(ສພຊ) ຕອບສະໜອງຕາມຄໍາເຊື້ອເຊີນຂອງ ສະຫາຍ ຫງຽວນ ດັກ ວິງ ກໍາມະການສູນກາງພັກ, ຄະນະປະຈໍາ,ປະທານກຳມາທິການວັດທະນະທຳ-ສຶກສາ ແລະ ສະຫາຍ ຫງວຽນ ຖຸ໋ຍ ແອ່ງ ກຳມະການສູນກາງພັກ, ປະທານກຳມາທິການສັງຄົມ, ສະພາແຫ່ງຊາດ ແຫ່ງ ສສ.ຫວຽດນາມ, ໃນລະຫວ່າງວັນທີ 12-16 ຕຸລາ 2022 ສະຫາຍ ນາງ ທຸມມາລີ ວົງພະຈັນ ກຳມະການຄະນະປະຈຳສະພາແຫ່ງຊາດ, ປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກ ຢູ່ ສສ.ຫວຽດນາມ, ຈຸດປະສົງຂອງການຢ້ຽມຢາມ ແລະ ເຮັດວຽກຄັ້ງນີ້ ແມ່ນເພື່ອເປັນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ-ສອງລັດ, ສອງສະພາແຫ່ງຊາດ ເວົ້າລວມ, ເວົ້າສະເພາະ ແມ່ນການຜັນຂະຫຍາຍ ບົດບັນທຶກການຮ່ວມມື ລະຫວ່າງ ສະພາແຫ່ງຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສະພາແຫ່ງຊາດ ແຫ່ງ ສາທາລະນະລັດ ສັງຄົມນິຍົມຫວຽດນາມ ໃຫ້ເຂົ້າສູ່ລວງເລິກ.

ໃນການຢ້ຽມຢາມ ແລະ ເຮັດວຽກຄັ້ງນີ້ ຄະນະຜູ້ແທນກຳມາທິການວັດທະນະທຳ-ສັງຄົມ ສະພາແຫ່ງຊາດ ແຫ່ງ ສປປລາວ ໄດ້ພົບປະສອງຝ່າຍນຳກັນ ລະຫວ່າງ ກຳມາທິການວັດທະນະທຳ-ສັງຄົມ ສະພາແຫ່ງຊາດ ສປປລາວ ກັບ ກຳມາທິການວັດທະນະທຳ-ສຶກສາ ແລະ ກຳມາທິການສັງຄົມ ຂອງສະພາແຫ່ງຊາດ ແຫ່ງ ສສ.ຫວຽດນາມ ຢູ່ທີ່ຫໍສະພາແຫ່ງຊາດ ສສ.ຫວຽດນາມ ເຊິ່ງການພົບປະໄດ້ມີການລາຍງານສະພາບການເຄື່ອນໄຫວໂດຍສັງເຂບຂອງແຕ່ລະຝ່າຍໃຫ້ກັນຮັບຊາບ, ແລກປ່ຽນບາງບົດຮຽນໃນຂົງເຂດວັດທະນະທໍາ-ສັງຄົມ ເປັນຕົ້ນ: ການຕິດຕາມກວດກາປົກກະຕິ, ຫົວຂໍ້ສະເພາະ ແລະ ບັນຫາເຄັ່ງຮ້ອນທີ່ມີຜົນກະທົບຕໍ່ສັງຄົມ, ການຄົ້ນຄວ້າເພື່ອກໍານົດຫົວຂໍ້ກ່ຽວກັບການຕົກລົງບັນຫາສຳຄັນຂອງຊາດ ແລະ ກົນໄກປະສານງານກັບລັດຖະບານ, ບັນດາກະຊວງ ແລະ ພາກສ່ວນທີ່ກ່ຽວຂ້ອງ, ການຄົ້ນຄວ້າ, ພິຈາລະນາ ແລະ ແກ້ໄຂຄຳຮ້ອງທຸກ, ຄຳສະເໜີຂອງປະຊາຊົນ; ການບຳລຸງສ້າງພະນັກງານໃຫ້ເປັນມືອາຊີບ, ການຕິດຕາມກວດກາຂອງສະພາແຫ່ງຊາດ ກ່ຽວກັບການສ້າງ, ຄຸ້ມຄອງ ແລະ ນຳໃຊ້ ກອງທຶນປະກັນສັງຄົມ, ກອງທຶນປະກັນສຸຂະພາບ ແລະ ການແກ້ໄຂບັນຫາການວ່າງງານ; ການສ້າງ ແລະ ປັບປຸງກົດໝາຍ, ນິຕິກຳໃຕ້ກົດໝາຍ ເພື່ອໃຫ້ກົດໝາຍມີຄວາມສັກສິດ, ພ້ອມກັນນັ້ນ ທັງສອງຝ່າຍ ຍັງໄດ້ປຶກສາຫາລື ທິດທາງ, ແຜນການຮ່ວມມືກັນໃນຕໍ່ໜ້າ.

