(ສພຊ) ໃນລະຫວ່າງວັນທີ 4-9 ກໍລະກົດ 2023 ສະຫາຍ ສົມມາດ ພົລເສນາ ກໍາມະການສູນກາງພັກ, ຮອງປະທານສະພາແຫ່ງຊາດ, ປະທານຄະນະມິດຕະພາບລັດຖະສະພາລາວ-ຈີນ ພ້ອມດ້ວຍຄະນະ ໄດ້ເດີນທາງໄປເຂົ້າຮ່ວມງານສັບປະດາອາຊຽນ-ຈີນ ປະຈໍາປີ 2023 (ASEAN-china Week 2023) ທີ່ນະຄອນຟູໂຈ ແຂວງຟູຈ້ຽນ ສປ ຈີນເພື່ອເປັນການປະກອບສ່ວນໃນການຊຸກຍູ້ການພົວພັນລະຫ່ວາງອາຊຽນ ແລະ ຈີນ ໃຫ້ມີການເຕີບໃຫ່ຍຂະຫຍາຍຕົວຢ່າງບໍ່ຢຸດຢັ້ງ ແລະ ເປັນການເສີມຂະຫຍາຍສາຍພົວພັນມິດຕະພາບລະຫ່ວາງລາວ-ຈີນ ໃຫ້ໝັ້ນຄົງຍາວນານ ທັງເປັນໂອກາດໃນການປຶກສາຫາລືຂອດການຄ້າການລົງທຶນລະຫ່ວາງຈີນ ແລະ ອາຊຽນ, ເປັນການເຜີຍແຜ່ນະໂຍບາຍທາງດ້ານການຄ້າ, ການລົງທຶນຂອງ ສປປ ລາວ ເພື່ອດຶງດູດນັກລົງທຶນຈາກ ສປ ຈີນ ໃຫ້ເຂົ້າມາລົງທຶນຢູ່ ສປປ ລາວ ໃຫ້ຫຼາຍຂຶ້ນ.
ການເຂົ້າຮ່ວມງານສັບປະດາອາຊຽນ-ຈີນ ປະຈໍາປີ 2023 ແມ່ນປະຕິບັດຕາມການເຊື້ອເຊີນຂອງສະຫາຍ Shi Zhonjung ເລຂາທິການໃຫ່ຍສູນອາຊຽນ-ຈີນ, ເນື່ອງໃນໂອກາດສະເຫຼີມສະຫຼອງວັນ ຄົບຮອບ 20 ປີ ທີ່ ສປ ຈີນ ໄດ້ລົງນາມໃນສົນທິສັນຍາວ່າດ້ວຍການຮ່ວມມືໃນເຂດອາຊີຕາເວັນອອກສຽງໃຕ້ ແລະ ຄົບຮອບ 20 ປີ ແຫ່ງການຮ່ວມມືດ້ານຍຸດທະສາດອາຊຽນ-ຈີນ ແລະ ຍັງໄດ້ກໍານົດໃຫ້ເປັນປີແຫ່ງການຮ່ວມມືທາງດ້ານກະສິກໍາ ແລະ ຄວາມໝັ້ນຄົອາຊຽນ-ຈີນ.
ໂອກາດດັ່ງກ່າວ, ຄະນະຜູ້ແທນຂັ້ນສູງຂອງສະພາແຫ່ງຊາດລາວ ຍັງໄດ້ພົບປະກັບສະຫາຍ Zhou Zu Yi ເລຂາຄະນະພັກແຂວງ, ຫົວໜ້າຄະນະປະຈໍາພັກສະພາປະຊາຊົນແຂວງຟູຈ້ຽນ, ສະຫາຍ Shi Zhonjung ເລຂາທິການໃຫ່ຍ ສູນອາຊຽນ-ຈີນ ແລະ ສະຫາຍ Cui Yonghui ກໍາມະການພັກແຂວງຟູຈ້ຽນ, ເລຂາຄະນະພັກເມືອງເຊຍເມິນ. ພ້ອມດຽວກັນນັ້ນ, ສະຫາຍ ສົມມາດ ພົລເສນາ ຍັງໄດ້ເຂົ້າຮ່ວມມີຄໍາເຫັນໃນພິທີເປີດງານສັບປະດາອາຊຽນ-ຈີນ ປະຈໍາປີ 2023 ໂດຍສະຫາຍໄດ້ຍົກໃຫ້ເຫັນໝາກຜົນຂອງການຮ່ວມມືອາຊຽນ-ຈີນ ແລະ ການຮ່ວມມື ລາວ-ຈີນ ໂດຍສະເພາະຜົນສໍາເລັດຂອງໂຄງການລົດໄຟລາວ-ຈີນ ແລະ ຜົນສໍາເລັດດ້ານອື່ນໆ, ພ້ອມທັງໄດ້ເຂົ້າຮ່ວມກິດຈະກໍາຕ່າງໆປິ່ນອ້ອມກອງປະຊຸມ ແລະ ເຄື່ອນໄຫວຢ້ຽມຊົມສະຖານທີ່ສໍາຄັນຕ່າງໆພາຍໃນແຂວງຟູຈ້ຽນ ຈຳນວນໜຶ່ງ.
