(ສພຊ) ໃນວັນທີ 30 ພະຈິກ 2023, ທ່ານ ນາງ ທຸມມາລີ ວົງພະຈັນ ປະທານກໍາມາທິການວັດທະນະທໍາ-ສັງຄົມ, ປະທານສະມາຊິກສະພາແຫ່ງຊາດເພດຍິງ ທັງເປັນປະທານສະມາຊິກລັດຖະສະພາເພດຍິງ ຂອງ ສະມັດຊາລັດຖະສະພາລະຫວ່າງຊາດອາຊຽນ (WAIPA) ແລະ ທ່ານ ນາງ ວັນດີ ບຸດທະສະວົງ ຮອງປະທານກໍາມາທິການການຕ່າງປະເທດ, ຮອງປະທານສະມາຊິກສະພາແຫ່ງຊາດເພດຍິງ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມປຶກສາຫາລືກັບ ເລຂາທິການໃຫຍ່ໄອປາ ຜ່ານປະຊຸມແບບທາງໄກ.

ກອງປະຊຸມຄັ້ງນີ້ ໄດ້ດໍາເນີນໂດຍການເປັນປະທານຂອງທ່ານ ນາງ ສິຕິ ໂຣໄຊເມຣິຢັນຕີ ດາໂຕະ ຮາຈິ ອັບດຸນ ຣາມານ ເລຂາທິການໃຫຍ່ໄອປາ ເຊິ່ງໄດ້ລົງເລິກປຶກສາຫາລື ກ່ຽວກັບການຈັດຕັ້ງບັນດາກິດຈະກໍາຕ່າງໆ ໂດຍສະເພາະແມ່ນການຈັດກອງປະຊຸມສຳມະນາ ຄັ້ງທີ 2 ເພື່ຶອຮັບຮອງແຜນປະຕິບັດງານວ່າດ້ວຍການມີສ່ວນຮ່ວມໃນການເມືອງຂອງແມ່ຍິງໃນອາຊຽນ ຢູ່ທີ່ນະຄອນຫຼວງວຽງຈັນ ລະຫວ່າງວັນທີ 4-8 ກຸມພາ 2024 ເຊິ່ງໃນລະຫວ່າງການດໍາເນີນກອງປະຊຸມສໍາມະນານີ້ ແມ່ນຈະໄດ້ຖືໂອກາດເລືອກເອົາ ວັນທີ 6 ກຸມພາ 2023 ຈັດກອງປະຊຸມຄະນະກໍາມາທິການປະສານງານໄວປາ. ທັງໝົດເຫຼົ່ານີ້ ແມ່ນເພື່ອເປັນການກະກຽມໃຫ້ແກ່ການເປັນເຈົ້າພາບຈັດກອງປະຊຸມສະມາຊິກລັດຖະສະພາເພດຍິງ (WAIPA) ທີ່ຈະຈັດຂຶ້ນໃນລະຫວ່າງກອງປະຊຸມ (AIPA) ຄັ້ງທີ 45 ທີ່ ສປປລາວ ຈະເປັນເຈົ້າພາບໃນເດືອນຕຸລາ ປີ 2024 ທີ່ຈະມາເຖິງ.