ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນຕອນບ່າຍຂອງວັນທີ 14 ກັນຍາ 2022, ສົມເດັດ ອັກຄະມະຫາ ໂປເຢຍ ຈັກກຣີ ເຮັງ ຊໍາຣິນ ປະທານສະພາແຫ່ງຊາດກຳປູເຈຍ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປລາວ ແລະ ພົບປະກັບພະນະທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປລາວ.
ໃນການພົບປະດັ່ງກ່າວ ການນໍາຂັ້ນສູງທັງສອງຝ່າຍ ໄດ້ຕີລາຄາການພົວພັນຮ່ວມມືທີ່ມີມູນເຊື້ອອັນດີງາມ ຖານບ້ານໃກ້ເຮືອນຄຽງ, ບ້ານແກ່ວເມືອງດອງ ແລະ ຄວາມສາມັກຄີຮັກແພງ ຂອງສອງປະເທດ ແລະ ປະຊາຊົນສອງຊາດລາວ-ກຳປູເຈຍ. ພ້ອມດຽວກັນນີ້, ການນຳ ຂອງ ສປປລາວ ກໍຕາງໜ້າໃຫ້ແກ່ລັດຖະບານ, ສະພາແຫ່ງຊາດ ແລະ ປະຊາຊົນລາວບັນດາເຜົ່າ ສະແດງຄວາມຂອບໃຈຢ່າງຈິງໃຈ ຕໍ່ການສະໜັບສະໜູນ ແລະ ຊ່ວຍເຫຼືອຮ່ວມມື ຂອງລັດຖະບານ, ສະພາແຫ່ງຊາດ ແລະ ປະຊາຊົນ ແຫ່ງ ຣາຊະອານາຈັກກຳປູເຈຍ ທີ່ມີຕໍ່ ສປປລາວ ທັງໃນພາລະກິດປົດປ່ອຍປະເທດຊາດ ກໍຄືໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ໃນປັດຈຸບັນ.
ໃນຕອນຄໍ່າຂອງວັນດຽວກັນນັ້ນ, ພະນະທ່ານປະທານສະພາແຫ່ງຊາດລາວ ກໍໄດ້ເປັນເຈົ້າພາບຈັດງານລ້ຽງຕ້ອນຮັບຢ່າງເປັນທາງການ ເພື່ອເປັນກຽດແກ່ ສົມເດັດ ອັກຄະມະຫາ ໂປເຢຍ ຈັກກຣີ ເຮັງຊໍາຣິນ, ປະທານສະພາແຫ່ງຊາດກຳປູເຈຍ ແລະ ຄະນະຜູ້ແທນຂັ້ນສູງ ເຊິ່ງດຳເນີນໄປດ້ວຍບັນຍາກາດໄມຕີຈິດມິດຕະພາບ, ອົບອຸ່ນ ແລະ ຄວາມສາມັກຄີຮັກແພງ ສະໜິດສະໜົມແຕ່ຕົ້ນຕະຫຼອດປາຍ.