ການພົວພັນອາຊຽນ-ຈີນ ໄດ້ຮັບການພັດທະນາຢ່າງແຂງແຮງ ແລະ ໄດ້ຮັບການເສີມຂະຫຍາຍ ເປັນກ້າວໆມາ ໂດຍສະເພາະໃນຂົງເຂດການຄ້າ, ການລົງທຶນ, ການສຶກສາ, ວັດທະນະທຳ-ສັງຄົມ ແລະ ການທ່ອງທ່ຽວ ເຊິ່ງໄດ້ກາຍເປັນພື້ນຖານໃຫ້ແກ່ການເພີ່ມທະວີການຮ່ວມມື, ຄວາມເຂົ້າອົກເຂົ້າໃຈເຊິ່ງກັນແລະກັນ ບົນພື້ນຖານຕາມທິດ 4 ດີ, ສິ່ງດັ່ງກ່າວນັ້ນບໍ່ສະເພາະແຕ່ໄດ້ນຳຜົນປະໂຫຍດມາສູ່ອາຊຽນ ແລະ ສປ ຈີນ ເທົ່ານັ້ນ, ແຕ່ຍັງເປັນການປະ ກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາໃນພາກພື້ນອາຊີຕາເວັນອອກສຽງໃຕ້ ແລະ ໃນໂລກອີກດ້ວຍ, ນັບແຕ່ໄດ້ດຳເນີນນະໂຍບາຍເປີດປະຕູສູ່ພາຍນອກ ກໍຄືໃນຍຸກໂລກາພິວັດ ອາຊຽນ ແລະ ຈີນ ກໍໄດ້ເພີ່ມທະວີການຮ່ວມມືກັບສາກົນໃນຂອບຫຼາຍຝ່າຍ ທັງໃນລະດັບອະນຸພາກພື້ນ ແລະ ສາກົນ ຢ່າງຕັ້ງໜ້າ ໂດຍຍຶດໝັ້ນນະໂຍບາຍການຕ່າງປະເທດຂອງຕົນ ຢ່າງສະເໝີຕົ້ນສະເໝີປາຍ ເພື່ອປະກອບສ່ວນເຂົ້າໃນພາລະກິດປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມໝັ້ນຄົງຂອງພາກພື້ນ ແລະ ໃນໂລກ ແນໃສ່ສ້າງເງື່ອນໄຂທີ່ເອື້ອອຳນວຍໃຫ້ແກ່ການສ້າງສາພັດທະນາເສດຖະກິດ-ສັງຄົມ ໃຫ້ມີຄວາມເຂັ້ມແຂງ ກໍຄືປັບປຸງຄຸນນະພາບຊີວິດການເປັນຢູ່ຂອງປະຊາຊົນໃນບັນດາປະເທດອາຊຽນ ພ້ອມທັງໃຫ້ການສະໜັບສະໜູນທຸກຂໍ້ລິເລີ່ມການຮ່ວມມື ທັງໃນຂອບສອງຝ່າຍ ແລະ ຫຼາຍຝ່າຍ ທີ່ເຫັນວ່າຈະນຳມາເຊິ່ງຜົນປະໂຫຍດຕໍ່ປະເທດຊາດ, ພາກພື້ນ ແລະ ສາກົນໂດຍລວມ.
ສໍາລັບ ສປປ ລາວ ແລະ ສປ ຈີນ ໄດ້ມີການພົວພັນກັນນັບມື້ນັບເລິກເຊິ່ງຕາມ 4 ທິດດີ, ເພື່ອນທີ່ດີ, ສະຫາຍທີ່ດີ, ບ້ານໃກ້ເຮືອນຄຽງທີ່ດີ ແລະ ຄູ່ຮ່ວມມືທີ່ດີ, ມີການຮ່ວມມືຍຸດທະສາດຮອບດ້ານໝັ້ນຄົງຍາວນານ ແລະ ເປັນຄູ່ຮ່ວມສະຕາກໍາມາໄດ້ຫຼາຍປີ ແລະ ພວມນຳຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຈີນ ບົນພື້ນຖານຄວາມເຫັນອົກເຫັນໃຈ ແລະ ໃຫ້ການສະໜັບສະໜູນຊ່ວຍເຫຼືອເຊິ່ງກັນແລະກັນມາໂດຍຕະຫຼອດ, ມີການພົວພັນປະສານສົມທົບກັນຢ່າງສະໜິດແໜ້ນ, ມີການແລກປ່ຽນທັດສະນະຮ່ວມກັນຢ່າງເປັນປົກກະຕິ ແລະ ໄດ້ກຳນົດຈຸດສຸມການຮ່ວມມື ເພື່ອຮັດແໜ້ນ ແລະ ເສີມຂະຫຍາຍສາຍພົວພັນຮ່ວມມືໃຫ້ກ້າວເຂົ້າສູ່ລວງເລິກ ແລະ ລວງກວ້າງ ຕາມແຕ່ລະໄລຍະຢ່າງມີແບບແຜນ.