຫຍາຍມະຕິວ່າດ້ວຍການພັດທະນາແຜນຍຸດທະສາດໄອປາ 2023-2025 ທີ່ໄດ້ຖືກຮັບຮອງເອົາໃນກອງປະຊຸມສະມັດຊາໃຫຍ່ໄອປາ ຄັ້ງທີ 43 ທີ່ຈັດຂຶ້ນຢູ່ ຣາຊະອານາຈັກກໍາປູເຈຍ ໃນເດືອນພະຈິກ 2022 ຜ່ານມາ ເຊິ່ງໄດ້ຮັບທຶນສະໜັບສະໜູນຈາກກອງທຶນການາດາ ເພື່ອການລິເລີ່ມໃນບັນດາປະເທດອາຊຽນ. ກອງປະຊຸມຄັ້ງນີ້, ໄດ້ສຸມໃສ່ຄົ້ນຄວ້າ, ປຶກສາຫາລື ແລະ ແລກປ່ຽນຄຳຄິດຄຳເຫັນ ຕໍ່ຮ່າງເອກະສານສຳຄັນທີ່ເປັນລັກສະນະຍຸດທະສາດຂອງ AIPA ເຊັ່ນ: ຮ່າງວິໄສທັດ 2023-2025, ຮ່າງແຜນດໍາເນີນງານ, ຮ່າງຈຸດປະສົງທີ່ມີລັກສະນະຍຸດທະສາດຂອງໄອປາ 2023-2025, ກໍານົດຕົວຊີ້ວັດການຈັດຕັ້ງປະຕິບັດ ແລະ ຮ່າງແຜນງານ, ໂຄງການ, ກິດຈະກຳ, ເປົ້າໝາຍຜົນໄດ້ຮັບທີ່ເປັນລັກສະນະຍຸດທະສາດຂອງໄອປາ ເຊິ່ງຄະນະຜູ້ແທນລາວ ກໍໄດ້ປະກອບສ່ວນລົງເລິກເຂົ້າໃນການຄົ້ນຄວ້າ 2 ກຸ່ມຍ່ອຍຄື: ກຸ່ມຍ່ອຍໃນການກຳນົດວິໄສທັດ ແລະ ກຸ່ມຍ່ອຍໃນການກຳນົດຕົວຊີ້ວັດເປົ້າໝາຍຍຸດທະສາດ.
ຜົນຂອງກອງປະຊຸມປຶກສາຫາລືກັນຄັ້ງນີ້ ຈະໄດ້ສືບຕໍ່ນຳໄປຄົ້ນຄວ້າຮ່ວມກັນຕື່ມໃນທ້າຍເດືອນກຸມພາ 2023 ນີ້ ກ່ອນນໍາເຂົ້າພິຈາລະນາຮັບຮອງເອົາໃນກອງປະຊຸມສະມັດຊາໃຫຍ່ ລັດຖະສະພາລະຫວ່າງຊາດອາຊຽນ ໃນເດືອນສິງຫາ 2023 ນີ້ ທີ່ປະເທດອິນໂດເນເຊຍ.
