ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ເພື່ອປຶກສາຫາລື ແລະ ລາຍງານຜົນກະທົບຕ່າງໆ ຈາກໂຄງການພັດທະນາເສດຖະກິດ-ສັງຄົມ ແລະ ສິ່ງແວດລ້ອມໃນຂອບເຂດທົ່ວປະເທດ ເພື່ອເປັນຂໍ້ມູນ ແລະ ບ່ອນອີງໃນການສ້າງແຜນການຕິດຕາມ ກວດກາໃຫ້ຮອງປະທານຄະນະປະຈໍາສະພາແຫ່ງຊາດ ທີ່ຈະລົງຕິດຕາມກວດກາພາຍໃນເດືອນກັນຍາ 2022 ແລະ ເພື່ອຄວາມເປັນເອກະພາບຕໍ່ບັນດາຂໍ້ມູນ ແລະ ເປົ້າໝາຍຕ່າງໆ ທີ່ຈະລົງຕິດຕາມກວດກາຢູ່ແຕ່ລະທ້ອງຖິ່ນ ເປັນຕົ້ນບັນຫາຜົນກະທົບ, ການແກ້ໄຂ ແລະ ການຊົດເຊີຍ ໃນໄລຍະຜ່ານມາ ສະພາແຫ່ງຊາດ ຈຶ່ງໄດ້ຈັດກອງປະຊຸມຮ່ວມລະຫວ່າງຄະນະປະຈໍາສະພາແຫ່ງຊາດ ແລະ ບັນດາກະຊວງ, ອົງການທີ່ກ່ຽວຂ້ອງ ໃນວັນທີ 24 ສິງຫາ 2022 ທີ່ຫ້ອງຖະແຫຼງຂ່າວສະພາແຫ່ງຊາດ ໂດຍການເປັນປະທານຂອງທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ, ມີບັນດາທ່ານປະທານ-ຮອງປະທານກໍາມາທິການພາຍໃນສະພາແຫ່ງຊາດ, ບັນດາທ່ານຮອງລັດຖະມົນຕີ ຈາກກະຊວງແຜນການ ແລະ ການລົງທຶນ, ກະຊວງພະລັງງານ ແລະ ບໍ່ແຮ່, ກະຊວງໂຍທາທິການ ແລະ ຂົນສົ່ງ, ກະຊວງກະສິກໍາ ແລະ ປ່າໄມ້ ພ້ອມດ້ວຍແຂກຖືກເຊີນເຂົ້າຮ່ວມ.
​ ກອງປະຊຸມໄດ້ຮັບຟັງ ການມີຄໍາເຫັນຊີ້ນໍາກອງປະຊຸມຂອງປະທານກອງປະຊຸມ; ການລາຍງານຄວາມຄືບໜ້າການແກ້ໄຂບັນຫາທີ່ຄົງຄ້າງຕາມຜົນການຕິດຕາມກວດກາປະຈໍາປີ 2021 ຂອງກໍາມາທິການບັນດາເຜົ່າ ຈາກທ່ານຮອງລັດຖະມົນຕີກະຊວງແຜນການ ແລະ ການລົງທຶນ; ທ່ານຮອງລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ຕາງໜ້າຈາກກະຊວງກະສິກໍາ ແລະ ປ່າໄມ້; ລາຍງານຜົນການແກ້ໄຂການຕິດຕາມກວດກາເສັ້ນທາງລົດໄຟລາວ-ຈີນ ຈາກກະຊວງໂຍທາທິການ ແລະ ຂົນສົ່ງ. ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ຜັດປ່ຽນກັນປະກອບຄໍາຄິດຄໍາເຫັນໃສ່ຄໍາຖາມເຈາະຈີ້ມຂອງປະທານກອງປະຊຸມ ໃຫ້ກອງປະຊຸມມີຄໍາເຫັນສະໜອງຂໍ້ມູນໃນການກໍານົດເປົ້າໝາຍເຂົ້າໃນແຜນການຕິດຕາມກວດກາ ປະຈໍາ 6 ເດືອນທ້າຍປີ 2022 ຂອງຄະນະປະຈໍາສະພາແຫ່ງຊາດ.
(ພາບ ແລະ ຂ່າວ: ສອນສັກ ວັນວິໄຊ)