(ສພຊ) ສະຫາຍ ສົມມາດ ພົລເສນາ ຮອງປະທານສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ໄດ້ອອກຕ້ອນຮັບ ສະຫາຍ ເວືອງ ດິງ ເຫວະ ກຳມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດ ແຫ່ງ ສສ.ຫວຽດນາມ ໄດ້ເດີນທາງມາເຖິງສະໜາມບິນສາກົນວັດໄຕໃນຕອນເຊົ້າຂອງມື້ນີ້.
ໂດຍຕອບສະໜອງຕາມຄຳເຊີນຂອງສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກປະຊາຊົນ ປະຕິວັດລາວ ປະທານສະພາແຫ່ງຊາດ ແຫ່ງ ສປປລາວ, ສະຫາຍ ເວືອງ ດິງ ເຫວະ ກຳມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດ ແຫ່ງ ສສ.ຫວຽດນາມ ໄດ້ເດີນທາງມາເຖິງສະໜາມບິນສາກົນວັດໄຕ ໃນຕອນເຊົ້າຂອງວັນທີ 15 ພຶດສະພາ 2022 ນີ້ ດ້ວຍເຮືອບີນພິເສດຂອງ ສສ.ຫວຽດນາມ.

ອອກຕ້ອນຮັບຄະນະ ຝ່າຍລາວ ນຳໂດຍສະຫາຍ ສົມມາດ ພົລເສນາ ຮອງປະທານສະພາແຫ່ງຊາດລາວ ພ້ອມດ້ວຍຄະນະ, ຝ່າຍຫວຽດນາມ ນຳໂດຍສະຫາຍ ເອກອັກຄະລັດຖະທູດ ແຫ່ງ ສສ.ຫວຽດນາມ ປະຈຳລາວ.
ຫລັງຈາກນັ້ນ, ຄະນະຜູ້ແທນ ຈະໄດ້ເຂົ້າຮ່ວມພິທີວາງສີລາລືກ ໂຄງການກໍ່ສ້າງສວນສາທາລະນະ ມິດຕະພາບ ລາວ-ຫວຽດນາມ ທີ່ບ້ານດົງໝາກຄາຍ ເມືອງໄຊທານີ ນະຄອນຫລວງວຽງຈັນ ແລະ ຄະນະ ຍັງຈະໄດ້ໄປຢ້ຽມຢາມການນຳພັກ-ລັດຕື່ມອີກ.