ໃນຕອນບ່າຍຂອງວັນທີ 13 ຕຸລາ 2022 ຄະນະຜູ້ແທນກຳມາທິການວັດທະນະທຳ-ສັງຄົມ ສະພາແຫ່ງຊາດລາວ ໄດ້ເຂົ້າຢ້ຽມຂໍ່ານັບ ສະຫາຍ ເຈີນ ແທງ ເໝີນ ກຳມະການກົມການເມືອງສູນກາງພັກກອມມູນິດຫວຽດນາມ, ຮອງປະທານສະພາແຫ່ງຊາດ ແຫ່ງ ສສ.ຫວຽດນາມ ຜູ້ປະຈໍາການ ຢູ່ທີ່ຫໍປະຊຸມສະພາແຫ່ງຊາດ ສສ.ຫວຽດນາມ ເຊິ່ງທ່ານໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນໃນຄັ້ງນີ້ ທີ່ເປັນການສືບຕໍ່ມູນເຊື້ອອັນ​ດີ​ງາມ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ, ສອງສະພາແຫ່ງຊາດ ເວົ້າ​ລວມ, ເວົ້າ​ສະ​ເພາະແມ່ນ​ເປັນ​ການ​ເສີມຂະຫຍາຍ​ການ​ພົວພັນ ​ແລະ​ ຮ່ວມ​ມື ລະຫວ່າງ​ກຳມາທິການວັດທະນະທຳ-ສັງຄົມ ສະພາແຫ່ງຊາດ ສປປລາວ ກັບ ກຳມາທິການວັດທະນະທຳ-ສຶກສາ ແລະ ກຳມາທິການສັງຄົມ ຂອງສະພາແຫ່ງຊາດ ສສ.ຫວຽດນາມ ທີ່​ມີ​ມາ​ແຕ່​ດົນ​ນານ​ແລ້ວ​ນັ້ນ ໃຫ້​ມີ​ຄວາມໜັກແໜ້ນ,​ ຈະ​ເລີນງອກ​ງາມ​, ມີໝາກມີ​ຜົນຕົວຈິງ ແລະ ເປັນການຜັນຂະຫຍາຍຜົນສຳເລັດການຢ້ຽມຢາມ ສປປລາວ ຢ່າງເປັນທາງການຂອງ ສະຫາຍ ເວືອງ ດິງ ເຫວະ ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດ ແຫ່ງ ສສ.ຫວຽດນາມ ໃນເດືອນພຶດສະພາ 2022 ທີ່ຜ່ານມາໃຫ້ເຂົ້າສູ່ລວງເລິກ.

ນອກຈາກນີ້, ໃນວັນທີ 14 ຕຸລາ 2022, ຄະນະຜູ້ແທນໄດ້ພົບປະເຮັດວຽກກັບອົງການປະກັນສັງຄົມ ຂອງ ສສ.ຫວຽດນາມ ແລະ ເດີນທາງໄປເຄື່ອນໄຫວຢູ່ແຂວງ ບັກນິ່ງ ເພື່ອແລກປ່ຽນບົດຮຽນ ກ່ຽວກັບການສ້າງ, ຄຸ້ມຄອງ ແລະ ນຳໃຊ້ກອງທຶນປະກັນສັງຄົມ, ກອງທຶນປະກັນສຸຂະພາບ ແລະ ການແກ້ໄຂບັນຫາການວ່າງງານ ເຊິ່ງການໄປເຄື່ອນໄຫວຢູ່ແຂວງ ບັກນິ່ງ ຄະນະຜູ້ແທນຂອງກໍາມາທິການ ໄດ້ເຮັດວຽກຮ່ວມກັບຄະນະສະມາຊິກສະພາແຂວງ ບັກນິ່ງ ແລະ ໃນວັນທີ 15 ຕຸລາ 2022, ຄະນະຜູ້ແທນໄດ້ເດີນທາງໄປຢ້ຽມຢາມ ແລະ ພົບປະກັບ ຄະນະອໍານວຍການ, ຄູ-ອາຈານ ເພື່ອຮັບຟັງການລາຍງານສະພາບການຮຽນ-ການສອນ ແລະ ໄດ້ໂອ້ລົມຕໍ່ ນັກຮຽນລາວ ທີ່ກຳລັງສຶກສາຢູ່ໂຮງຮຽນມິດຕະພາບ T78 ແລະ ໃນໂອກາດນີ້ ສະຫາຍ ນາງ ທຸມມາລີ ວົງພະຈັນ ຫົວໜ້າຄະນະຜູ້ແທນໄດ້ຕາງໜ້າຄະນະໂອ້ລົມ ຕໍ່ນັກຮຽນລາວ ໃຫ້ເອົາໃຈໃສ່ຕັ້ງໃຈຮໍ່າຮຽນ, ມີສະຕິຕໍ່ການຈັດຕັ້ງ, ເຄົາລົບ ແລະ ປະຕິບັດ ກົດໝາຍ, ກົດລະບຽບຂອງໂຮງຮຽນ, ເປັນເຈົ້າການຕ້ານປາກົດການຫຍໍ້ທໍ້ຕ່າງໆ, ເຝິກຝົນຫຼໍ່ຫຼອມຕົນເອງໃຫ້ເປັນນັກຮຽນດີ, ນັກຮຽນເກັ່ງ ເພື່ອໃຫ້ເປັນຜູ້ສືບທອດທີ່ດີ, ປະກອບສ່ວນຢ່າງຕັ້ງໜ້າເຂົ້າໃນການເພີ່ມພູນຄູນສ້າງມູນເຊື້ອອັນດີງາມ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ພັກ-ລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ຂຽວສົດງົດງາມ ແລະ ໝັ້ນຄົງຂະໜົງແກ່ນ ຕະຫຼອດກາລະນານ.