ວັນທີ 27 ພຶດສະພາ, ຮອງປະທານສະພາຜູ້ແທນປະຊາຊົນທົ່ວປະເທດຈີນ ແລະ ຄະນະ ໄດ້ເຂົ້າຢ້ຽມຂໍ່ານັບສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປລາວ ທີ່ຫ້ອງວ່າການສູນກາງພັກ ແລະ ສະຫາຍ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ທີ່ຫໍສະພາແຫ່ງຊາດ ດ້ວຍບັນຍາກາດໄມຕີຈິດມິດຕະພາບອັນອົບອຸ່ນຖານສະຫາຍອ້າຍນ້ອງ ເຊິ່ງຄະນະຜູ້ແທນກໍໄດ້ຮັບຊາບຕື່ມກ່ຽວກັບສະພາບການຕ່າງໆຂອງ ສປປລາວ ແລະ ຕີລາຄາສູງຕໍ່ການຢ້ຽມຢາມ ເຊິ່ງເປັນການເສີມຂະຫຍາຍສາຍພົວພັນຮ່ວມມື ລາວ-ຈີນ ໂດຍສະເພາະແມ່ນການພົວພັນລະຫວ່າງສອງອົງການນິຕິບັນຍັດຂອງສອງປະເທດ ໃຫ້ສືບຕໍ່ຂະຫຍາຍຕົວ, ປະກອບ ສ່ວນເຂົ້າໃນການຈັດຕັ້ງຜັນຂະຫຍາຍແຜນການຮ່ວມມື ລາວ-ຈີນ ໃຫ້ໄດ້ຮັບການຈັດຕັ້ງປະຕິບັດເຂົ້າສູ່ລວງເລິກກວ່າເກົ່າ ຕາມພາລະບົດບາດຂອງສອງອົງການນິຕິບັນຍັດ, ພິເສດ ການຊຸກຍູ້ຕິດຕາມກວດກາຄວາມຄືບໜ້າຂອງບັນດາໂຄງການຮ່ວມມືຕ່າງໆທີ່ສອງລັດຖະບານໄດ້ຕົກລົງຮ່ວມກັນແລ້ວນັ້ນ ໃຫ້ໄດ້ຮັບການຈັດຕັ້ງປະຕິບັດດ້ວຍປະສິດທິຜົນ.

ຕອນເຊົ້າຂອງວັນດຽວກັນ, ສະຫາຍ ສູຍເຄີລາຍທີ ຈາເຄີເອີ ແລະ ຄະນະ ໄດ້ພົບປະສອງຝ່າຍກັບສະຫາຍ ສົມມາດ ພົລເສນາ ຮອງປະທານສະພາແຫ່ງຊາດ ແລະ ຄະນະ ເຊິ່ງສອງຝ່າຍໄດ້ຕີລາຄາຄືນການພົວພັນຮ່ວມມືລະ ຫວ່າງສະພາແຫ່ງຊາດລາວ ແລະ ສະພາຜູ້ແທນປະຊາຊົນທົ່ວປະເທດຈີນ ໃນໄລຍະຜ່ານມາ ແລະ ປຶກສາຫາລືການພົວພັນຮ່ວມມືກັນໃນຕໍ່ໜ້າ; ພ້ອມດຽວກັນນີ້, ສອງຝ່າຍໄດ້ແລກປ່ຽນບົດຮຽນ ແລະ ປະສົບການໃນການປະຕິບັດໜ້າທີ່ ແລະ ພາລະບົດບາດຂອງອົງການນິຕິບັດຍັດ, ບົດຮຽນກ່ຽວກັບການແກ້ໄຂສະພາບຄວາມຫຍຸ້ງຍາກຂອງເສດຖະກິດການເງິນ, ບົດຮຽນກ່ຽວກັບກົງຈັກ-ການຈັດຕັ້ງ ແລະ ການເຄື່ອນໄຫວວຽກງານຂອງສະພາຜູ້ແທນປະ ຊາຊົນທົ່ວປະເທດຈີນ ແລະ ບົດຮຽນການເຄື່ອນໄຫວໃນເວທີລັດຖະສະພາພາກພື້ນ ແລະ ສາກົນ.

ໃນໄລຍະມາຢ້ຽມຢາມ ແລະ ເຮັດວຽກ ຢູ່ ສປປລາວ ຄັ້ງນີ້, ຄະນະຜູ້ແທນສະພາຜູ້ແທນປະຊາຊົນທົ່ວປະ ເທດຈີນ ຍັງໄດ້ໄປຢ້ຽມຢາມ ແລະ ເຮັດວຽກທີ່ແຂວງຫຼວງພະບາງ ເຊິ່ງໄດ້ພົບປະກັບສະຫາຍ ຄຳຂັນ ຈັນທະວີສຸກ ເຈົ້າແຂວງໆຫຼວງພະບາງ, ຢ້ຽມຢາມບັນດາໂຄງການລົງທຶນ ແລະ ຊ່ວຍເຫຼືອ ຂອງ ສປຈີນ ຢູ່ ສປປລາວ ເຊັ່ນ: ເຂື່ອນໄຟຟ້ານ້ຳອູ 1, ສະຖາບັນຂົງຈື້ ຢູ່ມະຫາວິທະຍາໄລສຸພານຸວົງ, ເຂດພັດທະນາກວມລວມໄຊເສດຖາ, ບໍລິສັດ ທາງລົດໄຟລາວ-ຈີນ ແລະ ຢ້ຽມຢາມຫໍພິພິດທະພັນຫຼວງພະບາງ, ຫໍພິພິທະພັນປະທານ ໄກສອນ ພົມວິຫານ, ພິພິທະພັນວັດສີສະເກດ, ບໍລິສັດ EDLT ແລະ ພື້ນຖານວັດທະນະທຳຈຳນວນໜຶ່ງຢູ່ແຂວງຫຼວງພະບາງ ແລະ ນະ ຄອນຫຼວງວຽງຈັນ.

(ຂ່າວ-ພາບ: ອານຸສອນ ພູມມີທອນ)